SUPLEMEN PA MORIA TANGGAL 10-16 MARET 2019, OGEN ROMA 16:1-2;12-15

OGEN :

Roma 16 : 1 – 2; 12-15

TEMA :

NIKAPKEN DIRI GUNA NGELAI TUHAN

TUJUN :

Gelah Moria :
- Meteh maka enterem diberu si enggo ikut ngelai ibas Gereja mula - mula.
- Nggit ras nikapken diri guna jadi serayan

PENGKENAINA
Ibas gerejata GBKP ilakoken tep – tep 5 (lima) tahun sekali pemilihen Pertua ras Diaken. Gundari ibas tahun 2019 enda enggo ka seh paksa ilakoken pemilihen. Tentu sebagai ngawan perpulungen, enda merupaken tanggung jawab si arus sisehken man Tuhan Dibata. Arus muri kita ibas ngelakoken pemilihen enda, gelah tuhu – tuhu kel kari terpilih si mehulina, jenari reh ulina pe tetap GBKP enda ku wari si reh.

Rikutken tata gereja, bahwa si berhak ipilih untuk menjadi Pertua ras Diaken labo hanya man mamre, moria pe lit hakna guna ipilih. Sebab lit denga ibas piga – piga runggun entah pe perpulungen lalit Pertua Diaken sidiberu. Erbage – bage alasen ibahan gelah ula ia ipilih, lit deba perban la beluh, la pang, repot nikapken isi jabu, mbiar la idukung perbulangen seh maka jadi perubaten bas jabu ras sidebanna. Ibas bahan PA nta sekalenda, moria iajuk gelah nggit nikapken diri guna ngelai Tuhan alu erlajar arah diberu si enggo ikut ngelai ibas Gereja mula – mula.

MPEBAGESI PENGANGKAN KERNA OGEN
Ibas nats ogenta, lit piga – piga diberu si enggo ikut ngelai dahin Tuhan ibas masa Gereja mula – mula ;
1. Ayat 1 – 2, Pebe (ertina “yang murni”=meciho) sekalak diberu junani nari. Kemungkinen besar surat Roma itaruhken Pebe langsung ku Roma i Kengkrea (deher Korinti) nari. Pebe, kalak Kristen si asalna kiniteken sindekah (kafir) nari, janah erti gelar Pebe eme, yang murni (berseri – seri atau bersinar). 3 hal si catat kerna Pebe eme, 1. Ia kalak sitek, 2. Ia sekalak serayan ibas perpulungen, Diaken i daerah Kengkrea. 3. Ia kalak bayak janah melumbar ka. Melala kalak si enggo isampatina termasuk Paulus sendiri pe bas pelayanenna, janah ibahanna rumahna ingan kesilang man teman sisada kiniteken (12:13).

2. Ayat 12a, Tripena ( ertina “dainty” cantik jelita) ras Triposa (ertina “delicate” lembut, rapuh) erti gelarna duana perempuan yang halus, bersolek, hidup mewah, tading i Ikonium ingan ija Paulus melayani nampati ia jadi kalak si tek man Kristus, jenari berkat ia ku Roma. I Roma ia alu tutus ras pekeri gegeh bas ndahiken dahin Tuhan, lalit istilah ibas ia santai – santai ndahiken dahin Tuhan. Enda cukup terbalik adi ibandingken ras erti gelarna duana. Arah kinibayakenna ipakena guna pelayanen, ngapuli kalak musil ibas Gereja, nikapken ras ngelai keperlun guna pelayanen Injil. Emaka ulih arah pengajaren, dorongen ras penampat bagepe pengalamenna, jadi mpergegehi ras dorongen semangat man kalak singuda denga seh maka ia jera kerina rikut pe man kalak Kristen sidebanna.

3. Ayat 12b, Persis, gelarna usur ipake man sekalak budak diberu Junani, ia sekalak diberu Persia. Ia pe cukup melala kal nampati dahin Tuhan bagi temanna diberu sidebanna.
4. Ayat 13, nande Rupus cukup ndeher ras nampati pelayanen Paulus, emaka Paulus enggo ianggapna jadi nandena sendiri.
5. Ayat 15, Julia merupaken gelar asli Roma nari, ras turang Nerus. Kemungkinen Nerus ras turangna eme anak Julia ras Pilologus.
Arah piga – piga gelar diberu ibas ogenta enda, teridah maka nai – nai nari kepeken enggo enterem diberu si enggo ikut alu ukur ersuruh ngelai ras nampati dahin Tuhan ibas Gereja mula – mula.

PENGKENAINA
Para Pahlawan bangsanta pe ndube eme diberu enggo ikut berjuang guna membela bangsanta. Ibas paksa genduari, secara pemerintahen diberu enggo melala njemak peranan penting sebagai pemimpin guna ngelai rakyat alu tegas ras pang. Tentu enda jadi penjemba man banta sebagai moria guna nggit mereken dirina guna ersikap untuk ngelai dahin Tuhan. Genduari ibas Gerejanta Pendeta sidiberu enggo cukup enterem ras lit ka enggo jadi ketua runggun. Ertina bahwa Gerejanta pe ikut mendukung kerna pelayanen diberu. Alu bage kita Moria iajuk gelah ula mbiar, nggit mengembangken talenta ras potensi si enggo ibereken Tuhan guna dahin pelayanen. Ibas ogenta ndai, bahwa kerina diberu – diberu e kenca ia tek man Kristus mis berekenna dirina guna melayani dahin Tuhan alu pekeri gegeh ras kinibayakenna pakena guna dahin pelayanen, janah enterem pe kalak tek man Tuhan arah pelayanen diberu – diberu enda. Sebab ibas Dibata seri kerina manusia terlebih ibas ngelai dahin Tuhan, la erpilihen dilaki entah pe diberu, siterpenting eme kininggiten ras ketutusen bas ndahiken dahin Tuhan. Mari dage kita Moria, ibas pemilihen Pertua Diaken enda gelah nikapken dirina guna ipake Tuhan untuk ngelai dahin Tuhan.

Pdt. Nur Elly br Tarigan-Rg. Karawang