Suplemen PJJ Tgl. 8- 14 Februari 2015

 Ogen   : Kejadin 5:21-24; Heber 11:5-6

Ibas pasal 5 kitab Kejadin enda isuratken sinursur Adam she Nuh. Simanarik ibas kerina sinursur Adam si isuratken ibas pasal 5 enda, Enoh ngenca ikataken “ia nggeluh ibas persadan ras Dibata”. Janah labo saja ibas Padan Sindekah isingetken kerna Enoh enda, tapi pe ibas Padan Sinbaru. Ibas kitab Heber 11:5-6 ije isingetken maka Enoh enda mbages kal kinitekenna man Dibata she maka ulihna la ia mate, tapi iangkat ku Dibata. Kuga cara Dibata ngangkatsa la ikataken, si ikataken eme “dungna lanai ia teridah perbahan iangkat Dibata ia” (Kejadin 5:24), “ise pe la ngasup jumpapai ia” (Heber 11:5b). Alu kata sideban Enoh me manusia si tang-tangna ndatken perlakun istimewa ibas Dibata nari ija ia iangkat ku Dibata, kenca si e nabi Elia.

Adi terdauhen si gar-gari kerna kegeluhen Enoh maka payo nge Enoh enda ndatken perlakun istiwama ibas Dibata nari, engkai? Ibas teksta baik Kejadin 5:22-24 bagepe Heber 11:5-6 ije isingetken Henoh enggeluh ibas persadan ras Dibata labo saja paksa ngudana ntah paksa tuana. Tapi kidekah geluhna eme 365 tahun (Kejadin 5:22-23). Beda ras Salomo paksa ia enggo metua kurang kepatuhenna man Dibata eme sababna kerajanna pecah jadi dua, Israel Utara ras Israel Selatan.

Uga kin nggeluh ibas pesadan ras Dibata? Ibas Teksta Kejadian 5:21-24 lit dua kali isingetken maka Henoh “nggeluh ibas persadan Dibata” (Hidup bergaul dengan Allah) eme ayat 22a ras 24a (saja ibas bahasa Karo ayat 24a isuratken “erdalan ibas dalan Tuhan”). Nggeluh ibas persadan ras Tuhan berarti:

1. Erdalan ibas dalan Tuhan (Kejadin 5:24). Secara sederhana erdalin ibas dalan Tuhan berarti bagi isingetken ibas Heber 11:5c “ibahanna si sentudu ras peraten Dibata”. Contoh si ilakoken Abraham eme patuh ia ngikutken kai si isuruh Tuhan eme berkat nadingken kutana, kade-kadena. Ulihna luar biasa. Abraham jadi kalak bayak namura (Kejadin 13:2), Jadi nini melala bangsa (Kejadian 17:5), Bapa kerina kalak sitek man Dibata (Roma 4:11b). Uga maka banci patuh? Enda me si mesera erkiteken mekatep logika ntah kepentaren secara doni iban ukurenna. Abraham la bage, pintar pe ia tapi ibas ngikutken perentah Tuhan la ia terjebak kubas ngukuri untung rugina ibas ia patuh e. Sabab syarat patuh man Tuhan eme tek maka Dibata e lit ras mpercayaken diri secara total man Dibata.
2. Erkiniteken (Heber 11:5). Bagi isingetken rumusen erkiniteken ibas Heber 11:1 eme tek nandangi kai si iarapken kita, tek kerna si la idah, bagem Enoh nggeluh she maka ngena ate Dibata ia, puncana eme Dibata mperlakuken Enoh secara istimewa eme la ngalami kematen tapi ia iangkat ku Dibata. Uga kin kalak si erkiniteken? Sipemene, iangkana maka kerina sinasa lit Dibata kap njadikenca (Heber 11:3), sipeduaken, nehken persembahen si mehulina (Heber 11:4), sipe teluken, mengiken kata Dibata ras ndalankenca (Heber 11:7), sipempatken, patuh man perintah Tuhan, rsd. Ulih kalak sierkiniteken si bage: (1) Enoh la mate tapi iangkat Dibata; (2) Amin gia Sara enggo “mati pucuk” (umurna 90 tahun) banci ipupusna si Ishak; (3) IbereNa upah man kalak soi ndarami Ia (Heber 11:6b), (4) memeperoleh hidup yang kekal (Yohanes 3:16b)
3. Enggeluh badia. Ibas Judas 1:14-16 eme nubuaten Enoh isingetken maka reh me Tuhan ras meribu-ribu maleketna si badia … enda nuduhken maka Tuhan e badia ras ikeleweti malekatna sibadia. Dage enggeluh ibas persadan ras Tuhan berarti pe nggeluh badia sabab Dibata badia kap (Imamat 19:2). Badia ibas cakap Yunani eme “hagios” (lit pe si nterjemahkenca suci ntah pe saleh) si mengandung pengertin “hubungan yang benar dengan Allah”, banci pe ibas pengertin “kekasih”. Kata Hagios enda pe banci ipahami alu pengertin “iserapken” ertina la nai seri ras sideban. Bagi paken si enggo bersih iserapken ras paken si kotor, bagem pe arusna kalak kristen nggeluh badia eme la nai nggeluh rikutken sura-sura doni (Bd. Titus 2:12). Kalak si la nggeluh badia bali kap la ngakui Dibata. Janah kalak si bage teridah arah jungut-jungut, nalahken kalak, sura-sura sijahat ngenca idalankenna, peganjangken bana, cari muka, rsd (Bd. Judas 1:16).

Tentuna kita labo banci seri ras Enoh, saja ngenca mari sipala-palai nggeluh ngusih teladan nggeluh Enoh eme nggeluh ibas persadan ras Dibata teridah arah erdalan ia ibas dalan Dibata, erkiniteken ras nggeluh badia. Tek kita sialoken me upah ibas Dibata nari. Upah e tentuna erbahansa meriah dingen malem ateta, ibas doni enda pe terlebih sialoken me kegeluhen si rasalalap. Emaka arah kata Dibata siman oratenta enda si jadikenlah persinget adi lit denga kita lenga nggeluh ersada ras Dibata sabab bagi isingetken ibas Yohanes 15:4c “adi la kin kam ersada ras Aku labo kam erbuah”. Ertina amin gia kita enggo iperidiken, ingawanken jenari tiap Minggu ku gereje, PJJ ras PA-PA tapi adi labo kita nggeluh ersada ras Dibata labo ngasup kita erbahan si mehuli singena ate Dibata berarti labo maler pasu-pasu e man banta.

Ibas nggeluh itengah-tengah jamanta genduari tantangen e labo reh sitikna ras labo reh nahangna, sebalikna reh rumitna nge pe. Tapi man anak-anak Tuhan tentuna e labo erbahansa aru ate ntah mbiar. Isampati Dibata nge kita alu carana jine ras ibas paksa. Amaka sipenting man banta eme tetap nggeluh ersada ras Dibata.

Pdt. S. Brahmana

DISKUSI (bagi si enggo iban ibas Bimbingen PJJ GBKP)

1. Praktek kegeluhen sikuga ilakoken Enoh maka ikataken ia nggeluh ersada ras Dibata? Turiken!
2. Praktek kegeluhen sikuga gundari man bahanen maka kita ikataken ersada ras Dibata? Turiken!
3. Kai nge si gejapken ulih si ibereken Dibata man banta ibas kita ersada ras Ia? Turiken!