SUPLEMEN PA MAMRE 13-19 FEBRUARI 2022, KOLOSE 1:15-20
Tema : Kerina itepa arah Kristus
Ogen : Kolose 1 : 15-20
1. KATA PENARUH
Megati lit pemahamen bahwa Dibata si telu sada e mulai berlaku ibas zaman Padan Simbaru. Tempa-tempa ibas zman Padan Sindekah hanya Dibata Bapa saja si lit. Tapi pemahamen enda banci ilurusken alu ngerenungi bahwa Dibata reh kudoni enda ibas rupa Yesus Kristus. Enda ngataken maka Yesus Kristus e merupaken Dibata sireh ibas rupa manusia alu tujun ngerembakken diriNa man manusia gelah erpayona penandai manusia kerna Dibata. Jenari kenca 10 wari Yesus nangkih ku surga nusur Kesah Sibadia guna nemani ras mere pergegeh man manusia. Kata “nusur” nuduhken maka Kesah e enggo lit sope nusur.
Hal enda banci ipetangkas alu mperdiateken Kejadin 1 kerna turi-turin penciptaan. Ibas turi-turin penciptaan e jelas icidahken ibas ayat 2 “kesah Dibata….”, bagepe ibas ayat 3, 6, 9, 12,14, 20, 24 lebih jelasna bas terjemahen Bahasa Indonesia ikataken “Berfirmanlah Allah”. Adi si hubungken ayat enda ras Johanes 1:1-14 maka tangkas kal bahwa Firman (Kata) e enggo jadi (reh ibas rupa manusia Yesus Kristus). Peran Dibata sitelu sada ibas mula-mula doni enda lebih tangkas pe banci siidah tupung Dibata njadiken manusia ibas Kejadin 1 : 26. Ije ipakai kata jamak…. Sijadiken,…..tempasTa….seri ras Kita.
2. ISI/TAFSIREN
Kerna sienda me siipetangkas Rasul Paulus man perpulungen Kolose ibas bahan ogenta. Erbage-bage kesimpulen penandai kalak sienterem kerna Yesus Kristus. Lit singataken Yesus e sekalak nabi, sekalak tokoh agama. Tapi Rasul Paulus negasken maka Yesus eme Dibata siteridah. Adi cara hadir Dibata ibas Padan Sindekah hanya berupa sora, entah pe arah malekatNa (Abraham, Jakub) bagepe jumpa ayo ras Musa. Tapi ibas Yesus Kristus, Dibata e ncidahken diriNa man doni enda, la hanya man kalak tertentu, gelah itandai doni enda Dibata e arah Yesus Kristus. Alu bage Yesus Kristus e nggo lit ope denga ijadiken kerina sinasa lit (ayat 15). Yesus Kristus eme Dibata sendiri, singgo lit ope denga ijadiken kerina sinasa lit. Rupa manusia Yesus kristus e hanya sebagai bentuk kehadiren Dibata gelah tandai manusia e Dibata. Yesus Kristus e njadiken sinasa lit baik i surga bagepe i doni, njadiken baik siteridah bagepe silateridah (16-17). Erkiteken kiniersadan Dibata ras Yesus Kristus emaka doni enda harus meteh maka kalak si nulak Kristus e seri kap ras nulak Dibata sendiri (bdk Yohanes 10:16).
Kristus e labo hanya sinepa, tapi pe Kepala Gereja, ulu kegeluhen. Kristus pe jadi penebus man doni si nggo ndabuh kubas dosa e. Labo lit ise pe si nggo mate guna nebus doni enda. Kristus sidem kuasa ras dem keleng ate si nggo mate guna tinepaNa janah nggo keke tanda kemenangenNa (ayat 18-20)
3. PENGKENAINA
Alu bage, adi sihubungken ogenta enda ras lingkungen hidup, banci sitarik piga-piga perenungen:
- Yesus Kristus erkeleng ate kal nandangi kerina tinepaNa
- Ncedai tinepaNa berarti la ngergai Sinepasa
- Mpekena-kena tinepaNa merupaken salah sada buah kiniteken man Sinepasa
Enda berarti, pemahamenta kalak sitek man Kristus kerna kearusen ngerawat lingkungen lebih mbages asa kalak sdeban. Adi kalak sideban ngerawat lingkungen atas dasar alasen Kesehatan, keindahan, kebersihan. Kita ngerawat lingkungen atas dasr kiniteken, eme dalam rangka nghamati Dibata ibas yesus Kristus selaku Sinepa.
Pdt Pribadi S Meliala-Rg. Tambun
