SUPLEMEN PA MAMRE 19-26 JUNI 2022, MARKUS 10:41-45; MATIUS 7:12

Tema : PEMIMPIN SI NGELAI

Tujun : Gelah Mamre :

-Meteh kai erti sekalak pemimpin erpalasken Pustaka Si Badia ras ngasup mbedakenca ras kepemimpinan doni

-Ngasup jadi pemimpin siberkarakter

Metode : Diskusi

 

KATA PENARUH

Kepemimpian usur kel ikaitken ras kekuasaan (power) bagepe kemulian. Sekalak pemimpin ipandang sebage selakak si lit otoritasna guna mengendaliken kalak si deban si ipimpinna. Erkiteken si e, sekalak pemimpin iakap sebage sekalak penguasa si termulia. Kepemimpinan menjadi kunci pembuka bagi suksesnya organisasi. Seh kel belinna peran pemimpin ibas organisasi, termasuk i tengah-tengah gereja. Kepemimpinen i tengah-tengah gerejanta, rusur ikataken sebagai kepemimpinen Kristen. Sekalak pemimpin Kristen emekap sekalak pemimpin si ngusih Tuhan Jesus Kristus i tengah-tengah kepemimpinenna, erkiteken kepemimpinan Tuhan Jesus Kristus jadi role model i tengah gereja emekap kepemimpinan si erpalasken spiritualitas Kritus. Spiritualitas, asalna emekap ibas kata latin Spiritus ertina roh, jiwa, semangat. Spiritulitas emekap nggeluh iteruh kuasa Kesah Si Badia. Spiritualitas si imaksudken mencakup : hidup doa (hidup rohani); penghhayatan iman secara aktual dan konkret dalam kehidupan setiap hari, dan kegiatan yang mengarah kepada kebaikan. Pemimpin Kristiani emekap Peminpin Si Ngelai. Enda me siradu ras kita niksikisa arah Kitab Markus 10:41-45; Matius 7:12.

PEMBAHASEN

Bahan PA nta ibas Minggu enda epalasken Markus 10:41-45, emekap bagin ibas Markus 10:35-45. Lembaga Alkitab Indonesia erbahan judul kecil ije Pemindon Jakub ras Johanes. Ije ituriken kerna anak-anak Sebedeus emekap Jakub ras Johanes si reh ndahi Jesus janah mindo man Jesus segelahna ia duana kundul min arah kawes ras kemuhen Jesus ibas kinirajanNa. Ibas Matius 20:20-28, ijenda ikataken maka pemindon e isehken ndehara Sebedeus, gelarna Salome, nande Jakub ras Johanes. Salome enda senina Maria nande Jesus. Erkiteken si e, Jakub ras Johanes senina si pemeren ras Tuhan Jesus. Banci siidah ijenda maka hubungen perkade-kaden enda ipakeken guna mindo posisi si penting guna kundul arah kawes ras kemuhen Jesus. Jakub ras Johanes tek maka ia duana selaku kalak sitek man Tuhan, si pasti bengket kubas Kinirajan Surga e. Pemindonna kerna kundul arah kawes ras kemuhen Tuhan Jesus enda mengandung pengertin atena encidahken otoritas (kuasa), maka ia duana kalak si erkuasa lebihen asangken si debanna, bagepe hubungen kekeluargaan imanfaatken guna ndatken kekuasaan. Enda me si erbahanca ajar-ajar si sepuluh kalak nari merawa man Jakub ras Johanes. Tempa-tempa ajar-ajar si sepuluh kalak e teruken posisina asangken Jakub ras Johanes. Hebaten posisi Jakub ras Johanes.

Ngidah situasi sibagenda rupana, kuga respon Jesus ? Ibas Markus 10:41-45, si jadi bahan PAnta ibas minggu enda, isehken man banta kerna respon Jesus si penting kel si pahami selaku sekalak si jadi pemimpin ibas kegeluhenta. Tentu, masing-masing kita emekap sekalak pemimpin, baik ibas meminpin dirinta sekalak-sekalak, pemimpin ibas jabu, pemimpin ibas inganta erdahin bagepe selaku sekalak pemimpin ibas gerejanta. Respon si isehken Jesus ningetken man banta kerna kuga arusna sekalak pemimpin Kristen.

Emaka idilo Jesus ia kerina jenari nina, "Nggo ietehndu maka si iakui jadi pemerentah erkuasa nandangi rakyatna janah peminpin-peminpin rate-rate nandangi bawahenna. Tapi i bas kam la banci bage. Ise atena i bas kam jadi mehaga, ia arus jadi si ngelai nandangi kam. Ise atena jadi si arah lebe, arus maka ia jadi suruh-suruhen temanna kerina. Sabap Anak Manusia si isuruh Dibata reh labo guna ielai, tapi guna ngelai. Janah iendeskenNa KesahNa guna nebusi nterem jelma." (Markus 10:42-45) Ijenda, Jesus nehken man kerina ajar-ajarNa maka sekalak si atena jadi sekalak pemimpin arus maka jadi pemimpin si ngelai, jadi sekalak pemimpin berarti jadi sekalak si ngelai, pemimpin emekap si erdahin bagepe si ngelai.

Tuhan Jesus nehken man ajar-ajarNa maka i bas Kinirajan Surga sekalak pemimpin labo bali ras peminpin i doni enda, si erkuasa nandangi rayatna janah minpin alu rate-ate nandangi bawahenna, ate-atena saja kerinana sue ras keriahen ukurna. Sekalak pemimpin Kristen emekap sekalak pemimpin si nggit ngelai, si nggit jadi suruh-suruhen man jelma si enterem. Bagi si isehken Jesus pe kerna diriNa, Sabab Anak Manusia si isuruh Dibata reh labo guna ielai, tapi guna ngelai. Janah iendeskenNa kesahNa guna nebusi nterem jelma (Markus 10:45). Pemimpin Kristen emekap pemimpin si ngelai dingen mereken dirina guna keselamaten jelma si enterem. Pemimpin si ngelai emekap pemimpin si nggit berkorban, si mereken dirina ras kegeluhenna guna mbela anggotana bagi Jesus sendiri pe ngendesken kesahna guna nebusi enterem jelma. Teridah kel ijenda kuga Jesus selaku sekalak pemimpin si berkarakter emekap sekalak pemimpin si orientasina labo kerna keduduken (kekuasaan) entah pe kemulian, tapi mereken dirina guna ngelai alu dem keleng ate, tutus, setia, meteruk ukur, kepate, bagepe ertanggungjawab. Pemimpin si erbahan ngena ate Tuhan bagepe keriahen ukur man kalak si deban (bd. Matius 7:10)

APLIKASI

“Pemimpin Si Ngelai” enda me sijadi tema ibas PAnta minggu enda. Kepemimpinen Tuhan Jesus arus jadi usuhinta guna jadi sekalak pemimpin Kristen. Kita ngelai erkiten enggo leben kita ielai Tuhan Jesus, sekalak pemimpin si mereken kegeluhenna guna nelamatken kita kerina manusia. Ngelai emekap orat nggeluh kalak si erkiniteken man Tuhan. Piga-piga tokoh si deban pe si encidahken kuga kegeluhenna selaku sekalak peminpin si ngelai emekap Bunda Teresia si ngendesken dirina guna ngelai enterem jelma si lit ibas kiniseran, sakit, terpinggirken. Bunda Teresa reh mabai kemalemen ate bagepe nampati kalak si lit ibas kiniseran e. Tokoh si deban emekap Romo Mangunwijaya sekalak si erkiniteken ma Tuhan, si jadi pejuang nandangi kalak si nggeluh ibas kiniseran i Kali Code Yogyakarta. Bunda Teresa bagepe Romo Mangunwijaya emekap pemimpin si nggit ngelai. Kinitekenna (spiritualitasta) teridah ibas perbahanen, nggit ngelai, mabai kiniulin kubas kegeluhen enterem jelma. Sekalak pemimpin si nggit nggelai alu dem keleng ate. Kuga nge ndia ibas kegeluhenta ? Kuga nge ndia kepeminpinennta ? Pemimpin si ngelai ? Entah pemimpin si ielai ? Pemimpin si rate-ate, ate-atena saja kai pe ? Entah pemimpin si mabai kiniulin man enterem jelma, emekap pemimpin si nggit ngelai alu meteruk ukur dingen tutus, si ngelai dem keleng ate, si nggit erdahin, si mabai kiniulin, si berkarakter Kristus ? Marilah, jadi Pemimpin Si Ngelai. Mamre jadi pemimpin si ngelai subuk ibas jabu, ibas pendahin bagepe ibas pelayanen. Tuhan masu-masu. Amin.

 

Pdt. Crismori Veronika Br Ginting Manik

GBKP Sitelusada