SUPLEMEN PJJ TANGGAL 23-29 APRIL 2023, 1 KRONIKA 23:24-32
Nats : 1 Kronika 25 : 1 - 8
Tema : Pemain Musik Rumah Pertoton
Kegeluhen kiniteken ras penembahen bangsa Israel man Dibata seh kel pentingna nandangi Daud selaku raja. Iaturkenna kerinana alu sikap, mulai ibas ngaturken Imam, kalak Lewi ibas tep-tep terpuk kerna dahinna ibas Rumah Pertoton. Ibas perikop si jadi pengogenda banci siidah kuga Daud ngaturken “Tim Pujin Penyembahen”ibas Rumah Pertoton guna mimpin ras mabai kebaktin sinilakoken Israel. Terpuk e ras dahinna eme :
- Terpuk Asap ras anak-anakna iteruh pengaturen Asap guna nehken kata Dibata (ay. 2)
- Terpuk Jedutun ras anak-anakna iteruh pengaturen Jedutun nehken kata Dibata radu ras musik kulcapi janah ngendeken puji-pujin ras pengataken bujur man Tuhan (ay. 3)
- Terpuk Heman ras anak-anakna iteruh pengaturen Heman main kulcapi ras gambus ngikuti kalak ersembah ibas Rumah Pertoton (ay. 4 – 6)
- Raduken ras si e lit senina-seninana ibas suku Lewi sienggo ilatih guna nehken ende-ende pujin man Dibata, kerinana ia ahli ibas seni musik dingen jumlahna lit 288 kalak.
Kerina kalak enda i khususken guna jadi singelai ibas puji-pujin kebaktin/ ibadah sinilakoken bangsa Israel man Dibata ibas Rumah Pertoton. Keberadaan kalak enda seh kel pentingna dingen sakral sebab dahinna desken bagi sekalak nabi ras imam. Engkai? Sebab ibas puji-pujin siniendekenna lit ije pesan Dibata man perpulungen , menghubungken umat ras Dibata lewat pujin ras penembahen sinilakoken. Isi ende-enden pujin ras penembahen e merupaken pernyataan kiniteken man Dibata (pengakun kerna kuasa, kiniulin ras keleng ate Dibata bagepe ketetapen ukur nggeluh ras Dibata, cara guna naksiken/ mpebarken ras mpebetehken kemulian Dibata ras perbahanenna man kalak si megikenca, bahken la jarang isina eme pengajaren (banci siidah ibas ende-enden si iendeken ibas kitab Mazmur).
Ibas kegeluhenta genduari, dahin guna muji Dibata labo dahin kalak si tertentu saja tapi e kewajiben ras kearusen nggeluh kalak si tek man Dibata, sienggo ngaloken ras nggejapken belinna kuasa ras keleng ate Dibata ibas kegeluhen enda. Lanai ibatasi terjeng nandangi kaum ntah kesusuren tertentu saja. Bahken muji Dibata eme tanggungjawab kerina si erkesah (Mas. 150 : 6). La terjeng arah ende-enden siniendeken kita tupung kita erkebaktin ntah pe ersembah man Dibata tapi kerina kegeluhenta arus min jadi puji-pujin man Dibata (Calvin : Dunia ini adalah “Theatron Gloria Dei” , Doni enda panggung raksasa guna muji kemulian ras keagungen Dibata). Dingen Ibas gerejanta lit iaturken piga-piga bidang pelayanen si erhubungen ras puji-pujin ibas Kebaktinta eme : Seksi Musik si ije lit Songleader, Organis/ pemusik, Paduan Suara, rsd. Kerinana e tujunna guna “nampati ras mabai” kita payo ibas nehken puji-pujinta man Dibata, lit panduanta ras ikutenta ibas rende alu payo dingen lit kiniraturen ibas kebaktinta.
Segelah Tim Musik/ Pujian bagepe perpulungen enda banci tuhu-tuhu jadi penyembah ras pemuji Dibata sipayo emaka :
- Arus iinget maka pujin ras penembahenta man Dibata eme pelayanenta man baNa. Ertina pujin ras penembahen e labo terjeng sekedar hiburen sierbahanca menarik ibadah e, ntah pe terjeng jadi atraksi musik (alat musik) ntahpe ende-enden saja. Ibas pujin ras penembahenta kita isadarken, iajuk dingen ipegegehi guna banci mereken dirinta (mendedikasikan dan mengabdikan) guna ngelai Tuhan dingen nehken sura-suraNa. Bas pujin e lit ije pertotonta man Dibata ibas bentuk ende-enden sebagai upayanta guna menyelaraskan pusuh bagepe kegeluhenta ras sura-sura Dibata (nyanyian- hati yang taat dan kehendak Tuhan).
- Si ipeseh ibas puji-pujinta man Dibata eme kemulian ras kehamaten man Dibata (Allah menjadi pusat dan tujuan dari pujian), labo ajang mempertontonken keahlian ras kengasupenta ije. Mekatep ka pe ijumpai si beluh ibas bidang musik e, ije ke ia mpekitik kalak si deban; deba la ka terajari, beluh akapna bana, rsd. Enda perlu siubah ibas kegeluhenta selaku singelai Tuhan ras siersembah man Tuhan. Pujian dan Penyembahan membutuhkan kesungguhan. Skill (kehalian ras keterampilan) arus sendalanen ras sikap pusuh situhu-tuhu nggit ngelai, pusuh si meteruk rukur.
- Para pemain musik (Tim Musik) eme bagin ibas kerina singelai ibas Rumah Pertoton si seri fungsina ras kedudukenna ibas kebaktin. Emaka kerinana arus ndalanken tugas ras tanggungjawabna alu mehuli, arus lit persikapen segelah la menggo ibas ngelai, kerina arus mereken si terbaik man Dibata ibas pelayanenna. Tim Musik labo bagin tambahen ibas rangkaian ibadahta, emaka ia pe arus ikut njagai perdalinen kebaktian e tetap badia. Labo banci kenca dung ia rende e itadingkenna inganna, dung kari khotbah reh ka ia (sebab mawen tupung khotbah e ibahan songleader e ka cakapna, deba lawes ka pe ia itadingkenna inganna. Kalak sib agenda lenga memahami erti kehadiren ras panggilenna selaku sekalak si ngelai ibas Rumah Pertoton).
- Pujin memang penting tapi pusuh ras kegeluhen ndauh lebih penting. Puji-pujinta man Dibata e ula min terjeng pujin ibas biber saja, labo rehna ibas pusuh dingen la iikuti alu kinata kepatuhen man Dibata ibas kegeluhen. Sipuji Tuhan tapi labo lit ije penyerahen diri e seri ras kemunafikan, rende kita tapi labo lit ije kiniteruken ukur dingen pengakun si benar nandangi Dibata (pusuhta ndauh bas Tuhan nari) e terjeng ngoge Not, siagung-agungken Dibata tapi alu babahta e ka nge kita melasken cakap la tuhu/ cakap caram/ ncekuraki kalak dingen labo lit kekelengen ibas kita e gelarna nokoh man Dibata. (Pujiannya membuat orang nangis, kelakuannya membuat Tuhan menangis). [Matius 15 : 7 – 8 “O kalak pekulah-kulah! Tuhu kal kai siikataken nabi Jesaya kerna kam, Nina Dibata bangsa enda ipujina Aku ibas biberna ngenca, tapi ukurna ndauh sirang ibas Aku nari”]; [Jesaya 29 : 13].
Pdt. Elba Pranata Barus-Runggun Bandung Timur
