SUPLEMEN PJJ TANGGAL 02-08 APRIL 2023, LUKAS 2:51-52
Nats : Lukas 2 : 51 - 52
Tema : Reh Belinna dingen Reh Tambahna Pemeteh (133 Tahun sehna Berita Si Meriah)
Perkembangen kegeluhen genduari enda mabai bana maka perkembangen keperlun geluh pe reh tambahna seh maka persaingen geluh pe reh belinna. Tuntuten persaingen geluh enda erbahanca kita lupa kerna perluna kiniteken si jadi palas kegeluhen. Kebutuhen kerna kiniteken labo ianggap penting, janah e mpengaruhi perkembangen biak, karakter ras cara nggeluh. Bagepe kegeluhen persadan itengah-tengah gereja pe mekatep niakap labo hal si membangun kegeluhen emaka mekatep kel ibahan taktak untung rugina. Melala manusia gundari sibuk mbangun ras menata kegeluhenna secara doni tapi lupa mbangun ras menata kegeluhenna secara kiniteken (persadan ras Dibata) bagepe secara persadan selaku anak-anak Dibata. Emaka labo ateta mamang dikune reh kenca perbeben e minter nge ngelabuh ras kote, bene pengarapenna nggeluh. Enggo pe ndekah jadi kalak Kristen la lit perubahen ras kedewasaan ibas erkiniteken bagepe ibas menyikapi situasi kegeluhen; kinitekenna bage-bage saja, ola lebe erbuah ibas kegeluhen, pertumbuhen kinitekenna pe labo teridah ibas kegeluhenna, Natsta nuriken kerna perdalanen Jesus ras keluargaNa (jusup ras Maria) ibas usiana 12 tahun kuJerusalem guna merayaken Paskah. Ibas tradisi Jahudi maka ibas tep-tep Paskah kerina anak kuta arus mulih ku Jerusalem guna merayakenca. Tradisi enda ilakoken Jusup ras Maria jadi kebiasaan geluh ibas tep-tep tahun (ay. 41). Hal enda ngingetken pe man bantam aka pendidiken kiniteken e ibenaken ibas keluarga nari. Jusuf ras Maria maba Jesus ku Jerusalem, dingen kenca kerina enggo erkedungen mulih ka me ia tapi Jesus tading i Jerusalem; enda la ieteh Jusup ras Maria sebab iakapna maka Jesus erdalan ras kalak si deban (ay.44). Kenca erdalan sada wari maka idaramina ku kade-kade ras teman-temanna, erkiteken la ijumpaina emaka mulihken ia duana ku Jerusalem lako ndarami Jesus (ay. 45). Idapetina Jesus sangana i Rumah Pertoton megiken pengajaren guru-guru agama Jahudi; Penungkunen guru-guru agama Jahudi epe ijababNa alu dem kepentaren seh maka orang tuaNa pe kemamangen (ay. 47). Kenca bage mulih me Jesus ras orang tuaNa ku Nasaret. IA reh belinna dingen reh tabahna pemetehNa, reh tambahna pe ngena ate Tuhan bagepe ngena ate manusia nandangi IA. Terlepas Jesus e Anak Dibata, tentu ibas perkembangen Jesus secara fisik, pemeteh ras kepentaren, biak ras karakter khususna kiniteken la terlepas ibas peran serta Jusup ras Maria selaku orang tuaNa.
Piga-piga hal si banci siidah ras sipelajari arah kegeluhen keluarga Jesus enda eme :
1) Kedisiplinen ras kesetiaan ibas ersembah man Dibata. Labo saja e terjeng jadi rutinitas semata tapi
tuhu-tuhu memang i hidupi, imaknai dingen inyataken ibas kegeluhenna. Jarak si cukup ndauh nasaret nari ku Jerusalem alu waktu tempuh si cukup ndekah la jadi halangen.
2) Litna kiniersadan ukur ras kiniersadan arih keluarga ibas nggeluh erkiniteken bagepe ersembah man Dibata, Jusup selaku bapa, Maria selaku nande bagepe Jesus selaku anak, teluna ia radu ras berkat ku Jerusalem (la bapa saja, ntah nande bagepe anak saja bagi si mekatep idah kita bas perpulungenta).
3)Jusup ras Maria mereken kepercayaan nandangi Jesus (ay. 44). Orang tuana ndindik karakter ras kedewasaan Jesus alu mpediat IA erdalan ras kalak si deban. Mereken kepercayaan e salah sada dalan lako mbentuk “kematangen” karakter ras sikap ertanggungjawab ibas sekalak anak.
4) Jusup ras Maria ertanggungjawab ibas pertumbuhen fisik bagepe rohani Jesus. Jesus jadi sekalak anak si mehamat man nande bapana dingen nggit megiken orang tuaNa (ay. 51), IA pe reh belinna jadi anak si erpemeteh dingen ngena ate Dibata ras manusia (ay. 52).
Enda kerina ibenaken itengah-tengah jabu ngawan ni perpulungen, sebab adi jabu-jabu ngawan megegeh ibas kiniteken gereja pe pasti megegeh; adi ngawan perpulungen ras jabu-jabu perpulungen dewasa gereja secara organisasi ras persadan pe pasti dewasa.
Bahan PJJnta berngi enda ikawitken ras 133 tahun sehna Berita Si Meriah man kalak Karo. Secara umur enggo me metua, tapi kuga secara kedewasaan subuk kiniteken, kegeluhen persadan, tanggungjawab? Enda me perlu siukuri tole ibas PJJnta sekali enda. Kedewasaan GBKP secara organisasi tentu la terlepas ibas kedewasaan anggota ngawanna.
Kuga kin ngawan perpulungen sienggo dewasa?
o Paguh kinitekenna (tek nandangi pengkawali ras pemeliharan Dibata ibas kondisi tersulit) dingen lanai mesunah ijolah joleken pengajaren si papak/ militan (Ep. 4 : 13 – 14)
o Ngasup ia ertimbang kerna kai pe erpalasken kata Dibata. Alu bage carana menyikapi kai pe ibas kegeluhen enda sue ras peraten Dibata (1 Kor. 2 : 15)
o Ietehna tanggungjawabna dingen ilakokenna e alu dem kesetian
o Lanai terjeng meteh ntah megi kerna kata Dibata tapi pe jadi pelaku Firman (Jakup 1 : 22)
o Ngasup ngaloken perbedaan ras kinierbagen itengah kegeluhen
Kedewasaan anggota ngawan perpulungen mabai bana gereja pe reh dewasana ibas keberadan ras kehadirenna. Kuga kin Gereja si dewasa?
✓ Fokus utama gereja eme kerna silang (kerina kegeluhen si lit ibas perpulungen e terpusat ku kata Dibata)
✓ Bertumbuh dan berkembang dari segi kualitas (iman) dan kuantitas jemaat (jumlah)
✓ Nggeluh ibas persadan sinteguh erpalasken keleng ate Kristus, la erbana-bana (la saja secara personal tapi pe secara sektor ntah kategorial)
✓ Lanai rukur, nggeluh dingen hadir man gunana saja tapi arah program pelayanenna pe banci jadi pasu- pasu man kalak si deban (teridah, tergejap dingen ernanam)
✓ Kengasupen ibas mengelola konflik alu metode “win-win solution” (berpikir menang-menang ibas ndungi persoalen si terjadi)
✓ Ngasup mengelola ras menata kerina si lit ibas gereja e alu mehuli sue ras peraten Kristus selaku takal Gereja ras Perpulungen (asset, keuangan, administrasi, pelayanan, rsd).
Kerina enda banci terjadi dikune sibereken tetap dirinta secara pribadi selaku gereja, jabunta, bagepe gerejanta GBKP secara organisasi terus ipelimbarui Dibata alu Kesah Si Badia guna tetap jadi “mitra”/ “Kawan sekerja” Dibata ibas nehken kebenarenNa bagepe kekelengenNa.
Pdt. Elba Pranata Barus
GBKP Runggun Bandung Timur
