SUPLEMEN PJJ TANGGAL 06-12 APRIL 2025, EPESUS 1:7-12

NATS : EPESUS 1.7-12

TEMA : NGGELUH TAMA PUJIN MAN KEMULIAN DIBATA (Renungen Paskah)

 

A. BENA KATA

Ibas Epesus 2:1-2, nina: “I bas paksa si lewat, erkiteken salahndu ras dosa-dosandu, mate pertendinndu. Paksa si e nai iikutkenndu kebiasan doni si jahat. Iikutkenndu peminpin penguasa-penguasa si lit i bas awang-awang, e me kesah si genduari erdahin i bas kalak si la nggit erkemalangen man Dibata.” Bagem ituriken arah firman enda kegeluhenta ope denga si tandai Kristus, ope dengan sialoken Kristus jadi Tuhan ras Juruselamatta. Kegeluhenta ndauh kal i bas geluh si mehuli, ndauh kal i bas geluh si banci tama pujin man kemulian Dibata.

E maka uga kegeluhenta kenca kita lit ibas Kristus, enda me si jelasken bas nats renungen PJJ-nta Minggu enda.

B. PENJELASEN TEKS

1. Kai kin Ertina “Erkiteken/I bas Kristus/Dalam Kristus”

Ibas ayat 3-6 ope ayat 7-12 si jadi nats PJJnta enda ituriken Paulus kai erti erkiteken Kristus, eme kita si enggo ngaloken Kristus jadi Tuhan ras Juruselamatta, kita si enggo ipersada ras Kristus erkiteken kita tek man baNa. Maka ijenda ituriken Paulus alu sangat luar biasa pasu-pasu kai sialoken erkiteken tek kita man Kristus:

1. Enggo ipasu-pasuNa kita, alu erbage-bage pemere pertendin si lit i bas ingan si meganjang. Enda ngerana kerna pasu-pasu kegeluhen si rasa lalap ibas kinirajan Dibata si kekal.
2. Ope denga ijadiken Dibata doni enda, enggo ipilihNa kita jadi sikerajangenNa arah persadanta ras Kristus gelah kita badia dingen la ersalah i lebe-lebeNa. Erkiteken keleng ateNa. Gelah kita badia ertina gelah kita nggeluh bagi singena ate Dibata. Nggeluh erpalasken pengajaren Kristus.
3. Enggo itetapkenNa maka arah Jesus Kristus ialokenNa kita jadi anak-anakNa. Enda me si ngena ateNa dingen sura-suraNa. Ibas Kristus kita iangkat jadi anak-anak Dibata. Selaku anak-anak Dibata kita eme ahli waris kerajan Dibata, janah selaku anak-anak Dibata, maka DIbata ka nge sinjamini kegeluhenta rikut pe maka kegeluhenta selaku anak-anak Dibata la banci la ngusih perbahanen si enggo ituduhken Kristus man banta kalak si tek.
4. E makai bas ayat 7-9 ituriken Paulus tole nari kai kin erti Erkiteken/I bas Kristus/Dalam Kristus. 1:7 Sabap erkiteken Kristus enggo kita itebusi, e me dosa-dosanta enggo ialemi Dibata. Kristus enggo mate i kayu persilang gelah arah kematenNa kita ndatken penebusan ras pengalemi dosanta.
5. 1:9 Rikutken sura-suraNa, ipetangkasNa man banta sura-suraNa si terligen, si enggo kin itetapkenNa guna isehkenNa arah Kristus. Situhuna sura-sura Dibata lako ngkelengi ras ngkelini manusia enggo me lit bage manusia ndabuh ku bas dosa (bd. Kej.3.15). Tapi sura-sura Dibata enda langa tangkas, terbuni denga man manusia sekali pe enggo isehkenNa arah nabi-nabiNa.
6. Janah sura-sura enda enggo jadi tangkas ibas kerehen Kristus ku doni enda. Ibas Kristus kai si gel-gel terbuni enggo tangkas man banta kerina.

Janah kerina enda nuduhken uga belinna kiniulin Dibata. Si ikusekenNa man banta seh riba-iba, alu dem kepentarenNa dingen pengertinNa. Salib Kristus eme kepentaren Dibata sinelamatken kita si tek. Ibas salib Kristus teridah uga pengertin Dibata si mbages si la terukuri manusia tapi eme ibahan Dibata guna jadi dalan keterkelinen geluh kalak si tek.

2. Kristus me kepala/Takal kerinana.

Kai tole nari rencana Dibata ibas Kristus. Tole ituduhken maka rencana Dibata si isehkenNa kenca seh paksana e, e me guna mpersadaken kerina si nasa lit, subuk i Surga bage pe si i doni, gelah Kristus jadi kepalana. Mpersadaken kalak Jahudi ras kalak si labo Jahudi. I bas Kristus kita ipersadaken mulihi ras kerina tinepa Dibata. Kerina ibahan Dibata sue ras si ngena ateNa dingen rikutken si enggo itetapkenNa.

E maka subuk kalak Jahudi ras kalak si la Jahudi si enggo tek man Kristus maka Kristus me takal, kepala kerina perpulungen. Ku IA me kerina perpulungen irakut jadi sada.

3. Maksud ras Tujun kita ipilih Dibata ibas Kristus.

Arah ayat 11 ras 12 banci siidah ijenda 2 hal maksud ras tujun Dibata milih kita ibas Kristus.

1. Tangtangna nari kita enggo ipilih Dibata sabap IA ersura-sura gelah kita dat bagin i bas kai si enggo jadi sikerajangen Kristus. Sieteh maka Kristus enggo ringan i Surga ras Bapa. Kai si enggo ialoken Kristus ibas Surga si meganjang e kang nge si sikapkenna man banta anak-anakNa.
2. Janah gelah kita, kalak si pemena erpengarapen man Kristus, nggeluh tama pujin man kemulian Dibata. Gelah kegeluhenta si gundari i doni enda sidalani gelah arah kegeluhenta tama pujin man kemulian Dibata.

C. PENGKENAINA

Kai banci sirenungken arah kata Dibata enda:

1. Nggeluh tama pujin man kemulian Dibata

Ibas Kristus kita enggo ngaloken pasu-pasu si seh kal ulina bagi si enggo ndai ituriken arah das. Janah salah sada maksud ras tujuan Dibata kerna si e man banta eme gelah kita nggeluh tama pujin man kemulian Dibata. Uga kin kegeluhen tama pujin man Dibata? Kerna si enda banci sib aca tole ku pasal-pasal berikutna. Piga-piga hal iturikenna maka kita ngaloken keterkelinen e gelah kita ngelakoken perbahanen-perbahanen si mehuli (bd Ep.2.10). Bage pe kita idilo gelah ulanai nggeluh bagi manusia si ndekah si ngikutken kerincuhen dagingna tapi kita idilo gelah makeken manusia si mbaru si teridah ibas keleng ate, kebujuren, simehuli ras situhu-tuhu.

2. Paskah

Nats enda ijembaken gelah tole banci sirenungken erti Paskah man banta. Kekeken Kristus eme kekekenNa naluken kematen, IA nggeluh mulihi lako mereken jaminen geluh si mbaru ras kekeken kereina kita si tek man baNa. E maka Paskah tuju-tuhu jadi keriahen si mbelin man banta.

C. PENUTUP

Mari sirayaken Paskah alu nginget gelah keriahen Paskah enda tole mereken gegeh man banta lako tetap ncidahken kegeluhen si mpermuliaken Dibata.