SUPLEMEN PEKAN PENATALAYANAN GBKP TAHUN 2023-WARI I

Invocatio : “Ije me Aku ringan ras ia; Aku jadi Dibatana, ia jadi bangsaKu” (Esekiel 37:27).

Ogen       : Epesus 2 : 19 – 22

Khotbah  : Ulangen 7 : 6 – 11

Tema       : “Iserapken Jadi Sekerajangen Tuhan”

---

 

 

 

Kata Perlebe

Shalom ras mejuahjuah man banta kerina. Bujur ninta man Dibata Bapa ibas Tuhanta Jesus Kristus si nggo naruhken kita seh ku tahun si mbaru 2023. Gelah geluhta tetap mehuli, ratur ras tertata guna si layanken bagi si ngena ate Tuhan ibas tahun enda pe, emaka bengket me ku Pekan Kebaktin Penatalayanenta. Si baba dirita ras isi jabuta ku “bengkel” pertendinta arah Pekan enda lako mpekena dirita ningtang ija perlu segelah sikap ndahiken dahin pelayanen. Perlebe, arah wari/ berngi pemena enda, mari si pepayo dirita selaku Gereja. Dirita eme Gereja kap. Mari si siksiki kai kin ertina, gunana ras maknana gereja segelah ernanam sue ras tema umum Pekan Penatalayanenta.

Isi/ Penjelasen

Ul. 7:6-11 si jadi palas kotbahta nuriken kerna bangsa Israel si ipilih Dibata. Dibata milih Israel dingen nerapkenca jadi sekerajangenNa ibas kerina bangsa-bangsa i doni enda nari. Arus jelas dingen tangkas iangka bangsa Israel bahwa ia ipilih Dibata labo erkiteken teremen ia asangken bangsa-bangsa si deban nari. Justru ia me bangsa si kitikna (ayat 6, 7). TUHAN jadiken bangsa Israel jadi bangsaNa si khusus labo erkiteken gegehen ia asangken bangsa si deban. TUHAN milih ia dingen nerapkenca jadi sekerajangenNa erkiteken keleng ateNa. TUHAN ngkelengi Israel ras nehken padanNa si ndube isehkenNa man nini-nina kalak Israel eme Abaraham, Isak ras Jakup. TUHAN nelamatken Israel arah mbebasken ia ibas perbudaken Mesir erkiteken keleng ateNa. TUHAN nelamatken Israel alu kuasaNa si mbelin (ayat 8). Erkiteken si enda kalak Israel arus nginget ras ngeteh bahwa TUHAN e ngenca Dibata si setia. Ia tetap ncikep padanNa, janah icidahkenNa kekelengenNa si tetap man meribu-ribu kalak si engkelengi Ia ras ngikutken undang-undangNa (ayat 9). Tapi man kalak si la engkelengi Ia, si ernembeh ate man baNa, alu la ralang-alang iukumNa (ayat 10). Erkiteken si e ipindo ras iajuk Musa bangsana gelah ngikutken TUHAN alu ngikutken undang-undangNa (ayat 11).  

Arah ogenta Epesus 2:19-22 icidahken ras ituriken uga kalak si labo Jahudi banci ersada ras Dibata dingen ersada ras bangsa pilihen Dibata. Kalak si la Jahudi ersada ras Dibata erkiteken tek man Kristus dingen ersada ras Kristus. Kalak si ersada ras Kristus lanai ia kalak asing/ pertandang. Kalak si ersada ras Kristus gundari nggo jadi sewarga ras anak-anak Dibata eme kalak Israel. Ia nggo seri ras bangsa pilihen Dibata (bdk. 2 Korinti 5:17). Ia pe nggo jadi anggota keluarga Dibata (ayat 19). Kalak si labo Jahudi si nggo tek ras ngaloken Jesus Kristus pe ipajekken i babo palasa si itamaken rasul ras nabi-nabi janah Kristus jine palas persukina. Jalak si labo Jahudi pe isusun jadi Rumah Pertoton si badia erkiteken persadanna ras Kristus.

Ibas persadanna ras Kristus, kalak si labo Jahudi ras kerina kalak si deban iranggut jadi sada rumah eme Rumah Pertoton janah Dibata ringan ibassa alu KesahNa (ayat 20-22). Enda sue bagi si ikataken ibas Esekiel 37:27 (invocatio), Tuhan ringan i Rumah Pertoton ras bangsana Israel. Kai si inubuatken Esekiel nggo genep arah kegeluhen Gereja.    

Pengkenaina ras Kata Penutup

• Nina sekalak filsuf, “Tandailah bandu.” Kata si gendek enda seh kal perluna ras pentingna. Seh kal mendasarna ras pentingna nandai dirita, ise kita gelah ola kita sempat lupa diri. Alu nandai dirita me maka si eteh ras si sedari ise kita, ise si nepa kita, ija nari kita, kai tanggung jababta, kai si arus si bahan ibas geluhta ras kai tujunta. Tentu la ngenca nandai dirta selaku manusia, tapi seh pe ku penandaita dirita selaku Gereja eme kalak si tek ras nggo ersada ras Tuhan Jesus. Perlebe secara pribadi, jenari secara ras-ras ntah pe perpulungen.

• Tema: “Iserapken Jadi Sekerajangen Tuhan.” Arah Kata Dibata si tersurat ibas Pustaka Si Badia, si tandai dirita selaku kalak si nggo iserapken (ipebadiaken) jadi sekerajangen Tuhan. Labo kita si nerapken (yang memisahkan dan mengkhususkan)dirita. Tuhan jine si nge nerapken kita gelah kita nggeluh jadi sekerajangenNa. Kita si ndube ndauh ibas Dibata nari, la badia, melket erkiteken erdosa nggo rembak ras ipebadiaken arah Kristus erkiteken kinitekenta. Kita ipilih ras iserapken labo erkiteken gegeh, beluh ras pendahinta tapi erkiteken lias ras perkuah ateNa (Ep. 2:8). Labo kita si milih Tuhan Jesus tapi Ia nge si milih kita janah nuruh kita lawes gelah erbuah meramis, eme buah si tahan rasa lalap (Joh. 15:16a). Erkiteken Tuhan Jesus si nerapken kita jadi sekerajangenNa emaka geluhta arus sue bagi rancangen ras peraten Tuhan Tuhan si nerapken kita. La banci bagi atetata apai ka ate-ateta saja si ban. La banci peratenta si pejangjang.

• Kita iserapken labo guna nggeluh serap-serap, nggeluh nerapken bana. Kita iserapken labu guna nggeluh mengisolasi diri (ekskusif). Bagepe kita iserapken labo guna gengsi ras kebanggaan diri. Kita iserapken gelah ola seri ras doni. Kita iserapken jadi sekerajangenNa, jadi perkakasNa, jadi saksiNa lako mberitaken perbahanen-perbahanen Dibata si mbelin (1 Pet. 2:9). Kita iserapken lako jadi sira ras terang man doni enda (Mat. 5:13-15). Kita iserapken gelah mereken nanam si entebu ras erguna man doni enda. Gelah geluhta ernanam si mehuli desken tengguli ku bas perpulungenta. Nggo nge kita mereken nanam si payo ras si entebu sedekah enda? Nggo nge kita mereken nanam si ntabeh dingen melam ku bas sekelewetta? Nanam si apai si lebih menonjol bas kita: nanam ntabeh ras melam; ntah nanam si macem, nanam mali-mali? Mari si pepayo ras si pergermetken kegeluhenta sedekah enda.

• Si sedarilah alu mbages maka kita enda iserapken, ikususken Dibata jadi sekerajangen Tuhan. Ola kari seri si akap dirita ras doni enda. Ola la lit ndobahna kita ras si la iserapken Tuhan. Kita selaku Gereja lit erkiteken Kristus. Gereja la mahan bana (dengan sendirinya) lit. Tapi Gereja tubuh ras lit erkiteken dareh Kristus si mambur guna kita. Gereja lit erkiteken belinna keleng ate Dibata man banta manusia perdosa. Emaka ola kal kita Gereja lupa nangdangi si mpetubuh kita eme Kristus. Ola kari bagi kuan-kuan, “Lupa kacang akan kulitnya.” Gereja la banci lupa man Jesus Kristus selaku Takal/ Kepala Gereja. Gereja arus patuh ras mehamat man Tuhan Jesus erkiteken kekelengenNa si nggo leben isehkenNa (bdk. Ep. 5:22-24).

• Dage, alu tetap nandai diri ras nginget dirita nggo iserapken jadi sekerajangenNa me maka sedar kita ras si angka kai si arus si bahan. Nandai dirita sekerajangenNa mpengasup kita tetap ersada ras Tuhan Jesus. Ersada ras Tuhan Jesus me si erbahanca geluhta mereken buah si meramis, buah si ernanam entebu ras malem ate, amin.

Pdt. Juris Tarigan, MTh

GBKP Rg Bogor