SUPLEMEN PA MAMRE 26 JUNI-02 JULI 2022, KEJADIN 6:17-22;7:13

Tema : KINIERSADAN ARIH

Teks   : Kejadin 6:17-22; 7:13

Tujun : Gelah Mamre :

1. Meteh kiniersadaan arih i tengah jabu Nuah.

2. Meteh “ketahanen keluarga” jadi gegeh ngalaken tantangen geluh (Pandemi Covid 19, penyakit social ras sidebanna).

Metode : Roll Play, Lomba Foto Keluarga

 

KATA PENARUH

Kiniersadaan ibas kinierbagen, bagem me kepe keberadaan kegeluhenta i tengah-tengah jabu. Bapa, nande, anak-anak; dilaki tah diberu, kinierbagen ibas biak nggeluh, hobbi, pendidiken, pola pikir, ras sidebanna. Tapi, kiniersadan ibas jabu enda seh kel pentingna segelahna kegeluhen ibas jabu banci erdalan alu mehuli. Kinierbagen si lit ingah jabu labo jadi alasen si erbahanca jabu e lanai ersada. Lit nge kiniulin ibas kinierbagen e si mabaisa kita banci ersada ibas ndalani kegeluhen si mehuli ibas jabu. Bagi tema ibas PA Mamrenta minggu enda “Kiniersadaan Arih”. Mari radu ras kita niksikisa arah Kiniersadaan Jabu Nuh erpalasken Kejadin 6:17-22; 7:13.

PEMBAHASEN

Nuah emekap sekalak bapa si setia erdalan ibas dalan Dibata dingen singena ate Tuhan. Lit telu anak dilaki ipupusna, eme Sem, Ham, ras Japet. Ibas jamanna Nuah ngenca si mehuli, janah la lit kesalahenna. Ia erdalan ibas dalan Dibata, tapi kerina kalak si deban tuhu-tuhu jahat i lebe-lebe Dibata, janah i japa pe terjadi kejahaten (Kejadin 6:8-11). Selaku sekalak bapa si patuh man Tuhan, ilakokenna alu dem kepatuhen kai si iperentahken Tuhan man bana. Tanpa banyak pertanyaan dan alasan, Nuah alu patuh ngelakoken perentah Tuhan guna erbahan sada kapal galang bagi ukuren si enggo isehken Tuhan man bana. Sura-sura Dibata emekap nelamatken Nuah ras kerina isi jabu, dingen engkernepken kalak si jahat alu er bahan banjir si mbelin man doni enda, gelah kernep kerina si nggeluh. Kasa kai si lit la banci lang mate kerina (Kejadin 6:17).

Keleng ate Tuhan tetap mbelin man kalak si erkemalangen baNa. Erkiteken si e, aminna gia ate Tuhan ngkernepken kerina si nggeluh erkiteken kejahatenna, tapi keselamaten tetap nge isehkenNa man kalak si patuh dingen erkemalangen man Tuhan. Emaka nina Tuhan man Nuh : “Bengketlah kam ku bas kapal ras ndeharandu, anak-anakndu, bage pe ras permenndu.Tamaken ku bas kapal e, sada pasang i bas tep-tep erbage rubia-rubia ras tep-tep erbage perik-perik gelah ula keri mate.Tamaken ku bas kapal e kerina erbage pangan man bandu ras man rubia-rubia ras man perik e."Ilakoken Nuah kerina kai si iperentahken Dibata man bana. (Kej. 6:18-22).

Kuga respon isi jabu Nuah nandangi perentah Tuhan e ? Sehubungen ras perentah Tuhan enda, tentu Nuah pe nurikenca man isi jabuna. Selaku sekalak bapa si erkemalangen man Tuhan, alu mehuli tentu ije lit arih-arih ibas jabu Nuah guna ngelakoken perentah Tuhan e. Ibas kinierbagen si lit i tengah jabu, tentu ibas ngelakoken perarihen terjadi erbage-bage situasi, mempertahanken pendapat, sijababen, pertentangen, banci jadi turah ka pe emosi. Tapi, amin bage gia, hasil akhirna ibas perarihen si ilakoken keluarga Nuh, teridah kel kiniersadaan arih ibas jabu Nuah, arah kepatuhen kerina isi jabu e ngelakoken perentah Tuhan. Emaka, kenca kapal enda enggo dung, bengket me ia kerina ku bas kapal si galang e, rikut pe ras kerina si isuruh Tuhan guna itamaken kubas kapal e. Bagem me jabu Nuah, tading ibas kapal e lit dekahna sada tahun (bd.Kej 7:11; 8:13), seh maka selamat ia kerina ras isi jabuna arah banjir si mbelin si enggo ilakoken Dibata. Sekalak bapa si erkemalangen man Tuhan, mabai kerina isi jabuna pe patuh ngelakoken perintah Tuhan, teridah ibas jabu e lit kiniersadan arih, mabai jabu e ndatken keselamaten si rehna ibas Tuhan nari.

APLIKASI

“Kiniersadaan Arih” enda me si jadi tema PA Mamre ibas minggu enda. Arah sekalak tokoh Nuah, kita ibabai erlajar kuga selaku sekalak Mamre si erkemalangen man Tuhan, pemimpin ibas jabu, pemimpin si ngelai bagi si enggo radu ras kita ngoratisa ibas PA Mamre minggu si lewat. Pemimpin si ngelai emekap pemimpin si mabai kiniulin man enterem jelma, emekap pemimpin si nggit ngelai alu meteruk ukur dingen tutus, si ngelai dem keleng ate, si nggit erdahin, si mabai kiniulin, si berkarakter Kristus. Selaku sekalak pemimpin ibas jabu, mabai kiniersadaan arih ibas jabu guna ngelakoken perentah Tuhan.

Ibas rangka mperingeti Hari Keluarga Nasional (Harganas) pe 29 ken ibas tanggal 29 Juni 2022 enda, mari terus si bangun Kiniersadaan Arih bas jabu sebab kiniersadaan arih ibas jabu seh kel pentingna, subuk ibas mpebelin anak i tengah jabu bagepe kerna pendidikenna terlebih ibas masa genduari tantangen siialaken pe terus berkembang misalnya penyakit sosial, narkoba, pergaulen bebas, sikap apatis, ras sidebanna. Kiniersadaan arih pe penting kel ibas ngalaken erbage tantangen jabu ibas perekonomin, kerna sakit pinakit, ibas membangun kerja sama ndahiken dahin si lit i tengah jabu, ibas nampati keluarga entah turang senina, ras sidebanna. Tentu ibas perarihen e, arus maka kita melibatken Dibata. Kerina isi jabu nggeluh ersada ras Kristus. Alu bage, aminna erbage dinamika bagepe tantangen sialaken ibas erbahan arih-arih muat si mehuli i tengah jabu, kiniersadan arih e banci tercapai, janah hasilna si lakoken alu meriah ukur sebage bentuk kepatuhennta man Tuhan. Jabu tetap paguh ibas ngalaken erbage tantangen nggeluh erkiteken penampat Tuhan. Mari sibahan pe aksi ibas keluarganta, misalna ibas merawat lingkungen bersama keluarga, nampati kalak si lit ibas kesusahen, atau si debanna. Si foto, dingen si unggah ibas media sosialta, dingen siiahken senina turangta si deban guna ikut serta ngelakokennca asa si ngasup ilakokena. Tuhan masu masu kerina jabu si erkemalangen man baNa dingen nggeluh ibas kiniersadaan arih. Amin.

Pdt. Crismori Veronika Br Ginting Manik-Runggun Sitelusada