SUPLEMEN PA MAMRE 25 JUNI-01 JULI 2023, MAZMUR 112:1-3

Ogen  : Mazmur 112:1-3

Tema  : Jabu Siermeriah Ukur

 

I. KATA PENARUH

Syair kitab ende-enden GBKP No 292:3:

Di kita la mediate man teman ras jabuta

Ija pe la malem ate di sirang ras Dibata

Begikenlah pendiloNa, usih perbahanenNa

Sampati turang senina, dame senang ukurta.

Khusus sehubungen ras jabu, syair KEE enda negasken maka adi la mediate nandangi jabu, ija pe la malem ate. Tentu payo kal enda, banci sibayangken umpana simper gia rejeki, melala herta, nterem teman ras keberhasilen sidebanna, tentu labo malem ate adi la dame ibas jabu.

Jabu eme pusat kegeluhen, janah jabu eme bentuken Dibata.

II. TAFSIRAN/ISI

Melala bagin Masmur si ngingetken uga gelah jabu banci ngenanami kemalemen ate (ump: Masmur 128), bagepe Masmur 112 sijadi bahan PA-ta. Kata kunci siidah kita ibas pengajaren e eme erkemalangen man Tuhan. Erkemalangen man Tuhan banci pe siertiken nggeluh erpengendes man Tuhan, ertedeh ate ngelakoken kerina singena ate Tuhan.

Ibas 112: 1 ikataken, malem ate kalak sierkemalangen man Tuhan, siermeriah ukur ngikutken perentah-perentahNa. Kai bentuk ulih erkemalangen man Tuhan? Paling tidak lit telu ulihna.

1. Ayat 2. Anak-anakna kalak sierkuasa i negeri. Tentu malem kal ate orangtua adi anak-anak erkuasa. Melala kai pe tapi adi anak kin la bagi ukur, tempa sia-sia iakap kerina. Sebalikna seumpama melala pe perbeben, tapi adi anak e maba gelar simerim ku tengah jabu, malem ate.
2. Ayat 3. Isi jabuna jadi kalak bayak namura. Bayak namura (Indo: harta kekayaan). Tentu labo maka Kata Dibata ngajarken “teologia sukses” tapi bayak namura banci iertiken maka kegeluhenna erguna ras ernanam man kalak sideban pe. Kebayaken sekalak kalak sierkiniteken labo iukur arah nominal, tapi iukur arah seh ija kegeluhenna ernanam jadi pasu-pasu ku kalak sideban.

3. Tole bas ayat 3 ikataken maka kebujuren lit rasa lalap. Tentu sada keriahen kal adi kegeluhenta ikeleweti kebujuren, terutama ibas lingkaren jabu. Adi ikeleweti kebujuren berarti lit ije siteken, la saling mencurigai, ndauh ibas kebiaren prilaku sila payo.

 III. APLIKASI

Erpalasken Kata Dibata enda lit piga-piga point sijadi penekanen, eme:

1. Penegasen pengajaren man banta maka kemalemen ate situhu-tuhu banci inanami adi erkemalangen man Tuhan
2. Kemalemen ate e la hanya inanami sada generasi, tapi pe terus ku sinursur.

Arah cara nggeluh sibage erbahansa tersehi bagi temata: Jabu siermeriah ukur. Enda berarti la hanya pihak tertentu siermeriah ukur, tapi kerina isi jabu.

                                                            Pdt Pribadi S Meliala-GBKP Rg Tambun