SUPLEMEN PA MORIA 28 APRIL-04 MEI 2024, PILIPI 2:4-11

Ogen :

Pilipi 2:4-11

Tema :

Ngumban perukuren Kristus

Tujun  : Gelah Moria :

                 - Nggargari Perukuren Kristus

                 - Ncidahken perukuren Kristus i bas geluh tep-tep wari.

Metode PA   : 

Meditasi

 

 

KATA PENARUH

Lit kuan-kuan si ngatakenca “like father like son,” kuan-kuan enda seri ras kuan-kuan Indonesia si ngatakenca “buah jatuh tidak jauh dari pohonnya.” Antusenna bagenda, mungkin pernah sialami, lit si ngatakenca maka ayonta e mirip entah pe menam seri ras ayo bapa entah nandenta. Labo terjeng ayo saja, tapi lit ka si ngatakenca maka caranta ngerana, caranta rukur, gerak-gerik, tingkah laku, rsd.-na, ikataken seri ras bapanta entah pe nandenta. Engkai maka lit si ngatakenca maka kita menam seri ras bapa nandenta? Jawabenna, selain enggo pasti erkiteken kita anak kandung bapa ras nandeta, pasti lit hubungen si ndeher antara kita ras orang tuanta. Erkiteken hubungen si ndeher e, tuhu-tuhu iteh kita karakter-karakter si mehuli (entah pe sebalikna, si la mehuli) si lit i bas bapa ras nandeta si secara tanpa kita sadari menurun i bas dirinta.

Sebage kalak si enggo ngaloken keselamaten i bas Yesus Kristus, kita eme representasi Kristus i bas kegeluhen si tep-tep wari. Ertina geluhta seharusna ngusih Kristus/ngumban Karakter Kristus. Teladan i bas Kristus labo banci nggeluh bas adi la lit hubungen si ndeher ras Kristus. I bas PA-ta sekali enda, isingetken kita mulihi kerna nggeluh ndeher ras Kristus.

MPEBAGESI NATS

Rasul Paulus me si majekken Perpulungen Pilipi (bdk. Perb. Rasul 16:12-40; Pil. 4:15-17). Erkiteken si e lit hubungan si ndeher antara Rasul Paulus ras Perp. Pilipi. Hubungen si ndeher e teridah arah penampat ras pertoton i bas Perp. Pilipi nari man Rasul Paulus i bas pelayanenna (bdk. Pil. 1:5; 4:15-17). Surat enda itulisken alu maksud Paulus ngataken bujur i bas kerina si enggo ibereken perpulungen man bana janah gelah perpulungen e meteh uga keadaan Rasul Paulus si sangana lit i bas penjara gelah tetap idukung i bas pertoton. Teridah maka lit hubungen si saling mendukung sada ras si debanna antara Rasul Paulus ras perpulungen i Pilipi. La lit persoalen si serius i bas perpulungen Pilipi, maka isi surat Paulus e bersifat memelihara hubungen si mehuli gelah reh ulina sekaligus mpegegehi perpulungen gelah tetap paguh erkiniteken man Yesus Kristus amin pe melala tantangen.

Judul perikop i bas ogenta sendah “Jesus jadi usihen,” i bas terj. TB-LAI nina, “Nasihat supaya bersatu dan merendahkan diri seperti Kristus. Rasul Paulus ngajuk gelah perpulungen e ersada arihna, sikeleng-kelengen, ersada geluhna dingen ersada ukurna (ay. 2), meteruk ukur ras saling menghargai (ay. 3), ras mperdiateken keperlun kalak si deban (ay. 4). Sebab iteh Paulus maka kiniersadaan si paguh i bas perpulungen erbahanca perpulungen e banci tuhu-tuhu nggeluh i bas kiniteken si payo man Tuhan Dibata i bas Yesus Kristus janah perpulungen e banci tuhu-tuhu ndahiken dahin-dahin pelayanen si luar biasa sue ras peraten Dibata. Tapi lit denga piga-piga kalak i bas Perp. Pilipi si la nggit ersada arihna, merangap, meganjang ukur, ulin akapna ia asangken kalak si deban, janah la nggit mperdiateken keperlun kalak si deban (egois). I bas bhs. Ind. ay. 3 nina, “mencari kepentingan sendiri atau puji-pujian yang sia-sia.” “Kepentingan sendiri” seri ertina ras menguntungkan diri sendiri, janah “pujian yang sia-sia” seri ertina ras gila hormat. I bas si e banci siidah maka amin pe si la nggit ersada arihna sitik ngenca jumlahna, tapi banci menghambat kuantitas ras kualitas pelayanan i tengah-tengah perpulungen.

Si jadi palas i bas perpulungen banci nggeluh sikeleng-kelengen, ersada arihna, ersada ukurna, meteruk ukur, saling menghargai, ras mperdiateken keperlun kalak si deban, eme nggeluh i bas Kristus. I bas ay. 1 enggo isingetken Paulus, i bas terj. BIMK nina, “Kalian kuat, karena kalian bersatu dengan Kristus. Dan kalian terhibur karena Kristus mengasihimu! Kalian dibimbing Roh Allah, dan kalian juga saling mengasihi serta menaruh belas kasihan satu sama lain.” Ertina i bas Kristus ngenca lit gegeh, pengapul, ras keleng ate si tuhu-tuhu.

I bas ay. 5-8 semakin ipertegas Paulus maka kalak si nggeluh i bas Kristus bali perukurenna ras Kristus, meteruk ukurNa bagi sekalak juak-juak, erkemalangen man Dibata, ras nggit erkorban guna kiniulin kalak si deban. Bahkan i bas ay. 5, banci kataken kalimat perintah, maka arus perukurenta bali ras perukuren Kristus. Situhuna perpulungen e enggo tuhu-tuhu berusaha nggeluh i bas Kristus (bdk. ay. 1), saja ngenca lit denga piga-piga kalak si lenga dewasa kinitekenna, emaka gelah malem ate Rasul Paulus, ipindoken Rasul Paulus man Perp. Pilipi, khususna si lenga dewasa kinitekenna, gelah nggit ersada arihna, sikeleng-kelengen, ersada geluhna dingen ersada ukurna, meteruk ukur, saling menghargai, ras mperdiateken keperlun kalak si deban. Gelah dahin-dahin persekutuan, kesaksian ras pelayanan i bas perpulungen pe la terhambat, banci silaksanaken alu mehuli sue ras peraten Dibata.

Arah penjelasen kerna ogenta sendah, teridah maka palas si erbahanca perpulungen Filipi enda erkeleng ate ras mediate sada ras si debanna e me erkiteken enggo lit persadan si tuhu-tuhu ras Kristus, janah enggo lit kerembaken si tuhu-tuhu ras Kesah Dibata. Enda hal si pentingna kel. Bicara mbue pe pergumulen perpulungen e, adi palas kinitekenna enggo paguh maka perpulungen e tetap ngasup ngataken bujur ras nehken kekelengen (bdk. 2 Kor. 8). Tapi sebalikna, megegeh pe perpulungen secara ekonomi-la lit pergumulen nggeluh tapi adi la nggeluh i bas Tuhan/la ersada ras Tuhan maka biak kerangapen, ukur meganjang ras egois nggeluh i bas dirinta.

PENGKENAINA

Tema i bas PA-ta sendah ngajuk kita Moria gelah Ngumban/Ngusih Perukuren Kristus. Alu tujun nggargari perukuren Kristus ras ncidahken perukuren Kristus i bas geluh tep tep wari. Karakter Kristus banci nggeluh bas kita adi lit hubungen si ndeher ras Kristus. Hubungen si ndeher ras Kristus sangat menentukan kedewasaan rohani Moria. Hubungen si ndeher ras Kristus hanya Dibata ras kita secara pribadi ngenca si metehsa. Kalak si ngidah arah ndarat nari banci salah pengidahna. Siakap ndeher ras Kristus, sabab kita pengurus gereja, rusur ikut bas tim paduan suara, rajin mengikuti kegiatan rohani, kepeken rutinitas ras formalitas ngenca. Karaterna tetap saja bagi sigel-gel, penuh dengan kebencian, iri hati, senang denga pebungaken sen, sulit untuk mengampuni rsd. Emaka i bas kesempaten enda, marilah kita Moria mengevaluasi secara pribadi hubungenta ras Kristus. Ertoto mindo gegeh i bas Dibata nari gelah ipengasupNa kita kerina menjalin relasi si ndeher ras Kristus arah ketutusenndu erlajar Kata Dibata, ertoto, rsd.-na. Terlebih sekali enda metode sipake kita adalah Meditasi.

Tujun sipemena, nggargari perukuren Kristus. Mari sigargari perukuren Kristus siapai sienggo nggeluh bas kita. Jelas Perikop ncidahken man banta maka karakter kalak sienggo nggeluh ras Kristus eme rindu membangun kiniersadan (la perubat-ubat/labo profokator), lit kekelengen bas kita, labo merangap, meteruk ukur, labo siakap ulin kita asangken kalak sideban. Mampu kita mengapresiasi kelebihen bas kalak sideban, ras peduli/empati kita nandangi kalak sideban, khususna kalak simembutuhken penampat. Janah rikutken tujun sipeduaken, maka perukuren Kristus e arus tetap sicidahken i bas geluhta tep-tep wari. Sipindo tetap gegeh kuasa kesah sibadia, gelah ipengasupna kita ndalanken bagi singena ateNa.

Pdt. Larena br. Sinuhadji (Nd. Reynard Tarigan)-Runggun Cikarang