PEKAN DOA GBKP TAHUN 2023 WARI VI, JOHANES 14:13-14

Invocatio :

”Emaka ertoto Abraham kerna Abimelek, emaka ipepalem Dibata ia. Bagepe ndehara Abimelek ras budakna si diberu ipepalemNa kerina janah enggo ka banci mupus.” (Kejadin 20 : 17b)

Tema : “Pertoton Si Jadi Pasu-Pasu man Kalak Si Deban.”

(Johanes 14 : 13-14)

1. Kata Perlebe

Menai renungenta Pekan Doata berngi peenemken enda, perlebe mari ras kita rende KEE 332:1

Totota begikenNa; Keleng ateNa kita.

Ertoto isuruhNa;     Em si ngena ateNa.

Arah ende-endenta ngataken man banta maka TUHAN Dibata megiken toto anak-anakNa. Totota ibegikenNa erkiteken keleng ateNa kita, keleng ateNa doni enda. Ertoto bekas persuruhen Tuhan jine kap. Ertoto ras mpenangkih toto e me perbahanen si ngena ate Dibata. Guna banci ras seh kita jadi aron Dibata si jadi pasu-pasu man doni enda, salah sada carana eme arah ertoto. Uga kin pertoton si jadi pasu-pasu man kalak si deban? Mari erlajar kita kalak/ tokoh bas Pustaka Si Badia.

2. Renungen/ khotbah

Rasul Paulus seh i pulau Malta erkiteken kapal si inangkihina kandas ras pecah. Ia seh i Malta tupung bas perdalanen ku Roma. 3 bulan dekahna Paulus ras rombongen tahanen i Malta. Lit 2 tanda sengget (mujizat) si terjadi tupung Paulus i Malta. Sipemena, tupung Paulus itagut nipe upar si erbisa. Iakap kalak si tading i pulau maka ugapa pe besar nge daging Paulus jenari mate me erkiteken bisa nipe e. Tapi kenca piga-piga dekah itimai, Paulus sehat-sehat saja, la kadena pe mesui (ayat 3-6). Tuhu payo bagi si ikataken Tuhan Jesus nina, “Adi icikepna nipe ntah inemna racun labo kaden pe ia. Itamakenna tanna ku babo kalak sakit, malem penakit e” (Markus 16:18). Sipeduaken, bapa Publius ipepalem bas sakit demam ras disentrina nari (ayat 8). Rasul Paulus ngidah bapa Publius si la tersinget gelarna enda sangana ampar ibas ingan medemna erkiteken sakit. Erkiteken si enda idahi Paulus ia ku kamarna. Ertoto Paulus man Dibata janahna namaken tanna ku ku babo si sakit e. Ulihna malem ia. Kenca si enda enterem kalak si sakit i pulau Malta e ndahi Paulus janah kerina ipepalem Paulus. Luar biasa Dibata make Paulus lako mpepalem kerina kalak si sakit e. Erkiteken si enda melala pemere ras penampat ibereken kalak pulau Malta e man Paulus ras rombongenna tupung ia tading i je bagepe muatna lawes nerusken erlayar.    

Abraham pe nggo nuduhken uga ia jadi pasu-pasu man Abimelek, keluargana budakna ras kerina kalak terutama diberu-diberu si lit ibas istanana (Invocatio ibas Kejadin 20:17). Tupung e ibuat raja Abimelek si Sara jadi ndeharana. Enda ilakokenna erkiteken Abraham ngataken maka Sara turangna. Erkiteken si enda adi la ulihken Abimelek si Sara man perbulangenna Abraham mate me ia iban Dibata. Tole erkiteken si ndai maka ndeharana, kerina diberu subuk ibas istanana bagepe budakna si diberu lanai banci mupus. Kenca iulihkenna Sara, jenari kenca ertoto Abraham man Dibata kerna Abimelek, malem ia. La ia ngenca malem tapi pe ndeharana, ras kerina budakna si diberu pe janah nggo ka banci mupus. Dage, peroton anak-anak Dibata, suruh-suruhen Tuhan bagi Abraham ras Paulus jadi pasu-pasu man kalak si deban.    

3. Pengkenaina/ aplikasi

• Tema: “Pertoton Si Jadi Pasu-Pasu Man Kalak Si Deban”. Ertoto persuruhen Dibata dingen si ngena ateNa kap. Ertoto e cara penembahen man Dibata. Arah ertoto kita jumpa, ersada dingen ercakap ras TUHAN. Marilah selaku kalak si tek, si jadiken ertoto jadi orat nggeluhta tep-tep wari. Tuhanta Jesus jine pe ertoto dingen nuruh ajar-ajarNa gelah ertoto (Luk. 5:16; Mat. 7:7). Jenari Paulus nerusken dingen negaskenca. Ia ertoto man bapa Publius (palas khotbah).
• Arah ertoto kita jadi pasu-pasu man kalak si deban. Si enda jadi adi totota la berpusat man banta saja. Toto si payo la man gunata ras jabuta saja. Tapi uga kita penangkih sapaat, pemindon, pertoton ras pengataken bujur man Dibata guna kerina manusia (bdk. 1 Timotius 2:1). Emaka mari si biasaken notoken kerina kalak si sakit gelah malem; serayan tetap setia ras ergiah-giah ngelai; saitun tetap semangat, Mamre jadi imam si paguh, Moria jadi tiang doa, permata si lenga dat dahin ras jodoh; KAKR gelah mbiar ras mehamat man TUHAN; bangsa ras negara gelah aman, tentram; pemerentahta ndalanken kebujuren ras keadilen; bagepe doni gelah dame ndauh bas krisis nari, rst. Pertoton si bagenda pasti jadi pasu-pasu man kalak si deban. Arah pertoton enterem kalak ipegegehi ras jadi kalak si tek.
• Ertoto e me kesah pertendin. Bagi erkesah la banci ngadi, bageme pe ertoto. Ngadi erkesah ngadi nggeluh. Ngadi ertoto ngadi ntah pep e mate pertendinta. Emaka payo kal nina Kata Pustaka, “Ertotolah katawari pe” (1 Tes. 5:17). Ertoto la tupung meriah, senang, aman ras bagi ukur ngenca. Paulus tupung terdampar kapalna pe ertoto ia guna kalak si deban si perlu itungkat alu toto.
• Paulus la ertoto man bapa Publius ngenca tapi pe man kerina kalak si sakit i Malta. Abraham pe la ertoto man raja Abimelek ngenca tapi man budak pe. Kita pe bage. La man pejabat ras si erpangkat ntah orangtuana, kade-kadena ngenca kita ertoto. Tapi pe man perpulungen biasa ras sederhana ras kalak si deban.
• Kerina kalak butuh toto ras itotoken. Emaka enterem kalak mindo dukungen toto. Emaka mari si ban tim doa bas sektor ntah runggunta. Tim doa e me salah sada bentuk pelayanen guna numpak ras nungkat pelayanen. Tim doa labo terpisahken bas kerina tim-tim si lit bas pelayanen gereja.

Pdt. Juris Tarigan, GBKP RG Bogor