Minggu 21 Januari 2019, Khotbah Markus 1:21-28

INTROITUS :

Alu sora megang nderkuh ia nina, “O Jesus Anak Dibata si Meganjang. Kuga ateNdu aku ibahanNdu? Ibas gelar Dibata kupindo maka ula aku isiksaNdu.

”(Mark 5 : 7)

O G E N :

Masmur16 : 1 – 11

Tema :

Jesus si Badia erkuasa

1. Kata Perlebe
Minggu-minggu Epiphani seri ras pengangkan teofani nuduhken ras ncidahken kuasa Dibata siteridah ibas Jesus, selaku Anak ni Dibata si enggo tubuh kudoni nggeluh radu ras manusia. Jesus si reh kudoni dem alu kuasa bali ras Dibata sierkuasa (Pil 2:6; bdk.Mat 28:18; Rom 1:4). KuasaNa e nelamatken ras mereken kegeluhen man manusia. Mulahi kalak ibas dosa dingen mbebaskan ibas tabanen kuasa-kuasa sijahat nari. Kuasa Dibata sierdahin ibas Jesus ngasup naluken kerina kuasa-kuasa si lit, erkiteken Dibata mereken kuasa siMeganjangna man baNa. (Pil 2:9). E maka aminna gia Jesus tubuh selaku manusia tapi tetap Ia badia sabab Anak Dibata kap Ia. Kinibadian Dibata tetap teridah ras erdahin ibas Jesus aminna gia Ia reh kudoni enda ingan si la badia. Jesus Anak Dibata sibadia labanci lang arus ngalaken kuasa-kuasa si la badia kuasa si ncedai sibiakna erlawanen ras biak kuasa Dibata sibadia e.

Kuasa si igelari “dynameis” (Yunani) e me “tanda” si lit ibas Jesus si ncidahken gegeh kuasa Dibata sierdahin ibas Jesus. Tanda kuasa sierdahin e nggeluh ibas Jesus dingen ipetangkas ndarat ibas Jesus nari kutujun entahpe sasaran ija tanda kuasa e erdahin bertindak (action). Tanda e nuduhken ise kin situhuna Jesus si la bali ras imam-imam ras guru-guru agama Jahudi. Jesus jine si lit tanda kuasa e man baNa. Emaka nina kalak asum ngidahsa kai siibahan Jesus ikatakenna, “kai kin enda ndia?”; “Pengajaren simbaru?” Kemamangen ia kerina sabab langa kin pernah idahsa kuasa sierdahin bagi si isaksikenna ibas perbahanen Jesus.

2. Isi Teks
Kuasasi lit ibas Jesus tujunna guna nelamatken manusia. Erbage-bage kecibal geluh manusia si arus ndatken keselamaten ibas Jesus nari. Maka Dibata nuruh AnakNa e guna ndahiken dahin keselamaten ibas doni enda. Erkiteken si e ibas Injil sinoptik buen icidahken kuasa Jesus sinelamatken jelma sienterem alum pepalem ibas pinakit nari arah kuasa sierdahin ibas Jesus. Kesaksin Injil Markus nuduhken maka Jesus siikuasai alu kuasa Dibata simeganjangNa, ibaba Kesah siBadia Ia kutaneh simesawang jenari icubai Iblis Ia dekahna 40 wari. Tapi gegeh kuasa Dibata sehkal belinna erdahin ibas Jesus, seh maka labo tertaluken kuasa iblis ndai gegeh kuasasi lit ibas Jesus e (Mark 1:12). Iblis ntahpe setan ibas cakap Heber ertina musuh entah pelawan (imbang), ikut tampil jadi andil simpeteguh ikuasa Dibata sibeliden asa kuasa siapai pe si lit ibas doni enda, termasuk kuasa iblis. Ibas terjemahen Septuaginta Setan igelari diabolos, ipelawes Jesus alu kuasaNa. E maka amin gia lit gegeh ibas setan-setan e, tapi kuasana tetap teruken asangken gegeh kuasasi lit ibas Jesus.

Guna ncidahken bana, Iblis makeken manusia jadi media sierbanca tempasna teridah nggeluh ras tampil ibas sienterem. Janah payo ka penandaina nandangi Jesus Anak Dibatasi lit kuasa si Meganjangna ibas Ia. Nina man Jesus, “O Jesus Anak Dibatasi Meganjang. Kuga ateNdu aku ibahanNdu? Ibas gelar Dibata kupindo maka ula aku isiksaNdu. ”(Invoc/Intro Mark 5:7). Iblis ntahpe setan meteh maka Jesus sierkuasa banci naluken setan-setan e. Maka nderkuh ia janah alu sora simegang erlebuh man Jesus. Iblis bagepe setan-setan kerinana imbang Dibatakap siarus ipelawes Jesus ibas sekalak jelma ija iblis ntah setan e ringan ibassa. Sabab sesekalak siikuasai setan iblis tertaban kap geluhna. Iblis makeken manusia jadi sarana entahpe kendaraan siencedai geluh manusia bagepe hubungen kalak sitek ras Dibata. Ipakeken iblis manusia jadi sarana guna mbelasken perkatan sierlawanen ras Jesus bagepe erlawanen ras Dibata.Tuhu mesunah ipelawes Jesus setan iblis alu kataNa jine sidem alu kuasa simpepalemken kalak si itaban kuasa iblis e. Nina Jesus man setan “Sinik”. Ertina lanai lit peluang bagepe kesempaten kai pe man siiblis. Sinik ertina melumpuhkan, entahpe mpengadi. Seri biakna ras memutuskan dan mematikan kuasa setan yang berhubungan dengan memperdaya manusia. Itebeng Jesus gegeh kuasa setan sincedai manusia. Idampes-dampesken setan jelma ndai janahna serko ndarat sisetan ibas jelma e nari.

3. Antusen ras Pengkenaina
Jesus enggo mulahi dingen tetap erdahin guna nelamatken kalak sitertaban ibas Kuasa sijahat nari. Tapi kuga ngalaken kalak sikemamangen naksiken pendahin Jesus, ras kalak sienggo ipulahi ibas kuasa setan nari? Biak kemamangen langabo tentu ngaloken ras ermeriah ukur nandangi sesekalak sipulah ibas tabanen kuasa setan nari. Banci saja Jesus isalahken sienterem aminna gia Ia enggo ndahiken simehuli. Bagem kinatana ibas dahin pelayanen. Tersampat kalak ibas geluhna tapi jadi masalah ibas sienterem. Piah dungna dahin Dibata sibadia lanai ncidahken kiniulin ras kemulian man Dibata.

Kai sinibahan Jesus ibas rumah pertoton (Sinagoge) mpelawes setan ibas sekalak jelmanari, man jelma sienterem sinaksikenca jadi pengajaren simbaru. Erkiteken langa kin lit sekalak guru agama entahpe imam singasup erbanca bagi sienggo ibahan Jesus. Nandangi hal simbaru janah mendasari jenda, eme Jesus erbanca malem kalak sitertaban ibas pinakit ikuasai setan. E maka perlu sipepayo ibas dahin gereja. Sabab Jesus mulahi ras mpepalem kalak sipinakiten erkiteken ikuasai setan ibas rumah pertoton. Gereja tentuna enggo melala ndahiken dahin guna ngelai dingen nampati. La gia ikataken litna ajaren simbaru, tapi kemamangen ibas ndahiken dahin e megati turah i tengah perpulungen. Ibas kemamangen endalah gia, tetaplah min perpulungen ngasup ngidah maka kuasa Dibata si Meganjang erdahin denga ibas gereja ras perpulungen seh ngasa genduari enda, Sabab Dibata alu kuasaNa tetap ncidahken kebadian ibas dahin-dahin gereja. Arah dahin pelayanen e tetaplah setia ras tutus kerinaperpulungenbagepesierdahinTuhanerkiniteken man Dibata. Maka labo lit sada pe italuken kuasa sijahat entahpe kuasa setan. Sabab kalak singikutken dibata-dibata sideban melala maba kesusahen man dirina jine (Ogen).Tetaplah ibas Tuhan nggeluhlah ibas kuasaNa simbebasken ras mpepalemken, sinuduhken dalan siperlawesna kempakkegeluhen.

Pdt Merry Tatuwo br Kembaren
Perpulungen Makassar