SUPLEMEN PEKAN KELUARGA GBKP WARI II, KHOTBAH 1 KORINTUS 7:12-14
Invocatio : O Israel, Kubahan kam jadi ndeharangKu; Aku tetap setia manbandu; Kucidahken bandu kekelengen ras perkuah ateKu rasa lalap kam sikerajangenKu. (Hosea 2 : 19)
Ogen : Maleakhi 2 : 15 – 16
Tema : Jabu sikerajangen Dibata Kap
1. Jabu/keluarga eme sada kekerabaten si sangat mendasar si isina eme perbulangen ndehara ras anak-anak. Adi nulih kita kubas kitab Kej. 2: 18 – 25 banci si ertiken maka jabu e turah erkiteken inisiatif Dibata, alu bage jabu e eme sikerajangen Dibata.
Terdauhen jabu e ikataken sikerajangen Dibata adi kerina isi jabu e ngelakoken/ndalanken kai si ngena ate Dibata, bagi si ikataken Josua ibas Jos 24:15…..”Tapi adi aku ras isi jabungku, TUHAN saja ngenca isembah kami”.
GBKP ibas konvesina ngataken jabu/perjabun eme “anugrah Allah” si arus I respon alu komitmen ras kesetiaan ras konsekwensi si icidahken ibas cara ras sikap nggeluh memelihara ras menjaga kebadiaan perjabun, eme monogamy ras la banci isirangken pala alu kematen.(mat.19:6)
Jabu sinembah man Tuhan ikataken pe miniature/model keluarga Dibata ibas doni enda, si jadi sumber insfirasi/usihen man jabu/keluarga si deban, ras pe jadi ingan guna pebelangken kerajaan Dibata. Ibas konvesi GBKP Ikataken melalui kehidupan perkawinan orang percaya, menjadi kesaksian bagi sekitarnya sehingga semakin banyak orang yang menyaksikan karya keselamatan Allah dan memuliakannya. Perkawinan orang percaya kiranya dapat menjadi contoh bagi masyarakat dalam membangun peradaban dan kehidupan keluarga serta komunitas Dimana ia berada.
2. Bahan PKK enda merupaken nasihat rasul Paulus gelah jabu e jadi si kerajangen Dibata. Nasihat e si isehken kempak:
- dilaki-entah diberu si lenga erjabu, (1 – 7)
- si la erjabu, duda entah pe janda, (8,9)
- si enggo erjabu (10 – 11)
- Ayat 12. Ikatken man kalak si deban. Kata man kalak si deban enda secara umum I ertiken 1. Man kalak si erjabu beda agama
- Man kalak si enggo erjabu si ndube la nandai Dibata (lenga Kristen), tapi erkiteken pendahin pelayanen Yesus bage pe rasul-rasul maka sekalak ibas jabu e enggo jadi kristen
Tapi secara umum erti sipeduaken enda me si imaksutken Paulus, amin gia lit kange si makeken erti si pemena sebage dasar ibas ngaloken kalak si erjabu bedas agama.
Khusus man jabu si ibas pengertin si peduaken (adi bas istillah GBKP Jabu si sembelahen)
- Perbulangen Kristen, ndehara lenga … ola I ulihken
- Ndehara Kristen, perbulangen lenga….. ola mindo mulih (13)
Man duana kondisi enda nasihat Paulus, tetap nggeluh ras ia, alu empertegas sada misi/tugas guna mbabai gelah jabu e jadi si kerajangen Kristus. (14)
Bandingekn ras 1 kor 9:19- 22
- Aku bebas nge; aku labo budak ise pe. Tapi kujadiken diringku jadi budak nandangi kerina jelma gelah banci nterem kalak dat aku guna Kristus. 20 Nandangi kalak Jahudi bagi kalak Jahudi aku guna ndatken kalak Jahudi. Bagi ia patuh man Undang-undang Musa, aku pe patuh man Undang-undang e, gelah banci ia dat aku, aminna pe aku labo i teruh Undang-undang e. 21 Bage me pe nandangi kalak si la lit i bas ia Undang-undang Musa, bagi ia e ka aku, gelah banci ia dat aku. Si enda labo nuduhken maka la aku i teruh Undang-undang Dibata, sabap si tuhuna aku i teruh Undang-undang Kristus. 22 Nandangi kalak si merampek kinitekenna, bagi ia e ka aku, gelah kudat ia. Aku enggo jadi bali ras kerina kalak rikutken paksana gelah banci deba-deba ia kuselamatken alu kerina dalan si payo.
Si enda ilakokenna alu tujun gelah banci nterem kalak dat aku guna Kristus. Adi bas Bahasa Indonesia ikataken supaya aku dapat memenangkan mereka
Perbulangen si Kristen memenangkan ndeharana gelah jadi Kristen, ndehara si Kristen memenangken perbulangenna gelah jadi Kristen.
Cataten, enda perlu hati hati ula kari nuate memenangken tapi justru di menangken, nuate ndatken, tapi idatken kalak, ate nidingi, piah kena siding
Uga carana ?
Alu tetap setia, la ngelanggar perpadanen encidahken kekelengen ras perkuah ate, alu encidahken perbahanen si mhuli bagi nina yesus ibas Matius 5:16 Dage, ersinalsal lah min terangndu i lebe-lebe kalak si nterem gelah adi idahna perbahanenndu si mehuli, ipujina Dibata, Bapandu si i Surga.” (invocatio/Ogen)
3. aplikasi
- Adi siperdiateken kecibal geluh jabu perpulungennta khusus ibas peran serta jabu ibas kegiaten gereja, secara umum, buen moria asang mamre, sitotoken gelah moria ngasup memenangken mamrena guna kristus.
- Jabu-jabu ngawan GBKP ibas keaktifen berkisar 30 – 40 % denga, uga banci jabu si 30 – 40 % memenangken jabu si 60 – 70 %
\- rsd
Pdt. Maslan Sitepu-Runggun Bandung Barat
