Suplemen Bimbingan Khotbah Pekan Kebaktian Keluarga Wari VI,Tgl.20 November 2015

Invocatio :

Keluaren 23:8

Ogen :

Nehemia 2:1-22

Khotbah :

I Samuel 16:1-7

Thema :

Megermet milih  pemimpin

 

 

Kata Penaruh
Senina ras turang, ibas paksa kentisik nari kita ngelakoken pemilihan wakil rakyat ibas daerahta masing - masing. Tentu kita sebagai rakyat mempunyai peran penting guna milih wakil Dibata ibas pemerentahenta. Aminna gia genduari kita enggo krisis kepercayaan tapi labo banci siabaiken dahin enda. Peranta mbelin, terlebih sebagai warga gereja si ertanggung jawab guna bangsanta. Guna sie perlu kita megermet rikutken sura sura Tuhan guna milih pemimpin.

Renungen

Saul la patuh nandangi kai siiperentahken Tuhan ibas ia erperang  guna naluken bangsa Amalek, emaka Saul ipengadi Dibata selaku Raja Israel. Iukum Tuhan ateNa bangsa Amalek sebab bangsa enda nai nari ngelawani bangsa Israel mulai kin nini-nini bangsa Israel e nai reh  i Mesir nari. Emaka iperentahken Tuhan man Saul guna erperang dingen ngkernepken bangsa Amalek ras kerina si lit ibas bangsa e sebab kerinana generasi si lit ibas bangsa e nggo iakap Dibata erdosa rikut ras kerina asuh-asuhenna. Tapi la ilakoken Saul sue ras kai siiperentahken Dibata man bana.        Renungenta 1 Samuel 16 : 1 - 7 nuriken, Tuhan merentahken Samuel guna lawes ku Betlehem, ndahi Isai, sebab nggo ipilih Dibata sekalak anak Isai guna jadi raja nggantiken Saul. Si penting arah teks enda siidah :

1. Kalak si nggo ipilih Dibata pe banci ipengadi Dibata adi la ndalanken kai siiperentahken Dibata. Dibata si berhak mpengadi kalak si nggo ipilihNa.
2. Nabi sekelas Samuel pe tetap lit ibas ia "kebiaren", mbiar ia ibunuh Saul adi itehna Samuel nangkuhken raja si deban nggantiken posisina. Tapi Tuhan mpetetap ukur Samuel emaka minter idahikenna kai siisuruh Tuhan (ay 2-4) aminna gia lit resiko ibas ndahiken kai siisuruh Tuhan, banci ia ibunuh Raja Saul erkiteken si e, tapi belinen kebiaren Samuel man Tuhan.
3. Samuel selaku nabi ras imam, sibage dekahna nggo ngelai ibas dahin Tuhan, mulai kin kitik-kitik nari nggo erdahin i Rumah Pertoton, tapi carana rukur tetap denga bali ras cara manusia umumna, lenga bali ras cara pandang Tuhan. Emaka ipersingeti Tuhan Samuel gelah ula ngenen penampilan si arah darat saja ngenca, "ula ngenen kuga gedangna ras kuga jilena rupana. sabab pertimbangenKu la bali ras pertimbangen manusia. Adi manusia inehenna si teridah arah darat, tapi Aku kupernehen pusuhna " (ay.7). Ertina ibas milih persuruhen Tuhan labo pertimbangen ras sura-suranta selaku manusia ije si jadi penggurunta tapi pertimbangen ras sura-sura Tuhanlah arusna si lebih utama ras lebih dominan.

Aplikasi
Tema: megermet milih pemimpin.
Megermet ertina teliti, arah teks enda kita ibabai guna nggit megiken sora Tuhan ras nggit ndalanken sura sura Tuhan. La gia bali ras sura-surana tapi Samuel tetap tunduk ras patuh nandangi sora Tuhan ibas nehken pilihen Tuhan. Dibata ngasup natap terus ku pusuh perukuren emaka Dibata nge si meteh apai si patut ras payo man pilihen ibas milih pemimpin. IajariNa kita guna ngasup milih alu megermet ,payo dingen benar, la rikutken penatap manusia tapi rikutken penatap ras sura-sura Tuhan, sebab Tuhan la ngenca ngenehen si teridah arah darat, tapi seh ku pusuh eme ketutusen, kiniteruken ukur, motivasi ras ukurna si bersih ibas ndahiken dahin-dahin pelayanen ras ertanggung jawab nandangi dahin siiampeken man bana. Salah sada contoh siidah ibas ogenta eme Nehemia. Nehemia Kalak si tutus ras setia man Dibata, la nggit ngaloken sogok bas dahin pemerentahen (invocatio) em palasna maka pendahinna bas pemerentahen pe mehuli janah berhasil pe ia muat ukur raja guna mpekena Jerusalem. Alu bage kita similih perlu nehken pertoton khusus guna pemimpin sipilih kita ras ngenen kegeluhenna simbiar man Tuhan ras kinerjana si enggo teridah kidekah enda.