SUPLEMEN PJJ TANGGAL 16-22 FEBRUARI 2025, 1 TIMOTIUS 6:20-21

“KEP-KEP ALU MEHULI”

1 Timotius 6 : 20 – 21

(Pengurus PJJ “Pemilihen, Kalak Si Jadi Pengurus”)

  

I. Kata Perlebe

Puji Tuhan ras si kataken bujur man Dibata sabab nggo terlaksana alu mehuli dahin pemilihen pengurus PJJ bas tahun si lewat. Bage kenca dung penangkuhen ras pengukuhen Pt/ Dk minter iumputi pemilihen pengurus PJJ. Kerina sektor bas runggunta nggo ngaturken ras ngelakoken pemilihen alu lancar ras dem keriahen. Janah nggo terpilih ras nggo ilantik pe senina turangta si jadi pengurus ibas sektorna masing-masing. La ngenca nggo terpilih jadi pengurus sektor tapi pe nggo erdahin ras aktif ndahiken dahin pelayanen. Ate Tuhan ras kita kerina maka arah PJJ-ta sekali enda, kerina pengurus PJJ-ta ibas sektorna reh sikapna bas ngepkep perpulungen si lit bas sektorna alu mehuli.                             

II.   Isi

Timotius e me teman sepelayanen rasul Paulus bas mberitaken Berita Si Meriah. Timotius la terjeng teman sepelayanen ras si nampati ngenca man Paulus tapi pe anak pertendinna. Paulus si ngajari ras ndidik ia uga ngelai perpulungen alu mehuli i Epesus bas ia nguda denga. Ieteh ras iangka rasul Paulus uga tantangen si lit bas ngelai i tengah perpulungen. Terlebih erkiteken litna pengajaren si papak si lit i perpulungen. Emaka guna mpersingeti ras mperlengkapi Timotius, rasul Paulus mereken suratna enda. Kata Dibata si jadi ogenta eme pedah perpudina si isehken Paulus bas suratna si pemena enda. Paulus ngajuk Timotius lako ngepkep perpulungen (kerina kalak si tek) alu mehuli. Enda me peempat kaliken Paulus nugasken Timotius lako ngepkep kiniteken perpulungen si nggo ipercayaken man bana (1:18-19; 4:6-11; 6:13-16; 6:20). Kata ‘ngepkep’ i jenda bas bahasa Junanina ertina “memelihara deposito”. Enda nuduhken sada kewajipen suci lako mengamanken milik si meherga si nggo ipercayaken man sekalak jelma. Berita Si Meriah (Injil) ras perpulungen Tuhan eme sekerajangen Dibata si meherga si nggo iendeskenna man Timotius selaku serayanna. Erkiteken si e Timotius wajib ras ertanggung jawab ngepkepsa. Paulus mpedahi Timotius gelah ola nggit ikut bas percakapen-percakapen si la erguna ras la ngena ate Dibata. Percakapen si imaksud i jenda eme percakapen kerna dongeng ras silsilah si turah tupung e (1:3-4). Ngerana ras ercakap kerna dongeng ras asal usul kalak Israel la kap erguna, la mehuli dingen la ngena ate Dibata. Jenari Paulus mpedahi Timotius gelah ola nggit ersoal kerna perkara-perkara si niakap kalak e “pemeteh” tapi si tuhuna labo. Kalak si erpengakap dirina erpemeteh enda me si imaksudken Paulus kalak si ngajarken pengajaren papak e. Pengajaren si papak enda erbahanca ia lanai tek man Jesus Kristus. Erkiteken si e Paulus ngajuk Timotius gelah ola nggit ersoal rassa. Gelah Timotius ngasup ngepkep perpulungen ni Tuhan alu mehuli bagepe pentar ia ngadapi tantangen si lit, rasul Paulus mereken pasu-pasu Dibata. Lias ate Dibata si rembak ras Timotius me si erbahanca ras mpengasup ia ngalanken ras ndahiken pelayanenna.

III.     Pengkenaina

1. Selaku pengurus bas bidang kai gia, arus maka ietehna kai si man dahin. Bageme pe selaku pengurus PJJ. Uga nina pengurus PJJ ndahiken dahinna alu mehuli ras sikap adi la ietehna kai dahin si man dahinna? Rikutken Tata Gerejata ras liturgi pelantiken pengurus PJJ isingetken kai-kai saja dahin pengurus PJJ. Dahin pengurus eme: 1) ngelakoken ras mengkordinir dahin persadan, kesaksin ras pelayanen. 2) Erbahan evaluasi, koordinasi ras komunikasi ras Pt/ Dk PJJ. 3) Ikut musyawarah ngawan.
2. Tema: “KEP-KEP ALU MEHULI”. Tuhan Jesus mindo man pengurus PJJ gelah ngep-kep kerina anggota sektorna alu mehuli. Umat/ kalak si tek man Tuhan Jesus eme erta Tuhan si mehergana. Majelis gereja ras pengurus si lit arus ngangka ras sedar maka perpulungen e erta Tuhan si seh kal ergana. Dibata ngendesken ertaNa si seh kal ergana e man pengurus. Erkiteken si e pengurus arus nggejapken maka dahinna e dahin si endesken Dibata man bana. Tek Dibata man pengurus emaka iendeskenna kulaNa man pengurus gelah ikep-kep alu mehuli. Sue ras gelarna selaku pengurus emaka iarapken tuhu-tuhu beluh ia ngurus/ ngep-kep. Arah dahin pengurus, kerina jadi terurus, labo sebalikna jadi la terurus piah dungna melus. Pengurus erdahin alu tutus, la banci mekarus.
3. Gelah pengurus banci ngep-kep (memelihara) alu mehuli, penting ras perlu kal pengurus njaga kinisersadanna ras Tuhan Jesus. Kiniersadanna ras Tuhan Jesus Takal Gereja mahanca ia megegeh ngep-kep sektorna. Nina Tuhan Jesus, “Kalak si tetap ibas Aku dingen Aku ibas ia melala me buahna; sabab adi la kin ras Aku labo kam ngasup erbahan kai pe” (Johanes 15:5b). Kiniersadanna ras Kristus erbahanca iangkana kai sura-sura ras si ngena ate Tuhan guna ilakokenna bas ngep-kep alu mehuli. Alu bage la sura-surana si ipejangjangna dingen ipelebekenna, tapi sura-sura Tuhan dingen perpulungen kerina. Kiniersadanna ras Tuhan tole erbahanca kiniersadanna sapih-sapih pengurus pe meteguh ras kompak. Ersada ia kerina mpemuliaken Dibata.  
4. Pengurus si mehuli eme pengurus si beluh njaga dirina dingen njaga kerina kalak si itetapken Kesah Si Badia si man kep-kepenna. Pengurus PJJ si mehuli ndauh ibas kiniganjangen ukur nari. Biak-biak Kristus eme perkeleng, perkuah, mehuli, mediate ras sabar lit ibas ia. Idahikenna dahin pelayanen alu kebujuren, alu pemeteh ras kepentaren. Tole ngelai ia alu penampat Kesah Si Badia, alu keleng ate si tuhu-tuhu, alu mberitaken si tuhu-tuhu, janah alu gegeh si rehna ibas Dibata nari (2 Korinti 6:6-7).
5. Pengurus PJJ si mehuli la terjeng reh ras ikut PJJ ngenca. Pengurus PJJ arus aktif ras kreatif uga gelah enterem si reh ku PJJ. Uga gelah meriah iakap kerina perpulungen reh bage rusur iukuri ras ibahanna. Pengurus PJJ jadi teladan si mehuli bas pengerana, lagu langkah, bas nehken keleng ate, bas kiniteken bagepe ibas ukurna bujur (bdk 1 Timotius 4:12). Ola sempat pengurus man urusen. Ola kal pengurus man daramen ras man iahen. Ola pernah jadi si ngep-kep man kep-keppen.

Pdt. Juris Tarigan, GBKP RG Bogor