SUPLEMEN PA MAMRE TANGGAL 19-25 MEI 2019, OGEN I KRONIKA 11:20; PERB.RASUL 23:1
Ogen : 1 Kronika 11 : 10 – 25; Perb. Rasul 23 : 1
Tema : “Ngelai/ Erdahin Alu Pusuh!”
• Kenca Saul mate ibas peperangen ngadapi bangsa Pilisti maka minter Daud iangkat jadi raja Israel. Dingen minter icidahken dukungen kerina bangsa Israel nandangi Daud. Daud itetapken jadi kepala nandangi kulana bangsa Israel, Daud itetapken jadi permakan sienjagai rarasen bangsana kerina. Enda me gambaren sinituriken ibas kitab Kronika enda.
• Arah nats enda icidahken loyalitas tentera Daud siterberita kengasupenna erperang. Ibas bagin tentera Daud lit telu kalak si utama dingen igelari “si telu tentera si terberita”. Kalak enda terberita erkiteken kesetianna nandangi raja Daud.
• Sipemena arah "Si Telu tentera terberita" me Jasobeam i bas terpuk Hakmon nari; ia me peminpin "Si Telu". Alu make lembingna ilawanna telu ratus kalak janah ibunuhna si telu ratus kalak e i bas sada peperangen.
• Sipeduaken arah "Si Telu tentera terberita" eme Eleasar anak Dodo, i bas terpuk Ahoh nari. Erperang ia arah pihak Daud ngelawan bangsa Pilisti i peperangen i Pas Dammim. Eleasar sanga i bas juma dawa tupung bangsa Israel mulai kiam. E maka ia ras teman-temanna ertahan i tengah juma e, jenari ilawanna bangsa Pilisti. Ibereken TUHAN man bana kemenangen si mbelin.
• Sipeteluken la ituriken ibas kitab 1 Kronika enda, la tersurat gelar kalak simbisa sipeteluken tapi tersurat ibas 2 Samuel 23:11 “Kalak si peteluken i bas si telu si terberita e, e me Sammah anak si Age i Harar nari”.
• Selain "Si Telu tentera terberita" lit ka tentera si igelari "Si Mbisa Telu Puluh". Si Abisai, peminpin "Si Mbisa Telu Puluh". Ia erperang alu lembing ngelawan telu ratus kalak janah ibunuhna kerina, e maka ia jadi terberita i bas "Si Telu puluh". Ia si terberitana i bas "Si Telu puluh" e, e maka ia jadi peminpinna; tapi la bagi "Si Telu" e kal ia terberitana.
• Selain Abisai lit ka sekalak siterberita ibas "Si Mbisa Telu Puluh" eme Benaya anak Joyada i Kapsel nari; piga-piga kali teridah kinirawanna, termasuk munuh dua puanglima kalak Moap. Pernah sekali lawes ia ku bas lubang si mbages sangana nusur es, janah ibunuhna sada singa. Ibunuh pe sekalak bangsa Mesir, sekalak si mbestang, gedangna lebih dua meter, ersenjataken lembing si seh kal galangna. Benaya ngelawan bangsa Mesir e alu ciken, isintapkenna lembing kalak Mesir e i bas tanna nari, jenari ibunuhna kalak Mesir alu lembing e ka. Itamaken Daud ia jadi kepala pengawal pribadina.
• Daud ndatken dukungen Tuhan bage pe dukungen teman-temanna. Salah sada contohna ituriken maka Metedeh kal ate Daud kutana, e maka nina, "Merincuh kal aku sekalak maba lau i bas sumur i pintu gerbang Betlehem nari!" Situhuna Daud erkanam-kanam, labo arapkenna teman-temanna empertaruhken kesahna guna ngelegi lau e. Tapi teman-temanna nanggapisa alu serius, “E maka teluna tentera si terberita ndai erpala-pala ngepari kemah bangsa Pilisti e, itimbana lau i bas sumur e nari, jenari ibabana mulih man Daud”. Kenca iberekenna man Daud maka Daud tersengget, la ia nggit minem lau e, iamburkenna jadi persembahen man TUHAN , nina, "Asa ndigan pe la aku nggit nginemsa, sabap seri kap e ras minem dareh kalak si ngasamken kesahna muat lau e!" Bage me ketutusen ras pelayanen “teluna tentera si terberita e” nandangi Daud. Ertina, enggit ia ngasamken kesahna guna Daud. Tapi Daud pe labo ngarapken bage, sebab Daud pe empertaruhken kesahna guna bangsana. Jadi ijenda me gegeh bangsa Israel e, ibas kiniersadanna sienteguh bage pe Tuhan masu-masu kiniersadan kalak enda.
• Adi Daud ndatken dukungen arah teman-temanna bangsa Israel, sebalikna Paulus ndatken perlawanen arah teman-temanna bangsa Israel. Paulus ihakimi erkiteken kinitekenna man Tuhan dingen erkiteken pengarapenna nandangi kekeken arah simate nari. Nina Paulus kempak anggota-anggota sidang e, "O senina-senina! Seh i bas wari enda aku tetap nggeluh alu pusuh peraten si bersih i lebe-lebe Dibata." Tapi Ananias, e me Imam si Mbelin, nuruh kalak si tedis i deher Paulus marap Paulus. Ertina sitik pe la iergaina kata-kata Paulus enda, kai pe sinibelaskenna akapna enjuruken Dibata. Amin bage gia Paulus tetap engkuasai dirina, pusuhna tetap tertuju kempak Tuhan, mekuah atena ngenehen penolaken bangsana nandangi Tuhan Jesus. Paulus pe situhuna enggit empertaruhken dirina guna keselamaten bangsana. Nina Paulus ibas Roma 9:3 “Erkite-kiteken seninangku si sada bangsa ras aku. Adi banci lah labo kuakap dalih aku gia isumpahi Dibata dingen sirang ras Kristus adi alu bage banci kusampati bangsangku e”. La tersipati kita, uga maka bage kel ulina pusuh Paulus nandangi temanna sebangsa.
• Temata sekalenda ngataken “Ngelai/ Erdahin Alu Pusuh!” eme spiritualitas Mamre GBKP. Sebaba siidah sekalenda si telu tentera terberita, si dua kalak arah si mbisa telu puluh, raja Daud bage pe Paulus eme kalak-kalak simbereken dirina guna ngelai, enggit ngasamken kesahna guna teman-temanna. Jadi la sekedar kata siterbelas tapi teridah buktina ibas sikap ras perbahanenna. Maka dahinta ibas erkiniteken man Tuhan guna encidahken keleng ate situhu-tuhu man Tuhan ras man teman-temanta. Amin.
Pdt. Sura Purba Saputra, M. Th
GBKP Harapan Indah
