SUPLEMEN PJJ TANGGAL 13-19 FEBRUARI 2022, ROMA 11:36

KERINA GUNA KEMULIAN DIBATA

(Roma 11:36)

 

PENARUH

Tema i bas PJJ-ta sendah e me “Kerina guna kemulian Dibata”. Tema enda akap kami seri ras salah sada semboyan i bas Gerakan Reformasi abad 16 - 17 i bas bahasa Latin nari e me Soli Deo Gloria. Semboyan enda ibuat i bas Roma 11:36 nari. Sope kita ngerana kerna semboyan Gerakan Reformasi enda ras kaitenna ras temata sendah, mari radu ras siorati, kai si imaksudken Rasul Paulus i bas suratna man perpulungen kalak si tek i kota Roma khususna Roma 11:36.

PENJELASEN BAHAN OGEN

Bahan ogenta sendah masuk ku bas perikop pendungi bindu 11 alu judul “Pujin man Dibata”. Sope perikopta enda, lit telu perikop si deban alu judul “Perkuah ate Dibata nandangi kalak Israel”; “Keselamaten bangsa-bangsa si labo Jahudi”; ras “Perkuah ate Dibata nandangi kerina manusia”. Arah telu perikop enda ndai secara garis besar Rasul Paulus mereken pengajaren kerna pokok iman Kristen e me pengajaren kerna keselamaten labo saja itujuken man kalak Israel tapi pe man kerina manusia. Perkuah ate Dibata labo terjeng man kalak Jahudi saja tapi pe man kerina kalak si tek man Dibata i bas Jesus Kristus. I bas si e Rasul Paulus ngajuk gelah kerina kalak si tek i kota Roma ersada, ula nari lit pembedaan-pembedaan kalak Jahudi entah pe labo Jahudi, kerinana lit i teruh perkuah ate Dibata.

Kenca dung pengajaren-pengajaren kerna pokok-pokok iman Kristen benaken bindu 1 nari seh ku bindu 11, itutup Paulus bindu 11 enda alu “Pujin man Dibata”. I bas pengajaren-pengajaren si isehkenna man perpulungen e ndai, Paulus pe merasa takjub, kagum, hormat man Dibata. E maka secara garis besar perikop enda nuriken kerna kekagumen Paulus erkiteken kepentaren ras mbagesna rencana-rencana bage pe keputusen-keputusen Dibata si luar biasa nandangi gerejaNa bage pe man isi doni. La lit ise pe si ngasup ngangkai rencana-rencana Dibata, tapi tek Paulus maka kerina rencana bage pe keputusen Dibata tujunna guna keselamaten kerina isi doni.

E maka i bas ayat 36 si jadi ogenta sedah, ngaku Paulus i bas kinitekenna maka kerina si nasa lit Dibata si njadikenca, janah kerinana e lit erdandanken IA dingen man gunaNa. Erkiteken si e ipuji Paulus Dibata seh rasa lalap. I bas terjemahen Alkitab TB-LAI nina, “Sebab segala sesuatu adalah dari Dia, dan oleh Dia, dan kepada Dia: Bagi Dialah kemuliaan sampai selama-lamanya!” I bas terjemahen Alkitab Bahasa Indonesia Masa Kini (BIMK) nina, “Allah menciptakan segala sesuatu. Semuanya berasal dari Allah dan adalah untuk Allah. Terpujilah Allah untuk selama-lamanya! Amin”.

PENGKENAINA

Mungkin rusur sibegi, kenca dung kita ngelakoken sada-sada pelayanen, lit si erbalas maka kerina si idahiken kita e guna puji-pujin ras kemulian man Dibata, labo guna puji-pujin ras kemulian man dirinta. Memang payo, i bas kita kalak si enggo ngaloken keselamaten alu kinitekenta man Yesus Kristus, tek kita maka kerina si ialoken kita e me erkiteken perkuah ate Dibata nari, e maka kerina si ilakoken kita pe tujunna guna kemulian gelar Dibata.

Salah sada semboyan Gerakan Reformasi abad 16 - 17 bahasa Latin nari, e me, Soli Deo Gloria. Semboyan enda merupaken sada pengajaren Johanes Calvin guna melengkapi ajaren Martin Luther e me hanya dengan iman entah pe Sola Fide. Soli Deo Gloria ngajuk kita gelah labo saja beriman secara pasif, hanya dengan iman kita menerima keselamatan (Sola Gratia). Tetapi lebih asangken si e, iajuk kita gelah beriman secara proaktif, ngelakoken kerina si mehuli guna Soli Deo Gloria. Kerina si mehuli e ndai sumberna e me Pustaka Si Badia nari entah pe Sola Scriptura.

I bas PJJ sendah, iajuk kita gelah mengevaluasi diri sendiri bage pe pelayanenta i gereja. Apakah kita termasuk kalak si belum selesai dengan diri kita sendiri? Masih belum selesai dengan diri sendiri maksudna, masih haus pengakuan, masih haus sanjungan entah pe pujian, kita siakap si hebatna, kita siakap satu-satunya ingan penggurun, rsd. Adi lit dengan i bas kita, mari radu ras kita bertobat. Mari sirenungken pengakun Rasul Paulus kerna kerinana guna kemulian Dibata. Gelah kai pe si ilakoken kita, baik i gereja, i rumah, i bas pendahin, ras i japa pe kita, kerinana tuhu-tuhu guna kemulian Dibata. Gelah arah kehadirenta i japa pe, kalak si jumpa ras kita jumpa ka ras Dibata i bas Yesus Kristus.

Adi sikaitken ras Tema tahun 2022 GBKP e me “Kreatif merawat lingkungan”, kai si ikataken Paulus i bas Roma 11:36 enda, banci jadi sada pengajuk man banta kerina gelah tuhu-tuhu serius merawat lingkungen alam si lit i sekelewetta. Sebab lingkungen alam si lit i sekelewetta e me Dibata si njadikenca, janah kerinana e lit erdandanken IA dingen man gunaNa. Kepedulianta nandangi alam sekitar si enggo nandangi ceda total enda harus ibenaken alu pertobaten i bas dirinta. Ngaku kita maka sedekah enda la kita peduli sama sekali nandangi alam sekelewetta. Kenca kita ngaku salah ras ertobat, mari siperobahi mindset, pola pikir, entah pe wawasen kerna alam sekelewetta. Je nari maka mari sibenaken ngelakoken kerina si mehuli guna kelestarian alam sekelewetta, umpamana, mengurangi penggunaan plastik, mengurangi penggunaan kendaraan bermotor, hemat penggunaan air, rsd.

Mari sitadingken keegoisenta si mengikat kita ngelakoken kerina hal guna kepentingen diri sendiri. Mari sibenaken peduli nandangi alam sekelewetta alu tindaken-tindaken konkrit si kerinana guna kemulian Dibata. Ertoto kita gelah Dibata si mpegegehi kita.

Pdt. Larena br. Sinuhadji - GBKP Rg. Cikarang