SUPLEMEN PA MAMRE 17-23 MARET 2024, ROMA 6:5-14

Teks :

Roma 6:5-14

Tema:

Mate Ras Nggeluh I bas Kristus

Tujun: Gelah Mamre:

1) Meteh kerna kuga kin mate ras nggeluh i bas Kristus

2) Ngasup nggeluh bagi Kristus

 

1. Kata Perlebe

Momento Mori eme sada istilah i bas bahasa Latin siertina,”ingatlah hari kematianmu”. Arah istilah enda i babai me kita kubas sada perenungen maka kematen e sada hal sipasti. Em sababna geluh idoni enda sada kesempaten ras perkuah ate Tuhan siarus idalani ras iperjuangken. Adi ngerana kita kerna kematen, tentuna sitergambar i bas kita kerna dosa. Dosa me sierbanca turah pernembeh Dibata man banta, janah ulih dosa maba kematen.

2. Uraian Teks

Roma 6:5-14 sijadi tema ntah batang belin perikop enda eme kita nggeluh erkiteken Kristus. Lit piga-piga hal sijadi penekanen:

• Erkiteken Kiniteken man Kristus kita i selamatken (5).

Kita i selamatken labo erkiteken kebeluhenta, tapi kita iselamatken erkiteken perkuah ate Dibata. Lau peridin me sijadi tanda maka kita enggo ibersihken i bas dosanta.

• Manusia si male isaliohken jadi manusia simbaru (6)

Paulus make dua istilah sinuduhken manusia si male ras manusia simbaru. Manusia simale eme manusia silenga ipelimbarui tapi erkiteken Kristus i salibken kita kalak sitek ndatken kegeluhen simbaru. Ras kalak sienggo jadi manusia simbaru arus encidah ken biak simehuli ras badia.

• Bebas ibas dosa (7-14)

Kematen erkiteken dosa enggo itebus i bas kematen Kristus i kayu persilang. Erkiteken dosa enggo italuken maka kita selaku kalak sitek arus encidahken perbahanen singena ate Tuhan. Mpedauh sura-sura kedagingen ras enda banci silawan erkiteken kinitekenta i bas Kristus.

3. Pengkenaina

Kristus enggo naluken kuasa kematen arah kekekenNa i bas simate nari. Adi kematen Kristus erkiteken dosa maka tek kita dosa enggo italuken. Kematen lanai jadi kebiaren man banta.Banci sisimpulken maka kegeluhen kalak sitek man Kristus arus encidahken biak sijadi usihen, sebab Kristus mate sekali ngenca man dosanta. Tugasta selaku mamre uga njaga kebadian geluhta i doni enda. Tetap erguna ras erkarya man kalak sideban.

Pdt. Walder Mazmur Ginting-Runggun Karawang