Suplemen Bimbingan Khotbah Pekan Kebaktian Keluarga Wari IV, Tgl.18 November 2015

1. Ibas zaman genduari melala si idah rumah tangga kawin cerai, seolah olah perjabun e merupaken sada percobaan saja, cubaken erjabu adi cocok terusken janah adi la cocok daramika sideban emaka terjadi perceraian ntah simulihen.Padahal rikutken kata Dibata si ipelajari kita, perjabun e eme sada si enggo itetapken Dibata, dilaki ras diberu si ipejumpaken Dibata ras ipersadakenNa janah sienggo ipersadaken Dibata lanai banci isirangken manusia. Lamehuli adi manusia e nggeluh sisada sisada emaka Kubahan teman sicocok man bana guna nampati ia. Jadi diberu ijadiken Dibata penampat man dilaki, alu bage labo teruken derajat diberu asa dilaki tapi seri ia duana dihadapan Tuhan.

2. Diberu ibuat ibas tulang rang rang si siAdam nari ertina Adam harus jadi pelindung man diberu e, ngkelengi bagi ia ngkelengi dirina, adi la atena keleng ndeharana berarti la atena keleng nandangi dirina sebab sidua kalak(dilaki ras diberu enggo jadi sada). Janah ibas ayat 23, lit sada pengakun Adam arah kai sienggo ibereken Dibata man bana, nina : Enda nge maka enggo payo, Tulanna ibuat ibas tulanku nari janah jukutna ibas jukutku nari, kata enda ncidahken kai sienggo ibereken Dibata e enggo paskal lanai lit tercocoken asa sienggo obereken Dibata. Si enggo ibereken Dibata man teman geluhta e, gia lir kelebihen ras kekurangenna menurut Tuhan eme si enggo cocok jadi teman geluhta. Alu bage lanai bo perlu idarami sideban janah perjabun e labo banci ibahan jadi sada percobaan. Gia melala perbedan antara perbulangen ras ndehara eme siman pekenan, perbedan latarbelakang pendidiken, ekonomi pengajaren ibas orangtua nari, tapi la banci ibahan perbedan sifat ras perbedan latarbelakang sebagai alasen la cocok emaka sirang nari maka mehuli nina. Perbedan silit gelah banci erlajar duana siperbulangen ras ndehara rikutken kata Dibata, ugakin ndehara sipayo ras uga perbulangen singena ate Dibata.

3. Rikutken efesus 5 : 22- 25 masing masing perbulangen ras ndehara ngelakoken tugasna tanpa syarat.Sebagai ndehara mehamat man perbulangen, gelah adi lit perbulangen la tek man Dibata, banci ia tek erkiteken lagu langkahndu amin lagia kam ngerana sengkebabah pe, sebab idahna maka mehamat kam ras mehuli lagu langkahndu.Bagekam perbulangen ngkelengi ndeharana tanpa syarat, bali ras Yesus ngkelengi perpulungen alu labo erbahan persyaraten, nggit ia mate ikayu petsilang gelah ngkelengi perpulungen e gelah selamat. Emaka pedauhlah KDRT sebab e labo ngena ate Dibata, tapi tetap nggit siajar ajaren, meteruk rukur ulakal ulin akapndu kam asa kalak sideban tapi dalankenlah tugas sebagai ndehara alu mehuli dalanken tugas perbulangen alu kekelengen.amin