SUPLEMEN PJJ TANGGAL 09-15 APRIL 2023, 1 JOHANES 4:7-12

Nats  : 1 Johanes 4 : 7 - 12

Tema : Rutang Sikeleng-Kelengen

 

Surat 1 Johanes enda itulisken rasul Johanes guna ngelawan pengajaren si papak si sangana berkembang itengah-tengah kegeluhen persadan kalak sitek man Kristus. Pengajaren sesat e igelari anti Kristus, perguak, nabi palsu singajarken kerna ajaren Gnostik, khususna Doketisme eme aliren pengajaren singataken maka Jesus Kristus labo tuhu-tuhu manusia, tapi “hanya tampak” ntah pe “tempa-tempa” teridah bagi manusia saja nge [Yesus Kristus hanya memiliki tubuh surgawi dan hanya berpura-pura saja menderita dan mati]. Kelompok singajarken pengarajen sipapak enda erpengakap maka golongenna e erpemeteh ras erpengangkan alu mbages kerna Dibata, la iakuina maka Jesus eme Mesias sinipadanken Dibata (1 Joh. 2 : 22; 1 Joh. 5 : 1), dingen labo tuhu maka Jesus eme Dibata menjelma jadi manusia (1 Joh. 4 : 2 – 3). Iajarkenna pe maka kepatuhen nandangi perintah Dibata (1 Joh. 2 : 3 – 4; 5 : 3), nggeluh badia ras benar (1 Joh 3 : 7 – 12), lanai nggeluh bas dosa dingen nggeluh la seri ras doni enda (1 Joh. 2 : 15 – 17) la iperluken ibas kegeluhen enda dingen la lit hubungenna ras keselamaten.

Surat 1 Johanes enda mpersingetti ras mpegegehi kalak sit ek man Kristus segelah tetap metenget nandangi pengajaren sipapak e, ula min iiikutkenna kerna pengajaren si banci mbabai kesirangen ras Dibata bagepe ras teman-teman si sada kiniteken man Kristus. Tetap min icikepna kinitekenna man Kristus alu ndalanken situhu-tuhu rehna ibas IA nari. Dibata enggo encidahken erbage-bage perbahanen sinaksiken kuasa ras kekelengenNa ibas kegeluhen enda, mulai kin ibas IA nepa doni enda ras kerina isina, seh pe pepagi kedungen doni enda kerinana encidahken kekelengenNa si mbelin nandangi anak-anakNa. Kata Dibata sijadi pengogenta nuriken maka Dibata eme kap kekelengen. Kekelengen e labo hanya salah sada biak Dibata tapi Dibata e kekelengen e kap. Kemurnian dan kesejatian kiniteken la hanya teridah ibas kebenaren secara doctrinal/ pengajaren (1 Joh. 4 : 1 – 6) tapi pe teridah arah kekelengen (1 Joh. 4 : 7 – 8).

            Kinata kegeluhenta pe itengah-tengah jaman sigenduari enda iperhadapken ku bas tantangen kerna pengajaren si la sue ras sura-sura Dibata bagepe ku bas cara nggeluh si lanai encidahken kekelengen. Kekelengen e tempa genduari lanai jadi sada hal sipenting ras meherga ibas kegeluhen, bahken la jarang kekelengen e terjeng cakap ntah pe ibas sukat-sukat materi saja. Biak nggeluh ngukurken ras pesenangken diri jadi trend kegeluhen doni enda, enda jadi banci ancamen nandangi kegeluhen persadan ibas gereja. Jabu-jabu kalak Kristen ras persadan itengah-tengah gereja lanai encidahken biak nggeluh ibas kekelengen Kristus; nande, bapa rasa nak sibuk kerna dirina, bagepe perpulungen/ sector/ kategorial pe sibuk kerna diri ras programna saja ngenca (erbana-bana). Banci saja pe kehadirenta selaku gereja (pribadi bagepe institusi) lanai mereken dampak ras nanam si mehuli nandangi sekelewetta. Emaka arah bahan PJJnta sekalenda mulihi kita ipersingetti sekaligus ipegegehi pe guna tetap nggeluh alu dem kekelengen, subuk itengah jabu, gereja bagepe ibas kegeluhen ermasayarakat, bangsa ras negara.

Piga-piga hal siituriken ibas pengogenta guna jadi persinget ras perenungen man banta eme :

a.Dibata e kekelengen kap.

1. Hakikat (ay. 7 – 8)

Kekelengen siituriken ibas pengogenta eme kekelengen si berpusat ibas Dibata (theosentris). Ertina maka kekelengen e eme bagin si la terpesirang ibas hakikat Dibata nari [Seperti panas yang tidah terpisahkan dari matahari demikian pula kasih tidak bisa diceraikan dari Allah].

2. Bukti (ay. 9, 10b)

Johanes pe nekanken maka kekelengen e enggo lit ope denga doni enda tembe dingen enggo ipetangkas pe ibas segedang sejarah kegeluhen. Kekelengen e enggo terbukti nyata arah kerehen Jesus ku doni enda guna mereken kegeluhen man kalak si the man baNa (ay. 9). Jesus si jadi manusia, mereken diriNa seh mate guna keselamatenta e jadi bukti maka Dibata e kekelengen; la ateNa kita bene ibas dosa ras kematen si rasa lalap.Kekelengen Dibata e labo terjeng sada konsep si abstrak tapi enggo ipetangkas arah tindaken konkrit/ nyata ibas Jesus Kristus. Alu bage maka kerehen Jesus Kristus ku doni enda labo sada cerita dogeng si la tuhu. (Hal enda pe enggo ipetangkas Johanes arah pembukan Suratna enda : 1 Joh. 1 : 1 – 4).

3. Inisiatif (ay. 10a)

Dibata eme inisiator kekelengen ras kiniulin e. Labo kita sienggo engkelengi Dibata tapi IA nge si engkelengi kita. Labo erkiteken bujurta ntah metunggung kita guna ngalokenca tapi erkiteken kekelengenNa maka ersura-sura Dibata ngerancang ras nehken kekelengenNa man banta arah anakNa Jesus Kristus (Joh. 3 : 16).

b. Kekelengen jadi identitas diri anak-anak Dibata (ay. 8)

Kekelengen e jadi identitas/ karakterta selaku anak Dibata si nandai Dibata. Kai sienggo ilakoken Dibata man banta arus siumban ibas kegeluhenta. Kekelengen e jadi indikator kinitekenta man Dibata siteridah ibas kita engkelengi temanta manusia (ay. 20 “Adi lit kalak ngatakenca maka keleng ateNa Dibata tapi nembeh atena man seninana, kalak sib age perguak….”). La kin pe situriken maka kita kalak Kristen si tutus sit ek man Dibata, iidah ras isaksiken kalak nge arah kegeluhenta; itandaina nge kita dikune teridah ras tergejap man kalak kekelengen Kristus e arah kita (Joh. 13 : 35 “Dengan demikian semua orang akan tahu, bahwa kamu adalah murid-muridKu, yaitu jikalau kamu saling mengasihi”). Arah kegeluhen ras perbahanenta si dem kekelengen e ipuji kalak pe Dibatanta (Mat. 5 : 16)

c. Kalak sienggo “ngaloken” ras “mengalami” kekelengen Dibata rutang guna nggeluh sikeleng-kelengen.

Dibata enggo mereken usihen ibas nehken kekelengen, emaka kita pe selaku anak-anakNa erkewajiben guna nggeluh erkekelengen : engkelengi Dibata sienggo engkelengi kita, bagepe engkelengi temanta manusia ras kerina tinepa Dibata. Engkelengi min kita bagi Kristus enggo engkelengi kita : tulus ras murni ( la lit ije maksud terselubung/ modus), la ngarapken balas (ikhlas) sebab kita engkelengi labo gelah kita ikelengi tapi erkiteken Dibata enggo leben engkelengi kita, la terjeng cakap bas biber tapi la teridah ibas perbahanen (1 Joh. 3 : 18 “ O anak-anakku, kekelengenta ola terjeng biber saja ntah pe ibas cakap saja ngenca…”) sebab melala kel genduari adi ercakap kerna kekelengen enda seh kel mbulnangna tapi ibas praktekna le teridah (1 Kor. 13 : 1 – 4   “…tapi adi la aku erkeleng ate man kalak si deban, maka kai si kubelasken e la lebih asangken gung si erbulnang ntah pe penganak si erdeping”………). Kekelengenta nandangi temanta la terjeng jadi bukti maka Dibata e ringan ibas kita dingen kita ringan ibas IA, tapi pe kekelengenta e erbahanca kuh kekelengen Dibata bas kegeluhen enda (ay. 12 b).

Pdt. Elba Pranata Barus-Runggun Bandung Timur