MINGGU 15 MEI 2022, KHOTBAH KELUARAN 15:19-20
Invocation :
Ersurak aku dem keriahen janahku ngendeken ende-enden pujin man baNdu. Geluhku rende ersurak sebab nggo aku ipulahiNdu (Masmur 71:23)
Ogen :
Ketangkasen 4: 8-11
Tema :
Rendelah Man Tuhan
1. KATA PERLEBE
Ngenanami keriahen ibas kegeluhen tentu jadi pengarapen ras perayaken kerina manusia. Erbage-bage upaya ras perjuangen ilakoken guna ndatken ras ngenanmisa. Tapi ibas kinatana megati kal keriahen situhu-tuhu e la idat ras la inanami. Melala penyebabna, tapi tentuna e ndeher kal hubungenna ras kedewasaan siteridah arah kedewasaan sesekalak jelma ibas natap, ngalaken ras mengelola kenyatan-kenyataan kegeluhen enda. Lit kecenderungen manusia menuduh factor luar dirina sijadi penyebab maka la akapna meriah nggeluh, umpamana: kalak sideban, situasi ekonomi, situasi keluarga ras sidebanna. Sehubungen ras sienda menarik akap kami guna ras-ras kita ngerenungi sada ungkapen nina, “ise pe ras kai pe labo ngasup erbahan atendu mesui, kecuali kam nggit”. Ungkapen enda tentu ngerana kerna kematangen diri, kemerdekaan diri ibas ndalani kerina situasi kegeluhen enda.
2. TAFSIRAN/ISI
Mari dage, erpalasken kata Dibata si man oratenta tole sigargari pelajaren sibanci sidat ras sipakeken sehubungen ras situasi kegeluhen:
A. Khotbah
Bahan khotbahta ende-enden Miriam enda ilatar belakangi Keluaren 14 sinuriken sada situasi bahaya sidem kebiaren siiperhadapken man kalak Israel. Secara manusia nggo dalan buntu lanai lit pengarapen pulah ibas kiniseran e nari, kematen seh me. Sebab tupung kalak Israel nggo seh itepi Lawit Merah, itunduk tentera Mesir me kalak Israel e. Tentera Mesir dem alu gegeh baik secara jumlah bagepe secara peralaten, sedangken kalak Israel selaku bangsa simbaru pulah ibas perbudaken nari labo lit persiapen erperang terlebih pe ije kange pernanden ras anak-anak bagepe asuh-asuhen. Adi kiam kulebe enggo jumpa lawit simbelang, sedangken arah pudi nari nggo reh tentera simegegeh. Emaka wajar she kal biarna kalak Israel janah nderkuh ia kerina (Kel. 14:9-10). Isalahken kalak Israel e pe Musa selaku pemimpinna (ay 11-12).
Tepi kerina situasi e justru ipakeken Tuhan guna tole mpetandaken diriNa alu ncidahken kuasaNa nelamatken kalak Israel bangsaNa e. janah enda me siituriken Miriam arah nde-ndenna ( Kel 15:19) ras ngajuk kalak Israel rende muji Tuhan. Turi-turin enda ncidahken kepeken istilah dalan buntu e hanya berlaku man manusia, tapi iadepen Dibata la lit dalan buntu. La ersibar kuasa Dibata mbuka ras erbahan dalan guna nelamatken kalak sierlebuh man baNa.
B. Invocatio
Masmur 71:23 ngerana kerna ersurak alu dem keriahen janah rende man Tuhan. Menarik adi sioge Masmur 71 enda secara utuh, siidah maka ungkapen bas ayat 23 kerna ersurak alu dem keriahen labo erkiteken kerina situasi kegeluhen bagi ukur entah bagi siniarapken. Pemasmur nuriken piga-piga kecibalna, eme: daging enggo metua, gegeh enggo kurang ras erbage perbeben siinanami kalak sienggo metua (ay 9, 18), lit kalak jahat sierkuasa si mengancam kegeluhenna, lit imbang siersura-sura mbunuh ia, lit kalak si nggombangi ia (ay 4, 10, 11). Kai dage sierbahan pemasmur ngasup ersurak bagi siturikenna ibas ayat 23? Jabapenna eme pertotonna man Tuhan, inganna nuriken kerina kecibalna/perbebenna, ijadikenna Tuhan inganna cicio si aman, tetap inget-ingetna kiniulin Tuhan sienggo nanamina ras tetap ipelimbaruina penandaina nandangi Tuhan. Perbahanen sienda me sierbahannsa pemasmur ngasup rende ersurak muji Tuhan, sebab tangkas idahna ras igejabkenna uga hulina ras bujurna Tuhan. Tuhan pe simere kemenangen man bana ibas gegehna sienggo kurang.
C. Ogen
Salah sada hal simegati ngambati ras nangko keriahen nggeluh idoni enda eme erkiteken bas sada sisi leket kal ukur nandangi daya tarik doni enda, sedangken bas sisi sideban bayang-bayang kematen ncinepi manusia. seh maka rehna kematen itatap sebagai hal si la maba keriahen ras la menguntungken. Tempa alu rehna kematen, kerina pencapaian keberhasilen idoni enda jadi sia-sia. Tapi bahan ogenta, arah pengenehen Johanes, ipetangkas uga kin suasana i surga ras kai kin dahin ije. Ipetangkas sada suasana si meriah suari berngi la erngadi-ngadi rende muji Dibata (ay 8). Ende-enden pujin ipenangkih guna mpehaga ras ngataken bujur man baNa singgeluh rasa lalap seh rasa lalap, penandai ras uga perbahanen sipayo man Dibata pe ipetangkas ( ay 9-11).
Arah pengenehen Johanes enda mengubah pemahamen ras penatapta nandangi kematen. Kematen kalak sitek justru sada dalan guna nadingken kegeluhen idoni si dem keguluten guna bengket ku kegeluhen sidem keriahen. Kegeluhen kalak sitek labo kepe ngadi ibas doni enda alu kematen, tapi justru kematen jadi awal kegeluhen sidem keriahen ras Tuhan i surga.
III. PENUTUP
Arah teluna bagin kata Dibata siiorati kita lit piga-piga perenungen, eme :
- Ibas perdalanen kegeluhen banci saja lit paksana kita iperhadapken kubas sada situasi sulit si tempa lanai isepe singasup nampati. Tapi siidah maka arah bahan Khotbahta icidahken tuhu-tuhu kap Dibata e la ersibar kuasana erbahan dalan termasuk ibas situasi si paling sulit pe.
- Aminna lit gia perbeben tah uga gia bentukna, pengendesen man Tuhan arah pertoton erbahan tetap kita ngasup ermeriah ukur bagi siinanami pemasmur bas ogenta.
- Kematen siipahami manusia secara umum sebagai sada peristiwa si dem alu ceda ate, arah ogenta justru ipetangkas jadi sada dalan guna ngenanami keriahen ras Tuhan.
Arah teluna bain kata Dibata enda ibabai ras ipengasup kita mewujudken temata “ Rendelah man Tuhan”.
Salam dari Tambun
Pdt Pribadi S Meliala-Rg. Tambun
