SUPLEMEN PA MAMRE 11-17 JUNI 2023, MARKUS 16:20

TEKS  : MARKUS 16:20

TEMA : ER BERITA SI MERIAH

 

I. KATA PERLEBE

Dahin siisuruh Yesus man pengikutNa eme Er Berita Si Meriah. Tentu dahin enda meliputi lingkup si laterbatas, harus berlaku ijapape ras bas situasi sikugapanape, la ibatasi waktu ras situasi. Alu bage, kalak si la Er Berita Si Meriah labo igelari pengikut Kristus.

II. AFSIRAN/ISI

Erpalasken teks oratenta siidah maka dahin Er Berita Si Meriah e merupaken reaksi nandangi kenangkihen Tuhan Yesus ku surga. Bagi pernangkihNa e ka me pagi kerehenNa si pedua kaliken. Waktu silit ibas nimai kerehenNa sipeduakaliken eme siharus iisi alu meritaken Berita Si Meriah. Mengacu kubas Markus 1:14-15 si megati igelari sebagai proklamir Yesus kerna pendahinNa, siidah maka Yesus mengaiken diriNa ras kerehen Kinirajaan Dibata. Janah kerehen Kinirajaan Dibata e harus iresponi alu jera ras tek nandangi Berita Si Meriah. Berita Si Meriah sinimaksudken ijenda menunjuk kubas diri Yesus sendiri. Alu bage, Er Berita Si Meriah eme meritaken kerna Yesus arah diri sendiri, baik perukuren, pengerana ras perbahanen.

Tindaken si teridah ibas Er Berita Si Meriah (ayat 20) eme:

1. Laweslah, lebih mbagesna pengertin laweslah eme nadingken zona nyaman guna ngikutken Yesus, mereken diri ikuasai biak-biak Yesus. Laweslah labo saja bas pengertin perpindahen ingan, tapi lebih kubas mindahken perukuren ras perbahanen ku posisi sin gena ate Yesus.
2. Erberita ia kujapa pe, nuduhken maka setiap pergeraken e dalam rangka erberita kerna Yesus Kristus.

Bagepe ipastiken kerna jaminen man kalak si Er Berita Si Meriah eme: Tuhan nampati ia ibas dahinna janah Tuhan pe ikut erdahin ras-ras kalak enda. Penegasen enda ncidahken maka ieteh Yesus maka kalak sierberita simeriah labo ngasup ndahiken dahin e adi la kin isampatiNa. Hal enda pe menyadarken ajar-ajarNa maka ula cuba-cubaken Er Berita SI Meriah terlepas ibas Diri si mada Berita Si Meiah e nari. Adi terlepas ibas simada dahin e nari tentu labo erbuah dahin e, tapia di ersada ras simada dahin e, isaksiken ibas ayat 20 b makai ja pe jadi tanda kuasa ras tanda sengget.

Megati ibas dahin-dahin Er Berita SI Meriah e tempa-tempa la iakap teridah kal buahna. Mungkin sijadi penyebabna eme ndahiken dahin e sekalak entah pe ras sesame tanpa melibatken ras mengandalken Diri Berita SI Meriah e sendiri, eme Tuhan Yesus Kristus.

III. PENGKENAINA

Piga-piga point pengkenaina:

1. Er Berita SI Meriah merupaken satu kesatuan ras kegeluhen kalak sit ek
2. Er Berita SI Meriahlah ras-ras diri Berita SI Meriah e, eme Tuhan Yesus sendiri gelah erbuah.

                                                                                                                                Pdt Pribadi S Meliala-GBKP Runggun Tambun