SUPLEMEN PA MAMRE 05-11 JUNI 2022, MAZMUR 133:1-3
Tema : Kiniersadaan Empeturah Kegeluhen
Teks : Masmur 133:1-3
Tujun : Gelah Mamre :
1. Ngidah gambaren nggeluh si ersada si empeturah keriahen, kiniulin geluh ras pasu-pasu Dibata.
2. Jadi pelopor kiniersadaan guna mpekena-keba doni ingan Dibata mereken pasu-pasuNa.
Metode : Diskusi
KATA PENARUH
Lit peribahasa si ngatakenca “Bersatu kita teguh, bercerai kita runtuh”. Peribahasa enda nehken pengajaren man banta kerna pentingna kiniersadaan ibas kegeluhenta subuk ibas kegeluhenta i tengah jabu, bas pendahin bagepe ibas dahin-dahin pelayanen i tengah-tengah gerejanta. Arah litna kinioersadaan melala tuhu dahin-dahin si banci idahiken kita. Ibas Bahan PA Mamre minggu enda, mari radu ras kita erlajar kerna “Kiniersadaan Empeturah Kegeluhen”. Kuga pentingna kiniersadaan guna nelamatken doni enda ras kerina isina. Mari radu ras kita niksiki Kata Dibata ibas Masmur 133:1-3.
PEMBAHASEN TEKS
Masmur 133 enda nuriken man banta kerna kiniersadaan jabu bangsa pilihen Tuhan. Ibas kinata kegeluhen kalak Israel selaku bangsa pilihen Tuhan igejapkenna maka kiniulin kegeluhen enda banci idatken arah kiniersadaan kegeluhen ibas jabu.
Ayat 1. Andiko ulina ras senangna, adi kalak si ersenina ersada perarih!
Pemasmur nuriken kerna kuga ulina ras senangna adi kalak si ersenina ersada perarih. Tentu saja arus lit upaya siilakoken segelahna kalak si ersenina ersada perarih. Erkiteken, lit kang si terjadi ersenina tapi la ersada arih, rubati, seh maka lit ka pe si enggo lanai erkuan dingen si musuhen. Pemasmur menekanken kel kerna kiniersadaan e. Kalak Israel si lit tupung paksa si e lit 12 suku. Tentu saja ibas kinierbagen suku si lit i tengah-tengah bangsa Israel banci erbahanca muncul konflik antar suku. 12 suku si imaksudken ijenda emekap ibas 12 anak-anak Jakub nari. Ibas prinsipna, 12 suku ei, emekap 12 kalak si ersenina. Di kune la ersada perarih, banci mis italuken musuh erkiteken lemah pertahanenna. Tapi, adi lit kiniersadan, bangsa e jadi bangsa si megegeh ibas ngalaken serangen musuh. Erkiteken si ei me maka ijenda isehken segelahna kalak si ersenina arus ersada perarih, si tentu saja mabai kiniulin ras kesenangen.
Ayat 2. Bali kap e ras minak wangi si meherga, si icurcurken ku takal Harun, maler ku janggutna, maler ku kerahung baju jubahna.
Ibas bagin enda, Pemasmur pe tetap nehken man banta kerna kalak si ersenina ersada perarih si iumpamaken bagi minak wangi si meherga, si icurcurken ku takal Harun, maler ku janggutna, maler ku kerahung baju jubahna. Harun emekap sekalak imam. Guna jadi sekalak imam, emaka Harun harus iurapi alu make minak wangi. Minak si ipake guna mengurapi imam emekap minak meherga si enggo kin ikhususken guna mengurapi imam. Pengurapan siilakoken nandangi sekalak imam menandaken penyucian, pengudusan dan pengkhususan Allah bagi orang yang diurapi untuk melakukan pekerjaan Allah.
Maler ku janggutna, maler ku kerahung jubahna enda encidahken maka minak pengurapen enda berlimpah-limpah. Bagem me pe pasu-pasu Tuhan ei berlimpah ruah ibas kegeluhenta, khususna emekap ku tengah-tengah kegeluhen kalak siersenina ersada perarih. Pasu-pasu si ibereken Tuhan e sipakeken guna ndahiken dahin-dahin Dibata si idahiken ibas kegeluhenta si tep-tep wari selaku sekalak sitek man Tuhan.
Ayat 3. Ntah bagi embun i Deleng Hermon, si nusur ku deleng-deleng Sion. Ije me Tuhan erpadan mereken pasu-pasuNa, kegeluhen si la erkeri-kerin.
Embun i deleng Hermon enda menggambarken kerna suasana kegeluhen si lit ibas kemalemen ate. Kalak si ersenina ersada perarih ndatken pasu-pasu Tuhan si mabai kemalemen ate. Kemalemen ate e pe isehken ka ku kalak si deban.Deleng Hermon emekap deleng si meganjangna I daerah Palestina. Puncak Deleng Hermon itutupi salju. Ibas kuasa Dibata si mbelin, embun I Deleng Hermon nari banci nusur ku deleng-deleng Sion. Bagem me pasu-pasu Tuhan igejapken dingen ipepaler ka pe man kalak si deban. Kegeluhen kalak si ersenina ersada perarih ndatken pasu-pasu Tuhan ibas kegeluhenna janah ia pe jadi pasu-pasu Tuhan man kalak si deban.
Bagem me Pemasmur nuriken arah Masmur 133 enda, kuga kita selaku kalak sitek man Tuhan Jesus Kristus terus mengupayaken kegeluhen ersenina ersada perarih. Alu bagei me sidatken pasu-pasu Tuhan, segelah kita pe banci jadi pasu-pasu Tuhan man kalak si ikelewetta.
APLIKASI
”Kiniersadaan Mpeturah Kegeluhen” enda me si jadi tema PA Mamre ibas minggu enda si ngajuk kita kerina segelahna ibas kegeluhenta ersenina ersada perarih, gelah alu bage, Tuhan pe masu-masu kegeluhennta guna jadi pasu-pasu man enterem jelma. Labo terjeng man jelma saja tapi pe man kerina tinepa Dibata si lit i doni enda.
Salah sada tokoh si kegeluhenna banci jadi pasu-pasu man enterem jelma bagepe erbage tinepa Dibata i doni enda emekap Fransiskus Asisi si itandai pe sebage sekalak si ngajarken maka i bas kegeluhenta arus lit pertobatan ekologis. Lanai kita encedai doni inganta tading. Doni ras kerina isina emekap seninanta, sabab kita enda ras tinepa si debanna nggeluh ersenina selaku tinepa Dibata. Manusia itepa Dibata ibas wari pe-6 ken, emekap ibas wari perpudina kel kenca IA nepa kerina isi doni enda. Emaka manusia me jadi anak si nguda ibas keluarga tinepa Dibata. Batang kayu, rubia-rubia, ras kerina isi doni enda emekap seninanta. Sue ras Bahan PAnta Masmur 133:1-3 arus maka selaku si ersenina arus nggeluh ersada perarih. Alu bage, kita selaku manusia pe njagai kerina “seninanta” enda alu mehuli.
Sehubungen ras Tema Tahun Gerejanta ibas tahun 2022 enda, emekap Kreatif Merawat Lingkungan” terlebih pe ibas Tanggal 5 Juni si peringeti sebage Hari Lingkungen Hidup, kita kerina ijemba erbahan Geraken Bersama i tengah-tengah gerejanta. Radu ras kerina Persekutuan Kategorial KAKR, Moria, Mamre, Permata, Lansia, bagepe PJJ, rikutken Pandita, Pertua ras Diaken terus aktif muat bagin merawat lingkungennta. Sibenaken ibas dirinta, jabunta, lingkungenta, gerejanta. Mela melket, enda jadi biak geluhta seh maka tetap si jaga kebersihen. Kai nari saja si banci si lakoken ? Ula encedai kerangen sebab kerangen e enggo jadi rumah man rubia-rubia-rubia bagepe batang kayu. Alu litna kerangen, persediaan launta pe banci tetap lit dingen banci menahan lau seh maka la jadi banjir. Lakokenlah alu mehuli programnta kerna merawat lingkungen i tengah-tengah gerejanta. Mari sibenakenlah ngelakokenca. Tuhan masu masu kita kerina.
Pdt. Crismori V. Br Ginting Manik
GBKP Sitelusada Bekasi
