SUPLEMEN PA MAMRE 03-09 APRIL 2022, LUKAS 2:36-40

Teks :

Lukas 2:36-40

Tema :

Suari Berngi Muji Tuhan

Tujun : Gelah mamre

• Meteh keriahen Saitun eme tetap muji Tuhan erkiteken lit pengarapen.
• Muat bagin i bas keriahen Saitun alu erbahan aksi peduli Saitun i bas rangka HUT Saitun GBKP.

Metode  : Diskusi

 

1. Saitu i tengah-tengah Gerejanta GBKP e me salah sada kategorial sijadi anggotana e me orang tuanta sienggo lansia ntahpe Lanjut Usiana. I bas segi umur ras pengalamen nggeluh baik i bas pendahin, peradaten, jabu ras pendahin bagepe pendahin gereja tentu orangtuanta enda nggo cukup berpengalamen. Seh asa genduari pe kerina orang tuanta sitergabung i bas Saitun enda e me sesepuh si sangat erguna man Gerejanta GBKP. Erkiteken i bas tanggal 15 April enda me wari jadi kategorial Saitun enda si pe-7 ken, patut selaku mamre tetap mendukung kerina orang tuanta i bas kategorial singuda enda.

2. Nimai e me sada dahin si membosanken ras rusuren kita la saber i bas ngelakokenca. Tapi i balik kesabarennta i bas nimai, tentu ilatih kita kubas erti kesetian ras erpengarapen.

Simeon enggo ndekah nimai janji Tuhan kerna kerehen mesias simaba pembesasen man bangsana. Ia tek man Kesah Sibadia mak iidahna me Mesias sope kematenna. Selain Simeoan, Hana pe eremeriah ukur nimai Mesias. Ise hana? Hana e me sekalak nabi dideru (nabiah) sienggo metua. Ia erpuasa ras ertoto alu setia. Baik Simeon ras Hana e me kalak sisetia. Kalak enda jadi contoh uga erti erkiniteken situhu-tuhu. Daging ras umur sienggo metua tapi sincidahkenna e me pengarapenna sitetap ras jadi contoh man banta. Siidah uga kesetian Simeon ras Hana aminpe ndekah nimai janji Dibata labene pengarapenna lako jumpa ras Jesus.paksa jumpa ras Jesus ikatakenna bujur man Dibata, sebab nggo jumpa ras Jesus sienggo ndekah itimai bangsa e.

3. Selain kesaksin sibanci siidah arah dua tokoh baik Simeon ras Hana, Jusuf pe sangat berperan i bas ndalanken pedah Dibata. Jususf selaku perbulangen Maria ertanggungjabab i bas mabai anak ras ndeharana ndalanken tanggungjabab eme mabai anak jabuna erkiniteken.

4. I bas HUT si 7 ken enda, arah keriahen Hana muji Tuhan, baik arah ertoto ras erpuasa mereken contoh maka lapernah itadingkenna Rumah pertoton, tentu enda ka me arus silumbageken selaku mamre e me imam uga njadiken gerejanta ingan perjumpaanta ras Tuhan. Memang kategorial Saitun termasuk nguda denga bas gerejanta GBKP, tapi arah bidang pengalamen nggeluh mamre arus tetap erlajar uga makeken erti ermediate bagepe erpemere. Selaku mamre perlupe sidukung kategorial enda, arah aksi misalna, erbahan kursi busa man orang tuanta enda sebab daya tahan lako kundul pe nggo mulai erkurangna apalagi makeken kursi kayu. Selain epe perlu iperdiateken closeet kamar mandi gerejanta, perlu siban closeet duduk raspe lit ban pegangenna, ras sidebanna. Mari ersada ukur kita gelah i bas HUT Saitun si 7 ken enda malem ate orangtuanta cawir metua ia jadi penggurunta, bagepe ketuahen ras ndatken kejuah-juahen kita kerina anak-anak ras kempu-kempuna. Selamat HUT si 7ken Saitun GBKP.

Pdt. Walder Mazmur Ginting-Rg. Karawang