SUPLEMEN PA MAMRE TANGGAL 29 APRIL - 05 MEI 2018, OGEN KELUAREN 13:17-22

Tema:

Nggejapken Penemani Dibata Ibas Kegeluhen si Tep-tep Wari

I. KATA PENARUH
 La sitik jelma bas doni enda meraguken penemani Tuhan bas geluhna adi kune kenca mberat perbeben sinihadapina. La ka sitik jelma erkiteken kinilasabarenna nimai penampat bas Dibata nari nilah ibas dalan Dibata nari dingen ngelakoken sila ngena ate Dibata bas doni enda. Siinget denga nge sekalak pembantu rumah tangga i Amerika Serikat si banci masuk ku Gedung Putih dan menjadi salah satu penasehat (staff khusus) kepresidenan Amerika serikat Barack Obama? Mungkin nggo ikhotbahken pe, mungkin nggo sioge pe bas internet sekalak diberu Indonesia sigelarna Immatul Maisaroh.Janah ia ijadwalken erpidatoi lebe-lebe delegasi Konvensi Nasional Partai Demokrat Amerika Serikat,siilakoken i Kota Philadelphia, Negara Bagian Pennsylvania tanggal 26 Juli 2016 si lewat.Ia warga RT 24 RW 03 Dusun Krajan, Desa Kanigoro, Kecamatan Pagelaran, Kabupaten Malang, Jawa Timur. Ia tubuh i Kanigoro 26 Maret 1980 sebage anak sintua ibas telku ersenina.

 Adi gundari nen kalak ia tuhu-tuhu sukses ras senang naring kapna, tapi adi sinen kisah kegeluhenna tuhu-tuhu menyakitken. 19 tahun si lewat ia berencana erdahin ku Hongkong tapi penyalur naruhken ia ku Amerika Serikat. Janah i Amerika Serikat labo keriahen datna tapi siksaan. Ia i strika majikenna, ipekpekilah ras sidebanna. Paksa ia ipekpeki e me ngadung ia janah berusaha ia gelah lit simbebasken ia ibas rumah majikenna nari gelah kabur. Seh dungna masukkenna surat ku tas pembantu rumah tangga sebelah rumahna gelah isehken man pemerintah amerika serikat dungna ia ibebasken janah seh dungna banci ia erdahin ibas komisi perlindungan perempuan ras buruh i Amerika serikat seh dungna jadi staff khusus kepresidenan barack Obama.

 Bagem megati bas kegeluhenta enda, ibas lanai lit dalan e megati kel lanai terkelihken kita si erbahansa melala jelm sirang jabuna,stress, gila seh lit bunuh diri pe. Emaka bahan PA Mamre enda ngajari ras mereken pengangkaan man banta gelah sigejapken penemani Tuhan bas kegeluhenta si teptep wari. Arah bahan PA Mamreta enda pe erlajar kita kerna pengalamen kegeluhen siihadapi kalak Israel. Uga penemani Dibata kalak Israel ras uga penggejapen kalak Israel kerna penemani Dibata perdalanenna Mesir nari ku Taneh kanaan

II. PEBAGESI PENGANGKAAN KERNA TEKS
• Ibas Keluaren 13:17-22 enda mulai me ituriken kerna turi-turin perdalanen bangsa israel arah padang gurun kempak taneh Kanaan. Ibas Pustaka si Badia ikataken maka Dibata me si negu-negu bangsa Israel i taneh Mesir nari, Yos 24:17; Ams 2:10,3:1; Mik 6:4; Maz 81:11. d) Melewati Laut Teberau (13:17-14:31).

• Turi-turin kerna perdalanen bangsa Israel imulai ibas Keluaren 12:37 janah ibas pasal 13 enda iterusken ka. Situhuna lit nge dalan pintas si langsung menuju ku Palestina i Mesir nari melewati pantai si letakna i Gaza tapi jalur sienda erbansa melala benteng Mesir i tengah dalan ras mengharusken bangsa Israel ertempur janah bangsa e lenga siap secara jasmani ras kejiwaan. Emaka ibas perkuah ate Dibata si mbelin Dibata negu-negu bangsa e arah dalan si deban.

• Bangsa Israel la ibabai Dibata langsung arah taneh kalak Filistin eme dalan tercepat guna banci seh ku Taneh iijanjiken Dibata. Tapi sebalikna Dibata memimpin bangsa Israel erputar arah dalan si dem alu tantangen eme padang gurun si arus idalani ras Laut Teberau si arus iseberangi. Tentu Dibata ngelakoken sienda erkiteken pertimbangen Tuhan sendiri. Sura-sura Dibata ula min bangsa e pagi menyesal ras mulih ken ku Mesir erkiteken arus ngadapi tantangen si la ngasup bangsa e ngadapi sa (bertempur melawan bangsa Filistin si megegeh ras nggit erperang alu senajata lengkap).

• Dibata tuhu-tuhu ngangka maka bangsa Israel e eme mantan budak si lenga siap ras lenga terlatih guna erperang (ay. 18b). Aminna gia perdalanen bangsa e agak berputar tapi Dibata la pernah nadingken bangsa e. Dibata hadir ras bangsa e arah tiang awan ibas ciger wari (ayat 21-22) gelah bangsa e la kapna melas ras tiang api ibas berngi gelah bangsa e ula kebergehen (di padang gurun perubahan suhu pada siang dan malam hari biasanya sangat tajam).

• Secara manusia mungkin bangsa Israel enggo siap berperang (ayat 18) tapi bas mata Dibata bangsa e lenga siap, bangsa e lemah denga secara mental ras fisik. Mental bangsa e mental budak denga si nukah kel menyerah ras nukah putus asa. Fisik bangsa e pe fisik sekalak budak pembuat batu bata si lalit skillna entah pe kahlian berperang. Tentu alu bage lenga ia ngasup ngelawan tentara Mesir entah pe tentara Filistin si enggo ndekah kel mahir erperang. Janah peperangen tanpa persiapen mpeturah penyesalen ras banci maba mulihi kubas perbudaken

• Ieteh Dibata katawari paksa si tepat ndigan bangsa Israel e enggo siap erperang, emaka adi sibaca perikop seterusna tuhu-tuhu dungna bangsa e erperang ngelawan bangsa Amalek ras bangsa Israel e menang (Keluaran 17:8-16).

III. PENGKENAINA
 Temata eme NGGEJAPKEN PENEMANI DIBATA IBAS KEGELUHEN SI TETEP WARI. Memang adi siukuri secara manusia banci mamang ateta ernen Tuhan sebab tempa-tempa labo kita temanina. Ija Dibata sendiri ndilo Musa gelah Musa nggit isuruh Dibata mbebasken bangsa israel. Aminna gia aku la ngasup nina Musa tapi Dibata tetap nurh Musa. Tapi kenca nggit Musa ndahikenca dingen enggo seh ia i Mesir dingen ipsehna man Raja Foiraun gelah ibebaskenna bangsa Israel, tapi ipemersik Dibata ka ukur raja Firaun gelah ula ibere raja Firaun bangsa e lawes (Kel. 4:21). Bagepe kenca iban Dibata tulah man bangsa Mesir emaka ibereken raja Firaun bangsa Israel e lawes tapi kenca bangsa e lawes Mesir nari bas perdalanen ikerasken Dibata ka ukur raja Firaun gelah iayakina bangsa Israel e (kel. 14:4).

 Tapi kenca siterusken ngogesa kepeken ate Dibata gelah iidah bangsa Israel e uga erkuasana Dibata nandangi doni enda ras kerina isina. Alu bage bangsa Israel e la hanya terjeng lawes Mesir nari tapi arus min paguh kerina kinitekenna. Bageme pe ibas kegeluhenta enda, maun-maun siakap Dibata la megiken pertotonta erkiteken beratna perbebenta padahal Dibata tetap erdahin ibas kerina dampar kegeluhenta guna kiniulin kalak sierkiniteken man baNa (bnd. Roma 8:28).

 Emaka arah tema PA Mamre ta enda nuriken man banta maka situhuna Tuhan e tetap nge nemani kegeluhen kalak si erkiniteken man Dibata dingen la pernah itadingkenNa. Hanya saja cara Dibata engkelengi manusia la seri ras cara manusia engkelengi. Mari dage selaku imam itengah jabu gelah nggit kita mpebagesi penandaita kerna Dibata ras mpebagesoi penandaita kerna Dibata e gelah siangka uga cara Dibata nemani ras engkelengi kalak si erkiniteken man baNa. Sebab penandaita man Dibata menentuken sikapta erDibata e. Uga gia situasi kegeluhenta gejapkenlah Dibata ngenca meteh rancangen si mehuli man banta eme rancangen damai sejahtera labo rancangen si la mehuli. Bagi kata Dibata ibas Yeremia 29:11, Aku ngenca meteh sura-surangKu nandangi kam, eme gelah kam senang labo gelah kam cilaka. Rencanangku eme mereken wari si pepagi bagi siiarapkenndu”. Amin

 

Pdt. Jaya Abadi Tarigan

GBKP Runggun Bandung Pusat