SUPLEMEN PA MORIA 19-25 FEBRUARI 2023, 2 RAJA-RAJA 20:1-11

Ogen : 2 Raja-raja 20:1-11

Tema : Enggo Ku Begi Pertotondu

 

KATA PENARUH

Kerina kalak metedeh pertotonna ibegiken Tuhan sebab menahang baban geluh enda adi isampati Dibata kita. Bage ka pe reh menahangna siakap adi lit temanta siersuruh ukurna guna noteken kita ibas perbeben geluhta, misalna sangana kita pinakiten entah anakta, perbulangenta, orang tuata si sakit. Penakit ibas daging kula entah ibas jabu situhuna mberat kel ngenanamisa. Daging kulana mesui, perukuren latih ras turah kebiaren kerna pinakit e. Emaka perlu kel situhuna pergegeh ibas teman sanga lit penakit e nderba kegeluhenta.

PENJELASAN TEKS

Raja Hizkia kena pinakit simekelek, memang labo ikataken kai pinakitna tetapi ikataken maka raja Hizkia menam mate. Kata “menam mate ” e mengambarken maka pinakit raja Hizkia eme penakit si parah. Tupung ia sakit keadaan bangsa Israel labo sangana aman tetapi situhuna sedang atau akan menghadapi raja Asyur. Tentu adi dari segi sekalak pemimpin tentu keadaan penakit ras ancaman Asyur e mabai sada perbeben simberat. Waktu raja Hizkia sakit, reh nabi Yesaya ngataken man bana guna pedah perpudina man kerina isi jabuna. Sekalak penapsir ngataken maka dikune lit kalak sinandangi ngadap Dibata mehuli guna ikataken man bana kerna keadaanna gelah ia banci persiapken diri.

Raja Hizkia megi pesan nabi Yesaya erbanca ndele atena. Pinakit e sangat menyakitkan tubuhta bage pe menyakitken perasaan. Emaka sewaktu megi kata nabi Yesaya gelah ia ngataken kata perpudinan man kerina isi jabuna minter ia erkusur ayona kudinding. Tempa-tempa raja Hizkia la megiken kata nabi Yesaya. Situhuna ia ertoto man Dibata. Ia ngkusurken ayona ku dinding gelah banci ia alu tutus ertoto man Dibata. Ia alu pusat ertoto mindo perkuah ate Dibata. Memang ibas ertoto kita perlu memusatkan hati kita man Dibata sebab murah kel pikirenta enda terombang ambing. Emaka raja Hizkia engkusurken ayona ku dinding gelah banci pusat ukurna ertoto man Dibata. Ipindona man Dibata gelah Dibata nginget ia alu tutus ras erkemalangen enggo melayani Dibata, kenca e ia tangis. Raja Hizkia labo guna menyombongken dirina ngataken ia bujur bagi pertoton kalak Parisi tapi i jenda memang raja Hizkia mindo perkuah ate Dibata. Hal e teridah arah tangis ia. Sebab melala dengan dahin sibanci idahikenna. Umurna tupung ia sakit 38 tahun.

Dibata megiken pertoton raja Hizkia, emaka kenca nabi Yesaya nadingken ia ope denga ibentasina kesain istana sitengah maka isuruh Tuhan nabi Yesaya mulihi ndahi Hizkia guna ngataken maka Dibata megiken pertotonna ras 2 wari nari ia ku rumah pertoton. Dibata megiken pertoton raja Hiskia situhu-tuhu (Dengan kesungguhan hati) mindo perkuah ate Dibata. Emaka nina Dibata”megi pertotonndu ras ngidah iluhndu mambur”. Tuhan meteh isi pusuh raja Hizkia si sungguh-sungguh mindo perkuah ate Dibata ras pengalami dosa. Raja Hizkia ngakui dosana ras bertobat man Dibata.

Raja Hizkia la terjeng i pepalem Dibata pinakitna tetapi nambahi umurna 15 tahun ras nempati bangsa Israel ngelawan bangsa Asyur. Tuhan mpepalem pinakit raja Hizkia ras nambahi umurna gelah raja Hizkia banci encidahken kinitekena ibas kegeluhenna. Ertina Dibata mereken kesempaten man raja Hizkia guna encidahken kesetianna man Dibata. Raja Hiskia megi kata nabi Yesaya e mindo tanda guna mbuktiken janji Dibata. Raja Hizkia mindo tanda man Dibata gelah ngurangi rasa kekuatirenna ras guna mpeteguhi kinitekenna. Emaka Tuhan mereken bukti alu mundur awih-awih tangga sepuluh jingkang. Emaka idampelken nabi Yesaya buah ara simedakdak ku bareh raja Hizkia.

PENGKENAINA

Penakit mabai kinisuin ibas daging kulata. La terjeng mesui daging kulata tapi pe banci mabai mesui pusuhta, perasaanta, latih ukurta, maun turah pe biarta. Sewaktu raja Hizkia sakit ras kenca ikataken nabi Yesaya maka ia mereken pedah siperpudina man isi jabuna tuhu sakit kel akapna megisa. Ise pe kita adi kita ngenanami keadaan raja Hizkia enda tentu kita pe sakit kel nge siakap apalagi pinakitta e eme penakit siparah. Setiap kalak singenanami pinakit awalna melala nge simenolaksa, nalahken Tuhan (uga maka ibahandu aku sakit), nalahken dirina (dosa kai nge ndia kuban) ras perasaan sidebanna. Tupung paksa bage raja Hizkia labo terjeng tangis saja, erndele ate saja, menutup diri tapi ia ertoto man Dibata.

Raja Hizkia erpengendes man Dibata alu tutus ate. Kecibal simberat ibas geluhta enda akan menjadi lebih ringan alu siendesken man Dibata alu tutus. Memang mberat nge ndalani penakit ibas jabu tapi sidat nge gegeh simbaru ibas Dibata nari adi tetap lit pengendesenta man Dibata bagi pengakuan sekalak penderita penyakit kanker maka tupung mesui kel akapna e ertoto ia ras hubungina kerina temanna notoken ia maka urak akapna suina. Ergegeh kel situhuna persekutuanta e ras Dibata. Emaka pindo perkuah ate Dibata ibas kerina kesusahenta.

Tupung kita ngenanami pinakit entah anggota keluargata sisakit lemah kita ngadapisa. E me erbahanca maka melala kalak dungna lanai megegeh kinitekenna. Ndabuh ia kubas kuasa kegelapan. Ertambar ia kubas kuasa si gelap. Erpalasken kata Dibata ibas bahan Pa morianta enda ngajuk kita gelah tetap sicidahken kinitekenta. Mberat, mesui, mbiar perasaanta adi kita sakit emaka sipindo temanta guna notoken kita. Kita pe la erngadi-ngadi ertoto man Dibata. Pindolah perkuah ateNa sebab Tuhan nge singaturken kegeluhen i doni enda.

                                                                                                Pdt Kristaloni br Sinulingga-Rg Yogyakarta