SUPLEMEN PA MAMRE 13-19 AGUSTUS 2023, KEJADIN 41:25-41

Ogen:

Kejadin 41:25-41

Tema:

REKAM JEJAK PEMIMPIN

 

I. KATA PENARUH

• Ibas zaman si genduari melala kel kalak si melala pemetehna (S1, S2, S3, dll) tapi perbahanenna labo mehuli erkiteken ia ka nge si korupsi, ia ka nge si selingkuh, ia kange si nangko, ia ka nge si mekpeki ndeharana, ia ka nge si mekpeki anakna, ia ka nge si perjudi, ia ka nge si narkoban, rsd. Emaka zaman genduari adi ndarami kalak si menganjang sekolahnya ras “erpemeteh” guna erdahin bas sada perusahaan la mesera ndaramisa, tapi ndarami kalak si bujur ras mehuli guna jadi karyawan bas perusahan banci mesera ndaramisa.
• Biasana sope lenga ilakoken pemilihen Presiden entah pe Gubernur, rsd, lit rusur isiarkenna visi-misi, entah pe program-program si enggo ilakokenna ras kai si bakal atena ilakokenna adi ia terpilih. Tentu hal enda ilakoken gelah masyarakat subuk secara daerah bagepe secara keseluruhen rakyat Indonesia meteh ras nandai rekam jejak pemimpin si bakal ipilih e.
• Tentu memang perlu pemeteh entah pe pendidiken tapi pemeteh tanpa kiniteken tentu pasti cara mimpinna pe menggunakan logika dan mementingkan diri sendiri. Tapi pemimpin si berpenidikan dan beriman tentu akan memimpin dengan iman ras kasih janah kerina sidahikenna guna kemuliaan Tuhan labo guna kepentingen pribadina. Emaka arah abahn PA Mamreta enda, kita erlajar uga pentingna meteh rekam jejak pemimpin si bakal sipilih kita.

II. MPEBAGESI PENGANGKAAN KERNA TEKS

• Perikopta enda nuriken kerna uga Jusuf jadi wakil raja Mesir. Ibas Kejadian 41 : 25-41 enda ituriken kerna Jusup. Jusup eme anak Jakup si nomor sepuluh sada ibas ndeharana Rahel si jadi atena. Man Rahel enda me anak ntah pe pupusna si pemena. Erkiteken Tuhan si ngarak-ngarak Jusup, aminna pe melala kiniseran si inanamina (ia si pemenana jadi budak i Mesir ras pernah ipenjara labo erkiteken kesalahenna), kedungenna ia jadi pasu-pasu man bangsa-bangsa. Si enda ibenai arah ipengasup Dibata alu KesahNa si Jusup nerangken antusen nipi raja Mesir. 
• Jusup paksa sie nguda denga (iperkiraken usiana kurang lebih 17 tahun denga) paksa ia irumah Potifar (Kej. 37:2).

1. Jusuf sekalak si patuh (Kej. 37”13).
2. Jusuf sekalak si erkememalangen man Tuhan (bnd. Kej. 39:2-3).
3. Megenggeng ibas ngalaken kesusahen (bnd. Kej. 39:23).
4. La ia nggit muat kesempaten ibas si la ngena ate Tuhan (bnd. Kej. 39:8-10)
5. Tetap erpengendes man Tuhan ibas kesusahenna (bnd. Kej. 39:21).
6. La nginget-nginget perbahanenna man kalak (bnd. Kej. 40:23).
7. La gila jabaten (bnd. Kej. 41:33).
8. Ngukurken kiniulin jelma sienterem labo guna dirina (bnd. Kej. 41:33-36).
9. Tetap ngelakoken simehuliman si ndayaken ia (bnd. Kej. 50: 19-21).
10. Terteki ras bujur ibas kai pe (bnd. Kej. 39:6).

• Adi sinen latar belakang perikopta enda ibas Kejadin 41 uga Jusuf nelamatken bangsa Mesir arah ia nuriken Nipi raja Mesir sierbahansa bangsa Mesir la kekurangen pangan selama 7 tahun. Ija paksa sie arah iertiken Jusuf nipi raja mesir nandangi terjadi me peranin si melimpah-limpah selama 7 tahun tapi jadika me 7 tahun kelihen. Tapi arah pengajaren Dibata man Jusuf erbahansa ulih 7 tahun e ipepulung tersitik-sitik ibas peranin rakyat guna isimpan ngadapi masa kelihen e si erbahansa Mesir tetap kelimpahen pangan aminna gia lingkungenna kelihen kerina. Seh maka kerina bangsa sekitar taneh Mesir nukur pangan ku Mesir. Enda ka me dalan-dalanna maka Jusuf ras kesusurenna ras kerina bangsa Israel banci tading i Mesir dungna jadi bangsa si mbelin.
• Jusup la saja ngasup ngertiken ras njelasken erti nipi raja Mesir (41:25-32) siertina 7 tahun masa kelimpahen ras 7 tahun masa kelihen. Emaka guna ngaturken 7 tahun masa kelimpahen e Dibata mereken kepentaren ras pemeteh man Jusuf guna ngaturkenca. Emaka Jusuf la saja ngasup ngertiken nipi raja, tapi pe ngasup ia mereken langkah (kebijaken) strategis si arus idalanken raja Mesir (ayat 33-36). Lit 3 kebijaken si ikatakenna Jusuf eme: 
  1. Raja arus milih sekalak si erpemeteh ras pentar guna ngaturken negerina gundari (ayat 33). 
  2. Raja arus ngangkat pegawai-pegawai si deban guna mpepulung seperlima ulih peranin tupung nakan riba-iba ibas masa si pitu tahun e (ayat 34). 
  3. Raja mereken kuasa man pegawai-pegawai si iangkatna guna mpepulung pangan si mbuah e ras njagaisa/ ngawasisa (ayat 35). Pangan si ipepulung ras ijagai enda me jadi persedian man negeri Mesir guna erjaga-jaga (mengantisipasi) paksa 7 tahun kelihen (paceklik) si seh kal sangatna gelah rakyat Mesir la mate kelihen (ayat 36). 
• Janah kebijaken siikataken Jusuf e, iendesken raja man bana maka ia kerina singaturkenca teluna kebijaken e. Janah pelaksanaan ras kepercayaan siibereken man Jusuf la ilakokenna alu mekarus tapi ilakoken Jusuf alu tutus ras erkemalangen man Dibata uga kin aruslah kalak situtus erdahin. Jusuf rajin mpepulung persediaan paksa peranin si erlimpah e (ay. 48-49).
• Janah paksa jadi kelihen Jusuf bertindak alu bijaksana ras hati-hati ibas mbagi-mbagiken persediaan pangan paksa jadi kelihen e ras njagasa gelah erga pasaren tetap rendah alu cara nikapken gandum ibas gudang-gudangna alu erga si pantas.
• Ulih kerina kai siilakoken Jusup e eme bangsa-bangsa ibelang-belang doni reh kerina ku Mesir guna nukur pangan janah bangsa Mesir la kelihen aminna gia belang-belang doni terjadi kelihen janah rakyat pe la menderita erkiteken erga gandum tetap stabil dingen la mberatken man rakyat.

III. PENGKENAINA

• Temata eme REKAM JEJAK JADI PEMIMPIN. Rekam jejak (track record) adalah semua hal yang seseorang atau organisasi telah lakukan di masa lalu, yang menunjukkan seberapa baik mereka dalam melakukan pekerjaan, mengatasi masalah, dll. Alu kata sideban tema enda ngajarken man banta uga sekalak pemimpin enggo ngelakoken perbahanen-perbahanen entah pe pendahin selama ia jadi peimimpin.
• Tentu arah bahan PA Mamre enda ngajarken man banta selaku Mamre banci ersikap milih pemimpinta alu mperdiateken remkam jejakna selama ia memipin sebagai pemerintah atau ibas pendahin sideban si enggo ilakokenna.
• Tentu adi sekalak bapa lit pemetehna ras bijaksana ia ibas geluhna maka la banci lang ngasup ia mabai isi jabuna e erkemalengen man Tuhan, adi sekalak pemimpin melala pemetehna ras bijaksana maka la banci lang ngasup ia ngaturken kemakmuran dan kedamaian rakyat si ipimpinna janah labo hanya mementingken dirina jine. Emaka pemimpin si erpemeteh ras pentar menurut oratenta enda eme Jusuf si memiliki rekam jejak si mehuli sope ia lenga iangkat jadi pemimpin nomor dua i Mesir.
• Emaka ibas pemilihen pemimpin ibas wari si reh enda sipilih lah pemimpinta si erpemeteh ras si pentar guna ngaturken daerahta entah pe negaranta enda gelah banci tercipta keadilen, kedamen ras kemakmuren i kesejahteraan itengah-tengah negara Indonesia enda.
• Marilah kita kerina mpergunaken hak suara si enggo ibereken Tuhan guna memilih pemimpinta arah meprdiateken rekam jejakna selama enda. Alu bage arah penampat gegeh Kuasa Kesah Si Badia tuhu-tuhu kita la mekarus ibas milih pemimpinta she maka terpilihlah pagi pemimpin si memiliki karakter Jusuf ibas ia mimpin bangsa Mesir.

Pdt. Jaya Abadi Tarigan-Runggun Bekasi