SUPLEMEN PEKAN PENATALAYANEN GBKP TAHUN 2025 WARI VI, ROMA 15:14-21

HARI KE-6

Invocatio      : “IberekenNa perukuren si bujur man kalak si dahinna ngerunggui, janah kinimbisanNa man kalak si ertugas engkawali pintu-pintu gerbang kuta i bas serangen kalak nari” (Jesaya 28:6).

Ogen : 1 Kronika 13 : 1 – 4

Khotbah : Roma 15 : 14 – 21

Tema : “Mehuli, Erpemeteh, Dingen Ngasup Siajar-Ajaren”

 

Kata Perlebe

Shalom ras mejuahjuah man banta kerina. Puji Tuhan dingen si kataken bujur man Dibata Bapa si nggo naruhken kita seh ku wari peenemken Pekan Penatalayanenta tahun enda. Tema umum Kebaktin Pekan Penatalayanenta eme “Erbahan Perdamen.” Tema enda nggo si pelajari ras si pegejapken bas wari pemena. Perdamen la banci terjeng cakap ras sura-sura ngenca. Perdamen labo mungkin terjadi ras inanami adi terjeng ranan ngenca. Perdamen terjadi adi ilakoken, iciptaken ras iperjuangken. Kalak si erbahan perdamen eme kalak si dewasa perukuren ras kinitekenna. Kalak si dewasa nge si ngasup rukur, ngukuri ras erbahan perdamen. Kalak si medanak perukurenna labo ngasup erbahan perdamen. Emaka seh kal ndeherna hubungen perdamen ras kedewasan. Perdamen erkawiten kal ras kedewasan. Bas wari peenemken enda si ukuri ras si siksiki tole uga gelah kita ngasup erbahan perdamen.

Isi/ Penjelasen

Arah Kata Dibata si jadi khotbahta Roma 15:14-21, ibukaken alu tangkas kerna kepribadian rasul Paulus. La lit si jumpai bas nats si deban si lebih jelas ras tangkas kerna kepribadian Paulus asangken bas perikop enda. Bas nats khotbah ngerana kerna kepentaren kedewasaan Paulus. Kedewasan Paulus teridah ibas erbage-bage dampar. Pemena, Paulus pentar makeken kata-kata si payo ras pas. Aminna tangkas iidah Paulus kelepaken si lit bas perpulungen Roma, tapi Paulus labo menegur apai ka nalahi ras ngerawai. Paulus la ndaram-ndarami kesalahen perpulungen. Justru isapana perpulungen e alu kata ‘O senina-seninaku.’ Jenari isingetken Paulus maka igejapkenna melala kal si mehuli ibas perpulungen. Perpulungen Roma dem ibas erbage-bage pemeteh. Pemeteh e ngasup mabai kalak si tek siajar-ajaren (ayat 15). Paulus ngidah kalak banci lebih bertumbuh ras berkembang ku si terulin. Alu kata si deban, Paulus ngidah kalak secara positif. Peduaken, Kedewasaan Paulus teridah arah ia meteruk ukur. Paulus la mujiken ras mpermuliaken bana. Sada-sadana si iakui Paulus si jadi kemulianna eme bahwa ia jadi pejabat (Indonesia: pelayan) Kristus Jesus. Si enda pe jadi erkiteken lias ate Dibata si nggo ibereken Dibata man bana (ayat 15-16). Peteluken, Paulus ngidah dirina sebage sada alat ibas tan Kristus. Kemegahen Paulus labo pendahin ras pencapaianna tapi kinisersadanna ras Kristus erkiteken pendahinna guna Dibata. Paulus la nggit ras ngerana kerna kai si nggo banci ibahanna man kalak si labo Jahudi. Tapi kai si nggo ibahan Kristus arah ia bas mberitaken Berita Si Meriah man kalak e ngenca i pang nuratkensa man perpulungen Roma. Kristus nge si erdahin ibas ia subuk arah kata, perbahanen, tanda-tanda sengget si mbelin bagepe arah gegeh Kesah Si Badia bas niari kerina daerah lako mpeseh Berita Si Meriah kerna Jesus alu serser (ayat 17-19). Sipeempatken, sura-sura Paulus si mbelinna eme jadi perintis (pelopor). Paulus mberitaken Berita Si Meriah ku ingan ija lenga pernah kalak megi gelar Jesus Kristus. Alu kata si deban, Paulus lawes erberita ku ingan si lenga pernah seh perberita si meriah si deban ku je. Si enda guna nggenepi nubuat Kata Dibata bas Jesaya 52:15 (ayat 20-21).      

Arah ogenta 1 Kronika 13:1-4 ituriken uga raja Daud runggu ras kerina pempimpin 100 ras pemimpin 100 i Israel. Ulih runggu e imomokenna man kerina bangsa Israel gelah adi payo akapna kerina dingen ersada kerina arihna gelah ilegi perpadanen i Kiryat Jearim nari gelah ibaba ku Jerusalem. Payo iakap bangsa e janah ersada arihna kerina emaka ilegi me Peti e. Teridah i jenda kedewasan ras kepentaren Daud. Daud la bahanina saja kai si akapna mehuli ras kai sura-surana. Daud la erdalan si sada. Daud pe la muat keputusen sisada tapi irunggukenna dingen iarihkenna ras-ras. Keputusen bas runggu ras arih me si idalankenna. Arah invocatio, icidahken sada nubuat maka ibas sada paksa reh me TUHAN lako mereken perukuren si bujur man kalak si dahinna ngerunggui. Tole TUHAN mereken kinimbisanNa man kalak si ertugas engkawali pintu-pintu gerbang kuta. Dibata mereken man sesekalak sue ras dahin ntah pe tugasna (Jesaya 28:6).

Pengkenaina ras Kata Penutup

• Sasaren pelayanen gerejata GBKP Tahun 2025 eme “DEWASA MENERIMA PERBEDAAN.” Si eteh maka kinierbagen e la terpersoken. Kinierbagen e kinata kegeluhen. La lit kalak si tuhu-tuhu seri/ bali 100%. Kalak si rindu (kembar) kin pe labo seri, apai ka lain nande lain bapa, lain kuta, beru/ merga, suku, ras si debanna. Kita sada ras si debanna pelain-lain ibas perukuren, pemeteh, pengkebet/ pendahin, sekolah, talenta, kiniliten, kengasupen ras seterusna. Sada ibas keseragaman metahat, tapi sada ras ersada ibas kinierbagen e la metahat. Guna si perlu kal kedewasaan. Kedewasanta erbahanca maka ngasup kita ngaloken, berdampingan ras ersada ibas kinierbagen.
• Tema: “Mehuli, Erpemeteh, Dingen Ngasup Siajar-ajaren.” Ola kita meter puas nangdangi biak ras karakterta si lit. Ola ngadi bertumbuh, tapi teruslah kita bertumbuh ku bas biak ras orat nggeluh si terulin. Si usihlah perukuren Kristus Jesus; si ukuri kai si mereken kiniulin man kalak si deban (Pilipi 2:5; Roma 15:2, 3). Ertambah-tambahnalah kiniulinta, pemetehta ras kengasupenta lako siajar-ajaren. Teluna biak enda perlu ras penting lit ibas kita. Payo ras tuhu maka mehuli (integritas) perlu ras penting. Tapi mehuli saja la kap bias. Perlu si tambahken ku bas biak mehuli e pemeteh (pengetahun, ilmu) eme pemeteh kerna Kata Dibata, pemeteh si mehuli ras si ngena ate Dibata dingen manusia. Jenari pemeteh enda mabai ras mpengasup kita siajar-ajaren (bersinergi) sada ras si debanna (bdk. 2 Petrus 1:5-9).  
• Biak mehuli, erpemeteh, dingen ngasup siajar-ajaren si lit bas kita si mpengasup kita ngidah kalak si deban alu mehuli. Kalak si la mehuli labo ngasup kita kalak si deban mehuli. Kalak si la mehuli labo ngasup ngidah ras ngakui kiniulin kalak si deban. Nina Maxwell, “Kita tidak melihat orang lain apa adanya, tetapi berdasarkan apa yang kita lihat dengan diri kita.” Emaka adi ateta gelah ngasup kita ngidah kalak si deban mehuli, ngakui kiniulin kalak, dirita lebe si pekena, dirita lebe si pehuli. Kalak si ngidah kerina alu perukuren negatif, uga banci ngidah kalak positif. Alu perukuren positif me maka ngasup kita ngidah kalak si deban pe positif.
• Pedauhlah biak meganjang ukur ras sombong. Kiniganjangen ukur ras kesombongen erbahanca kita siakap si beluhta/ si jabona. Minter kita meremehken/ menyepeleken kalak si deban. Enda me erbahanca la kita ngasup si ajar-ajaren, kita saja ateta ngerana, ngajar ras ngajari. Sebeluh-beluhna sesekalak, pasti perlu ia ajaren, masuken, sharing ras kalak si deban.
• Agenda si ndeherna bas runggunta eme Musyawarah Warga Sidi Runggun (MWSR). Kenca si e seh kita ku agenda sinodal eme Sidang Majelis Sinode (SMS). Si idahlah bahwa dahin enda dahinta ras, labo dahin serayan Tuhan saja. Kalak si dewasa nge si ngasup ngidah dahin-dahin Tuhan e sebage tanggung jawabna. Kalak si dewasa nge si ngasup ngidah dahin-dahin e baginna. Kalak si dewasa lit ibas ia rasa memiliki (sense of belonging,& sense of responsibility). Sebalikna kalak si medanak, la ia erdiate ras lepas tan ia nangdangi dahin-dahin si lit bas Gereja.

Pdt. Juris Tarigan, MTh;

GBKP Rg Bogor