SUPLEMEN PJJ TANGGAL 09-15 FEBRUARI 2025, KEJADIN 28:16-22

“KUBEREKEN SEPERSEPULUH ASA SI IBEREKEN TUHAN”

Kejadin 28 : 16 – 22

(Persepuluhen)

  

I. Kata Perlebe

Sekali ibas tep-tep tahun bimbingen PJJ-ta ngerana kerna persembahen persepuluhen. Arah Kata Dibata si jadi palas kerna persembahen persepuluhen ngerana Tuhan ngajari kita gelah reh tangkasna man banta kerna persepuluhen dingen reh teremna ngawan ni perpulungen terlebih serayan-serayan Tuhan (pandita, pertua ras diaken) nehken persembahen persepuluhenna man Tuhan. Uga enggo realisasina ibas tahun ku tahun? Reh teridahna ras reh erkualitasna ntah lenga? Petelu kaliken kita er-PJJ tahun si mbaru enda minter ngerana kerna persepuluhen. Si sedari maka lenga bo merari kita nehken persepuluhenta. Mberat denga deba iakap ngawan nehken persembahen perpuluhen. Adi irataken mungkin 10% seh 15% denga ngenca anggota ngawanta ras serayan nehken (bagin) perpuluhenna. Deba runggun banci lebih, tapi mbuen denga lenga seh 10% pe. Emaka mari ula erleja-leja erlajar gelah reh ngasupna kita nehken persepuluhenta sebage tanggung-jabapta man Tuhan.                             

II.   Isi

Bas perdalanenna lawes i kutana nari menuju kuta mamana i Mesopotami, Jakup anak Isak seh i Betel. Jakup kiam bas rumah bapana nari guna nelamatken diri bas ancamen seninana Esau. Erkiteken nggo berngi emaka ije me Jakup medem. Ibuatna sada batu jadi bantalna medem. Tupung ia medem ernipi ia, ngerana TUHAN janah ipetegas Dibata man bana bahwa Dibata si nemani, nampati dingen njaga kawali ia. Dibata pe masu-masu Jakup ras kesusurenna pepagi. Dibata denggo mbaba ia mulihi ku taneh inganna ngadi ras medem e alu selamat. Dibata la pernah nadingken Jakup. Pepagina lampas erpagi-pagi kenca medak Jakup, takjud ia dingen mbiar pe man Dibata si nggo reh ras ngerana man bana arah nipi. Emaka ibuatna batu si ibantalkenna ndube jenari ipajekkenna jadi sada peringet-ingetten. Jenari iamburkenna minak Saitun sebage tanda batu e jadi ingan si badia man Dibata. Batu ras ingan e ipeserap Jakup jadi sekerajangen Dibata. Jenari ibahan Jakup gelar ingan e Betel si ertina ‘Rumah Dibata.’ Kenca si e ersumpah Jakup man Dibata. Ibas sumpahna iban Jakup 4 tawaren/ syarat (adi …, maka …) man Dibata eme: sipemena, adi itemani Dibata ia. Peduaken, adi ikawaliNa ia bas perdalanenna. Peteluken, adi iberekenNa pangan ras uis. Peempatken, adi selamat ia mulih ku rumah bapana. Kune pemindon si empat enda isehi Tuhan emaka Jakup ngataken 3 tindaken/ perbahanen man TUHAN. Pemena, TUHAN ibahan Jakup jadi Dibatana. Peduaken, batu peringet-ingetten si ipajekkenna dingen iminakina i Betel ijadikenna jadi Rumah Dibata. Sipeteluken, Jakup erpadan mereken persembahen persepuluhenna man Dibata bas kasa kai si ibereken Dibata man bana.

III.     Pengkenaina

1. Kesetian ersembah (beribadah) man Tuhan, la terpisahken ras kesetian nehken persembahen persepuluhen man Tuhan. Ersembah ras nehken persembahen termasuk persepuluhen e sada kiniersadan (kesatuan) kap. Perintah Dibata lako nehken persembahen persepuluhen tetap silakoken gia e i bas Padan Si Ndekah. Sikap Tuhan Jesus kerna persembahen perpuluhen jelas ibas Matius 23:23d nina, “Si enda (persepuluhen) arus idalankenndu alu la ngelupaken si debanna”. Tuhan Jesus mpersingeti mulihi inti Undang-undang Dibata eme ndalanken keadilen, nehken keleng ate, ras kinibujuren.
2. Tema: “KUBEREKEN SEPERSEPULUH ASA SI IBEREKEN TUHAN.” ‘Mere’ e me perbahanen si mehuli, si ngena ate Dibata ras manusia. Mereken persepuluhen eme respon (jawapen) nangdangi pasu-pasu ras penampat Tuhan man banta. Ngalo lebe maka mere. Ibere guna mere. Tuhan nggo leben mere rejeki man banta, jenari isuruhna kita mere. Emala ola si tahan, ola si pepulung man banta saja. Ola kita pelit, ola la nggit mere. Kita mere man Tuhan sabab nggo leben kita ngalo bas Tuhan nari. Tuhan nggo masu-masu pendahin, pencarin ras usahata. Erkiteken kita nggo ngalo emaka si kataken bujur man Dibata alu nehken persembahen persepuluhenta.
3. La bas ngalo ngenca meriah ukurta tapi bas mere suhsah ras gulut ukurta. Kalak si ngalo ngenca jenari kisat mere eme kalak si la nggejapken pemere Tuhan. Bekas beluh, gegeh ras pemetehna saja ngenca akapna kinilitenna. Kita mere erpalasken kai si lit ibas kita, labo erpalasken kai si la lit. Arah kita mereken persembahen persepulungenta, si cidahken kehamatenta man Dibata si enggo masu-masu geluhta arah kerina pendahinta. Arah mereken persepuluhenta kita ikut muat bagin ibas kerina dahin-dahin Tuhan arah gerejaNa. Sabab persepuluhen pe igunaken man keperlun “kalak Lewi” (serayan Tuhan ras personalia GBKP), nampati kalak si mesera: kalak pertandang, anak melumang (Gelora Kasih, Alpha Omega) ras diberu si mbalu si membutuhken.
4. Nehken persepuluhen ola ikut-ikuten terbelih pekulah-kulah bagi guru-guru agama Jahudi ras kalak Parisi. Sehken persepuluhenta alu pusuh si bujur eme pusuh si bersih, pusuh si ersuruh ndalanken keadilen, keleng ate ras kebujuren. Si bereken persepuluhenta erkiteken tanggung jawabta man Tuhan ras GerejaNa. Adi la kita si ertanggung-jawab nangdangi gerejata ise nari? Labo kalak tertentu saja ngenca si ertanggung-jawab, tapi kerinana kita ertanggung-jawab. Sadarilah maka lit kepe bagin ntah pe rejeki kalak si deban arah rejeki si ibereken Tuhan man banta. Rejekita la gunanta saja ras keluargata, tapi lit ije rejeki ras bagin kalak si deban si merlukenca (bnd Ulangen 14:29; Matius 25:40).
5. Ola pebue nungkun & diskusi kerna ndigan ras uga ngkira persepuluhen. Bas kai nari nge ikira? Gaji saja ntah arah perulihen si debanna pe, ntah arah total penghasilen ikurangi pajak? Melala penungkunen si banci turah. Deba ban lalana nungkun piah lupa nehken persepuluhenna man Tuhan. Dage, sehkenlah persepuluhenta tiap bulan. Banci awal, pertengahen ntah akhir bulan katawari kita ndatken rejeki arah gajita ntah arah pendahin/ usahata. Berekenlah rikutken ukur ersuruh. Berekenlah rikutken pemere Tuhan, amin.

Pdt. Juris Tarigan, GBKP RG Bogor