SUPLEMEN PA MAMRE 14-20 AGUSTUS 2022, LUKAS 8:40-42a; 49-56
Teks : Lukas 8:40-42a; 49-56
Tema : Maba Anak Jabu Ku Tuhan
Tujun : Gelah Mamre:
1. Meteh maka dirina e me imam simabai jabu ku Tuhan.
2. Erkomitmen janah ndaftarken perbahanen-perbahanen maba anak jabu ku Tuhan.
1.Pengantar
Ibas bapa-bapa gereja menyetujui kerna penulis kitab Injil Lukas eme Lukas. Sekalak Teolog si tergelar Jhon Drane ngatakenca kerna Injil Lukas eme: Lukas eme penulis Alkitab ibas Injil Lukas bagepe Perbahanen rasul-rasul, janah amin lagia itulisken gelarna ibas kitab e, tapi penguasaan bahasa ras pengetahuanna kerna kekristenen mula-mula enda jadi bukti kuat.[1] Kekhasan Injil Lukas enda ibas menguraiken keselamaten ras kuasa alu tanda sengget ncidahken kerna focus Eskatologis nandangi kalak si erkiniteken. Janji ibas erpengarapen man Yesus mereken kesempurnaan ibas erkiniteken. Senina-senina Mamre si ikelengi Tuhanta Yesus Kristus, bahan PA ibas wari enda berhubungen ras HUT Mamre pe-27 ken, alu tema si sangat menarik eme MABA ANAK JABU KU TUHAN. Ibas penelitian arah Universitas Diponegoro Fakultas Psikologi ngatakenca, waktu si lt ibas jabu antara anak ras bapa na secara kuantitas lit denga si man pekenan, amin gia sekalak bapa si lit waktu ibas ia radu ras anak lenga memaksimalken kualitas. Artina waktu kebersamaan si kurang ras kebersamaan si kurang berkualitas[2]. Arah bahan nats ta enda mari man kita Mamre GBKP erlajar guna banci maba anak nggeluh ibas erkiniteken man Tuhan.
2. Uraian Teks/Tafsiren
Ibas Injil Lukas ncidahken pengajaren eskatologis sinuduhken perbedan ras penulis-penulis ibas Padan Simbaru sidebanna. Alu kata sideban, tujun utama ibas Injil Lukas eme berfokus ku universalitas, ija Dibata nggenapi janji-Na arah kalak sierkiniteken ibas peristiwa-peristiwa si unik, erkiteken si e lanai kemamangen adi focus eskatologis Lukas lit ibas pembenaren akhir nandangi kalak-kalak singaloken tanda sengget (Muzizat) alu perpadanen/janji siibelasken Yesus secara umum. Alu kekhasan eskatologi e, konsistensi padan Dibata seh kel teridah alu jelas arah cerita/narasi kitab Injil Lukas.
Bahan bacaan PA Mamre ibas wari enda labo secara lengkap ibahas, tapi secara penggalan narasi eme Lukas 8: 40-42a; 49-56. Hal enda nuduhken kerna peran Jairus siertanggung jawab ibas kekelengen ras kepate nandangi anakna sidiberu. Situhuna Narasi kerna anak Jairus bagepe sekalak diberu sindadap uis Jesus kerna sakit pendarahen (bluding), Narasi enda banci ka i bandingken ibas Matius 9:18–26, Markus 5:21–43. Injil Lukas alu jelas nuriken situasi ras keterangen si lengkap erkiteken ibas Injil Lukas mereken perhatian simbelin nandangi diberu. Kecibal ras situasi diberu subuk ibas sakit, seh ku perbahanen si memarginalken jadi tema si mewarnai tulisen Injil Lukas[3]. Kai siibahan Yesus e alu lit ibas istilah Pelayanan Kuasa (Power Ministry) eme pelayanen si mengandalken kuasa Dibata, bali ras siibahan Yesus alu dem kuasa ras nehken Kata Dibata/Firman si dem alu tanda sengget/Muzizat[4]. (Mat. 4:23; 9:35, 36; 10:1,7-8,; 11:5; 12:15, 18; 13:54; 15:30; 19:2; 21:14; Mrk. 1:38, 39; 2:2, 11; 3:14, 15; 6:12, 13; 10:1; Luk. 4:18; 5:17, 24; 6:6-11, 17-18;7:22; 9:1, 2,; 10:9, 13; 13:10-13, 22, 32; 14:4,7; 21:37; 16:15-18, 20, dan seterusnya) Kai siibahan Yesus e dem alu gegeh ras kuasa. Kata terjemahen alu bahasa (dunamin kai eksousian) siartina “kuasa erbahan mujizat.”[5] Wycliffe ngartikenca alu bahasa ; “tenaga merupakan kemampuan yang melekat pada Allah dan kuasa ialah hak untuk memakainya.”[6]
Ieteh Yesus me uga isi pusuh Jairus ibas paksa si e, ia sekalak kepala rumah pertoton agama Yahudi, tapi ia kalak si alu pengarapen si mbelin man Yesus erkiteken keleng ras tanggungjawabna selaku bapa nandangi anakna. Adi siperdiateken ibas ayat 49-50, bahasa siibelasken Yesus ije dem alu kuasa ras tanggungjawab nandangi kata sinibelaskenNa man Jairus. Bagepe Jairus lanai lit belas-belasna erkiteken ngukurken situasi anakna si ipeseh kalak simbaba berita e, ije igejapken Yesus uga pusuh si Jairus emaka kata pergegeh nandangi kiniteken Jairus ibelasken Yesus.
3. Aplikasi
Ibas situasi si lit ibas nats bahan PA ta ibas wari enda, Mamre GBKP banci mpedomani sosok Jairus. Erkeleng ate nandangi keluarga (secara khusus). Mamre ibas usia pe-27 ken jadi bapa itengah jabu si mediate man isi jabu, la ngukurken dirina jine. Man Mamre si nggo jadi bapa itengah jabu mpedomani kegeluhen alu erkemalangen man Dibata arah perbahanen, pengerana ras perukuren. Anggota jabu ermalem ate ibas sosok bapa si erkeleng ate, si mbabai isi jabu nembah man Dibata (band. Yosua 24:15). Mpetandaken Dibata man anak itengah jabu seusia dini. Sebab kiniteken eme bagin si penting ibas pertumbuhen anak, artina pembentuken karakter siibenaken ibas jabu nari, janah gereja jadi ingan aplikasi pembentuken karakter erkiniteken man anak.
Anak-anak eme generasi penerus ras “pusaka titipan” man orang tua. Ibas gereja, anak eme masa depan gereja. Ibas Alkitab melala mencatat maka Dibata mementingken anak-anak. Mulai zaman Musa (Keluaran 10:8-11), Yosua (Yosua 24:15) ras ibas zaman Yesus (Matius 18:10, 19:13-15). Nggo jadi tanggung jawab orang tua mbabai anak erkiniteken. Ula pelepas Gereja, Guru Sekolah minggu ngenca ngajari anak erkiniteken, orang tua harus me mbabai anak erkiniteken ibas jabu subuk ibas kegeluhena tep-tep wari. Jadilah Mamre favorit nandangi anak-anakna, ula sempat anak memfavoritken bapa kalak sideban ibas aplikasi erkiniteken, turah me kekecewan anak nandangi bapana. Mari man banta Mamre, jadi usihen, jadi idola man isi jabunta.
Pdt. Anton Keliat, S. Th-Runggun Semarang
[1] Marulak Pasaribu, Eksposisi Injil sinoptik (Malang: Gandum Mas, 2005), 170.
[2] Farida Hidayati, Dian Veronika Sakti Kaloeti, and Karyono Karyono, “Peran Ayah Dalam Pengasuhan Anak,” Jurnal Psikologi Undip 9, no. 1 (April 2011): 1–10
[3] Levine, Amy-Jill, ed. 2002. A Feminist Companion to Luke, Feminist Companion to the new Testament and Early Christian Writings 3.
[4] James I. Packer, “Kehidupan Kristen yang Diberi Kuasa” dalam Kebutuhan Gereja Saat Ini Kerajaan Allah dan Kuasa-Nya, J. I. Packer, at.al., (Malang: Gandum Mas, 2001), 255-256
[5] Hasan Susanto, Perjanjian Baru Interlinear Yunani – Indonesia dan Konkordansi Perjanjian Baru (Jakarta: LAI, 204), 322.
[6] Charle F. Pfeiffer dan Everett F. Harrison (Ed), The Wycliffe Bible Commentary (Malang: Gandum Mas), 244.
