SUPLEMEN PJJ TANGGAL 04-10 JUNI 2023, ULANGEN 16:9-12

THEMA :

PEHAGA TUHAN DIBATA ALU KERJA RANI

BAHAN OGEN :

ULANGEN 16:9-12

 

PENGANTAR

Sada lagu si lit bas Kidung Jemaat 439/ Kitab Ende-Enden GBKP no. 287 (Kune Bas Geluhta Mara Reh Nderpa) bagian refrain-na bas Bahasa Indonesia tertulis sebagai berikut :

                                                     Berkat Tuhan mari hitunglah, kau kan kagum oleh kasihNya

                                                  Berkat Tuhan,mari hitunglah, kau niscaya kagum oleh kasihNya

 Berdasarken lagu enda banci siangkat sebuah penungkunen; apakah “menghitung” berkat Tuhan e sada hal si murah untuk ilakoken? Tentu enda labo sada hal si mudah untuk ilakoken sebab enda tergantung penggejapen ras kesadarenta kerna pasu-pasu Tuhan bas geluhta. Adi misalna la bo pernah sisadari bahwa segedang geluhta rikut kerina ibassa emkap bekas pasu-pasu Tuhan, maka menghitung berkat Tuhan jadi sada hal si sulit ilakoken sebab siakap nge kai si lit bas kita bekas gegehta ndube. Bage ka pe di kune bas dirinta enggo lit kesadaren maka kerina si lit bas kita rehna bas Tuhan nari maka kita tetap akan mengalami kesulitan menghitung berkat Tuhan sebab kedungenna si eteh maka la bo kepeken ngasup kita erkira kerna buena ras ulina pasu-pasuNA man banta. Emaka kedungenna paksa kita menyadari pasu-pasu Tuhan simbelin man banta, si turah bas dirinta tak lain adalah rasa syukur, kagum ras ketedehen ukur guna ngataken bujur man baNA.

PENDALAMAN TEKS

 Ibas Ul. 16:1-17, lit telu wari raya utama si-itegaskan Dibata gelah ilakoken kalak Israel. Engkai maka iperintahken Dibata kalak Israel guna ngelakokenca? Salah sada tujunna emekap gelah bangsa Israel tetap nginget kerina perbahanen Dibata nandangi bangsaNA bas paksa si lepas (bdk.ay. 16:3b,12). Bangsa Israel si bengket ku Taneh Kanaan emkap generasi si mbaru si mungkin la mengalami secara langsung perbahanen Tuhan tupung bangsa enda bas perdalanen denga. Alu pengertin si payo nandangi perayaan-perayaan si ilakoken maka banci ikataken kerina perayaan enda ilakoken bukan sekedar rutinitas belaka, melainkan sada proses pertumbuhan iman ras tindaken mpehagaken Tuhan erkiteken perbahanenNA man bangsaNA. Telu wari raya enda sangat penting peranna bas kegeluhen bangsa Israel ras ilakoken secara terus menerus emekap:

1. Wari Raya Roti si la tama ragi: ija wari raya enda imaksudken sebagai peringeten man bangsa Israel si enggo ibaba Tuhan ndarat bas Mesir nari (bdk. Ul. 16: 1-8). Wari raya enda erkawiten ras peringeten wari Paskah ija perayaan enda ibahan bas bulan pertama sue ras kalender/ penanggalan bangsa Israel, tepatna wari ke-14 karaben. Bas wari pe-sepululimaken, selama pitu wari dekahna, kalak enda arus man roti si la tama ragi,bagepe mpersembahken korban tutungen.
2. Wari Raya Pitu Minggu: wari raya enda iperingati pitu minggu kenca menaken rani gandum. Wari raya enda merupaken wari raya ngataken bujur/ermeriah ukur kerna peranin si ipasu-pasu Tuhan. Bas wari raya enda, kalak Israel mbaba persembahen erpalasken ukur meriah man Tuhan, sue ras pasu-pasu Tuhan si enggo ialokenna lewat ulih jumana (Ulangan 16:9-10).
3. Wari Raya Sapo-Sapo: Wari raya enda ibahan kenca kalak Israel enggo dung ngerik gandum bagepe enggo dung mereh anggur, ija peristiwa enda irayaken pitu wari dekahna (bdk. Ul. 16:13-15). Tupung mperingeti wari raya enda,kalak Israel sekaligus muat waktu istirahat guna ermeriah ukur menikmati pasu-pasu Tuhan. Tujun perayaan enda emkap guna nginget ras ngataken bujur kerna penjujuri Tuhan ibas kegeluhen bangsa Israel.

 Ibas bahan pengogenta sendah, lit piga-piga hal si perlu sicermati berkenaan ras sikap mbaba persembahen si pehagaken Tuhan. Sipemena emekap sikap/cara kita mbaba persembahen man Tuhan. Bas ayat 10 ikataken maka sukat-sukat persembahen si pehagaken Tuhan emekap persembahen si ibaba erpalasken keriahen ukur (asa ukur meriah) dingen buena rikutken pasu-pasu si iberekenNa man banta. Kata keriahen ukur ijenda patut iperdiateken bahwa persembahan si erpalasken keriahen ukur bukanlah persembahan yang sembrono rikutken selera/ meriah siakap saja. Persembahen enda perlu isikapken alu mehuli dan sungguh-sungguh guna pehaga Tuhan sebab Tuhan pe labo “asal-asalen” mereken pasu-pasu bas kegeluhenta.

Hal berikut si menjadi perhatianta adalah ibas kita mereken persembahenta man Tuhan, kita pe iajuk ncidahken biak kepate man temanta ibas keriahen ukur sigejapken kita kerna pasu-pasuTuhan bas geluhta. Siidah maka ibas pesta si iban guna ngataken bujur enda ipeseh man bangsa Israel gelah pulung radu ras anak-anak, suruh-suruhen (hamba) si erdahin bas rumahna, termasuk kalak pertandang si mungkin lenga jelas pendahin entah pe sumber pencarinna bagepe anak melumang ras diberu balu-balu si terbatas gegehna ibas ncukupken keperlun kegeluhenna. Kerina enda iikut sertaken bas kerja si meriah enda sebagai tanda solidaritas man teman manusia khususna si mesera baban geluhna. Alu bage ulih pendahin si ipasu-pasu Tuhan la hanya ngadi bas dirinta saja, tapi pe nampati ras erguna man kalak sideban. Lebih lanjut, bas pengogenta ayat 12 itegasken kerna bangsa Israel perlu encidahken ketaaten ibas ngikutken perentah-perentah enda kerina erkiteken kai si enggo ibahan Dibata man bangsaNA bas wari si lepas, emkap bangsa si nai jadi budak i Mesir enggo ilepasken Tuhan. Genduari bangsa Israel atan bengket ku taneh perjanjin bagepe kenca seh ije, taneh si i-usahai banci ka mereken asilna tentu enda kerina bekas pemeliharaan Tuhan nandangi bangsaNa. Emaka ngataken bujur man Tuhan jadi salah sada respon iman kalak si nggejapken kiniulin Tuhan bas geluhna.

APLIKASI/PENUTUP 

• Nehken persembahen kerja rani adalah sada respon iman kita kerna pemere Dibata bas geluhta. Adi lit bas kita pengenalan yang benar akan Tuhan tentu ibas kita mereken persembahan lebih dari sekedar kepatuhan sebab tama si e lit keriahen ukur ras ketedehen ate guna ngataken bujur man Tuhan. Ibas sienda turah ketutusen ibas mereken persembahen si terbaik man Tuhan. Pemere Dibata man banta banci berbeda-beda, gegehta pe banci berbeda-beda tapi ibas sienda la kita lupa bahwa persembahen simpehaga Tuhan eme persembahen sierpalasken ukur si meriah merekenca ras ibas dampar si deban meriah ka min ukur Tuhan ngalokenca. Alu bage kita setia ngataken bujur ras pe la mekarus ibas mereken persembahen kerja rani man Tuhan sebab sisadari maka Tuhan sudah memberikan berkat-berkat si terbaik man banta terlebih dahulu.
• Ikut muat bagin ras nikapken persembahen kerja rani alu mehuli jadi sada proklamasi iman si encidahken lit pengarapenta kerna wari si pepagi si isikapken Tuhan man banta. Si enda encidahken pengakunta bahwa Tuhan-ta emekap Tuhan si mperdiateken keperlunta alu keleng ate ras icukupkenNA kerina kegeluhenta sue ras kiniulinNA. Mungkin genduari banyak tantangan si hadapi kita terkait ras pendahinta, tapi ibas pengarapenta ngasup kita tetap ermeriah ukur ibas Tuhan.
• Ibas kita enggo nggejapken pasu-pasu Tuhan bas geluhta, kita idilo jadi saluren pasu-pasu man temanta si lit bas kiniseran. Alu kata si deban kiniulin si sehken Tuhan bas geluhta ernanam pe man kalak sideban.
• Persembahen kerja rani si baba kita jadi salah sada sumber terbesar si menopang pelayanen gerejanta. Arah kerja rani si pepulung kita mbue pelayanan-pelayanen banci ilakoken bas gerejanta. Emaka mari sibuat baginta, ergiah-giah kita maba persembahen kerja raninta ku rumah Tuhan. Jenari ula lupa sitotoken ka segelah pelaksanaan kerja rani i tengah- tengah gerejanta tahun enda banci erdalan alu mehuli ras pe jadi kesaksin iman i tengah-tengah perpulungenta.   

 

 Pdt. Eden P. Funu-Tarigan, S.si (Teol)

                                                                                                                                         GBKP Perpulungen Kupang