SUPLEMEN PA MAMRE 04-10 APRIL 2023, MARKUS 1:40-45
OGEN : MARKUS 1:40-45
TEMA : ERGIAH-GIAH ERDIAKONIA
I. KATA PERLEBE
Ibas Jakup 4:17 isuratken, Emaka erdosa me kalak si la ndalanken si mehuli si meteh kai patut idalankenna. Ayat enda sebagai persinget maka kalak sierkiniteken la bias terjeng meteh si mehuli ras ncakapken si mehuli, tapi teridah pe arah perbahanen simehuli. Sebab seh kubas tahap perbahanen nge maka simehuli e ernanam man singelakokensa ras singalokensa. Guna sie tentu harus lit biak mediate ras kininggiten ngelakokensa, aminna gia guna ngelakokensa e harus ngelawan peraten diri. “Pemeteh la mengubah”, umpamana sieteh sinuan-sinuan melus adi la isiram tupung perlego. Pemeteh e payo, tapi di la ilakoken (la isiram) tupung perlego, sinuan-sinuan e tetap melus. Alu bage pemeteh e la erguna sebab la ernanam erkiteken la turah bas perbahanen.
II. TAFSIRAN/ISI
Penakit kusta/gadamen eme penakit kulit si mekelek (Imamat 13:45-46). Kalak si kena penakit kusta tuhu-tuhu ngenanami penderitaan, arus make uis merigat-rigat, ola surina bukna, itutupi ayona arah teruh, janah serko-serko nina, “Meluat! Meluat!(Najis! Najis!). arus ikatakenna dirina meluat. La ia bersih, janah inganna pe ipeserap ibas kalak sienterem nari.
Alu bage banci sipahami maka kalak si kena penakit kusta tuhu-tuhu menderita la terjeng secara daging kula, tapi pe menderita secara mental ras perasaan selaku manusia mahkluk social. Kalak sideban erciga ate man bana ras icap kalak perdosa kal.
Ogenta ncidahken maka kalak si gadamen e ndahi Jesus. Engkai maka “pang” ia ndahi Jesus? Ndahi kalak sideban mungkin labo ia pang sebab ia memang tertolak ras ikucilken kalak sienterem. Pang ia ndahi Jesus tentu erkiteken nggo ibegina maka Jesus e eme kalak si erdiate, kalak si erkeleng ate man kerina manusia, la lit kalak siibuang Yesus. Sienda teridah arah sikap sigadamen endahi Jesus, eme alu nembah erjimpuh mindo perkuah ateNa, bagepe arah kata sibelaskenna, Bicara nggit Kam, ngasup kap Kam pepalem aku (ayat 40). Sikap ras kata kalak sigadamen e tuhu-tuhu ncidahken tandaina dirina si hina.
Kalak sideban erpenulak, mbuangken kalaksi gadamen erkiteken penakit gadamen e banci langket, tapi berbeda ras sikap Jesus. Ibas ayat 41-42 ikataken mekuah ate Jesus idudurkenNa tanNa janah ijemakNa kalak gadamen ndai. Ndudurken tanNa ras ijemak Jesus kalak sigadamen e ncidahken maka Jesus tuhu-tuhu erdiate janah nggit meneken jarak ras kemungkinan resiko ilangketi. Bagepe ialoi Jesus alu ngataken Nggit Aku, malemlah kam. Keleng ate ras kuasa Jesus erbahan kalak gadamen ndai malem. Malem berarti kondisi ras statusna ipulihken jadi seri ras kalak sienterem. Pulih secara jasmani ras secara social.
Ayat 43-45 harus sifahami ibas konteks politik, ija Jesus imusuhi kalak Farisi ras guru agama Jahudi bagepe pemerintah. Emaka ilarang Jesus kalak singgo ipepalemna e ngataken man kalak sideban, aminna bage gia labo terbendung maka kalak sienggo malem e tetap erberita.
III. PENGKENAINA
Piga-piga pengkenaina:
- Tangkas teridah maka Jesus ngasup pepalem kalak gadamen e erkiteken keleng atena ras la njaga jarak ras si gadamen e (Tujun 1).
- Arah kai siibahan Jesus enda emaka ijuluki pe Jesus selaku Diaken Agung. Juluken e sekaligus merupaken ajaken guna neladani Jesus ibas ndaihiken dahin Diakoni. La pekulah-kulahna la ietehNa ras la iidahNa. Metenget kita gelah tupung lit siman diakonianken ola sipekulah-kulah la sieteh entah la siidah.
- Er-Diakoni- berarti ngangkat kalak si ndabuh asa bagesna ia ndabuh. Ndabuh ibas erbage pengertin ras penyebab, banci erkiteken penakit, papak perdalan kegeluhen ras sidebanna.Er-Diakonia mbages kepe ertina, labo setipis rutinitas ntah pe kewajiben organisasi, tapi “memulihkan”. Erkiteken sie er Diakonia banci saja la bias sekali entah dua kali, tapi ilakoken terus she ia ipulihken (Tujun 2)
- Guna mencapai hasil sie harus lit ije keleng ate, mediate ras berbuat aminna gia lit resiko. Endam siteridah adi kin ergiah-giah ibas erdiakonia (Tema).
Pdt Pribadi S Meliala, S.Th, M.M
GBKP Rg Tambun
