SUPLEMEN PEKAN DOA GBKP TAHUN 2024 WARI IV, MATIUS 5:43-48

Invocatio  :

“Mulai kin kitik-kitikku nari seh bagenda, la nggo kuidahkalak bujur itadingken TUHAN tah kempuna jadi pemindo-mindo“ (Masmur 37:25)

Renungan :

Matius 5:43-48

Tema  :

Ertoto Guna Kalak si Peturah Kiniseran

 

Perlebe

Topik pertoton si ipeseh perpulungen, biasana telu sendalanen. Eme gelahna Tuhan mereken kesehaten man kerina isi jabuna, murah rejeki ibas pendahin ras usahana, begepe erteguhna kinitekenna. Tapi perlu si sedari kepeken ndalani kegeluhen la berpusat man dirinta ngenca. Kita la terlepas ibas berelasi ku kalak si deban. Si banci saja mpeturah erbage persoalen kerna perbedaan-perbedaan si lit. Banci kita la siangkan, la sendalanen ras teman. Si kedungenna erbahanca la tergejap dame sejahtera sapih-sapih kita. Apai ka dikune lit si jadi imbangta si mpeturah kiniseran man banta (itokohina, ibualina, cian atena rsd). Mekatep si terjadi, tarum ngukuri sie ras ngadapi persoalen si bage, kesehatenta pe terganggu. Lanai siakap ntabeh man, la banci medem bagepe la meriah tiap jumpa. Piahna lanai ternikmati rejeki si lit, erkiteken pusuh la dame, janah si erelem-elem salah man kalak si peturah kiniseran e ndai. Tentu enda pe jadi tanda kinitekenta kote. Pertotonta ibas pengarapen nandangi hal mehuli man dirinta pe lanai tempa rulih. Emaka kai nge si perlu ipesikap, dikune reh persoalen nggeluh si bage, si la banci minter terdungi bas berelasi ras kalak si deban?

Isi

Matius 5:43-48 merupaken bagin pengajaren Yesus (kotbah i datas uruk) si ipeseh man enterem kalak si ngikutken IA. Yesus la pernah petembil ras ajaran Taurat. Tapi pengajaren si isehkenNa, mpelimbarui pengangkan ras pendalanken kerna sura-sura Dibata man perpulungen. Termasuk ibas ngkelengi imbang-imbang. Tentu malem siakap mbegikenca dikune ngasup kita erkeleng ate man ise pe, apaika imbang-imbangta. Tapi pendalanken Kata enda tentu perlu perjuangen. Apai ka ngubahken hal si semal ilakoken sedekah enda. Adi imbang tentu la banci siperiahen ras la mungkin sipeseh si mehuli man bana.

Yesus pe ietehNa kap, maka pengajaren si sedekah enda lit eme ‘Kelengilah temanndu, janah erelem-elemlah man imbang-imbangndu’ (ay 43). Enda biasa ilakoken. Adi kalak si mehuli man banta, si balas alu erbahan mehuli man bana, bage ka pe sebalikna. Tapi nina Yesus, “… genduari Kukataken man bandu : Kelengilah imbang-imbangndu, janah ertotolah man Dibata kerna kalak si erbahanca kam ngenanami kiniseran. Alu bage kam nggo jadi anak-anak Dibata…” (ay 44-45). Kerina kita ertedeh ate igelari anak-anak Dibata, gelah sinanami kegeluhen senang ras Dibata. Tapi salah sada si arus ilakoken, eme engkelengi musuh ras ertotolah guna kiniulinna. Enda ipeseh Yesus gelah siangkai palas kinitekenta; kekelengen si tuhu-tuhu, si arus ipeseh man ise pe. Bagi keleng ate Dibata la ersarat (kasih Agape). Dibata nehken pasu-pasuNa man kerina tinepaNa. Ise pe la erndobahen ngalokenca, bagi rehna matawari tah pe udah si ibereken Dibata man doni enda. Kerina banci ngejapkenca.

Hal si ilakoken enterem kalak, eme erbalas nandangi kalak si mpeturah kiniseran man bana. Tapi anak-anak Dibata lanai ngelakoken bage. Sabab Yesus ngajarken gelah kita ngasup engkelengi ise pe, subuk teman tah pe imbang. Kalak jahat, si la nandai Tuhan pe, ngasup denga erbahan mehuli adi man teman ras kade-kadena. Adi kita pe bage nca sibahan, lalit upahta ras lalit si mbedaken kita ras kalak jahat (ay 46-47). Ertina standart kinitekenta man Yesus, mabai kita lanai nggeluh ‘biasa-biasa saja’ bagi kalak si deban. Arus serta bagi Dibata pe serta (ay 48). Emaka anak-anak Dibata, lanai mpediat pusuh dem ukur segat ras erelem-elem kesalahen kalak. Kita nggo harus naik kelas/level, ibas nggeluh erdame ras banci mbaba perdamen man kalak si deban. Emaka adi pusuhta lenga ngasup ngalemi salah bagepe erbahan si mehuli man kalak si peturah kiniseran man banta, tentu perlu denga ipelimbarui caranta erkiniteken. Sabab kiniteken harus erbuah ibas kegeluhen, termasuk ngalemi salah kalak ras notokenca.

Yesus pe mereken usihen man banta. Ia ertoto man kalak si perturah kiniseran ras si erbahan jahat man baNa. Bagi si ibelasken Yesus i kayu persilang “.. O Bapa, alemi min kalak enda, sabab la iangkana kai si ibahanna enda..” (Bdk Luk 23:34). Yesus la notoken gelahna kalak si jahat e ndatken hukumen, tapi gelah idatkenna pengalemi dosa ibas perbahanen si ilakokenna e. Yesus pe ngajarkenca ajar-ajarNa ertoto ibas pertoton Tuhan, gelahna ngasup me kita ngalemi salah kalak kempak dirinta. Enda harus ilakoken, gelah pasu-pasu Tuhan banci sialoken (bdk Matius 6:12).

Masmur 37:25 jadi bagin kesaksin nggeluh Daud. Ia ngaloken erbage kinilabujuren arah kalak si lit isekelewetna. Tapi ipilihna gelah tetap tek man Dibata. Igejapna uga Dibata engkelengi ia dingen bujur/adil ibas erbahan pertimbangen. Man kalak bujur bagepe si jahat, kerina lit kedungenna. Emaka kunci nggeluh dame, eme ernalem man Dibata. Dikune mberat siakap ngaloken perbahanen si jahat, ula sempat kita seri ka bagi kalak si jahat e, ibas erbalas nandangi ia. Tapi tetaplah lakoken kebujuren. Sabab la pernah i saksiken Daud kalak bujur e itadingken Tuhan. Tetap ijayamNa kap kegeluhenta.

APLIKASI RAS PENUTUP

Genduari enda, enterem kalak si nggeluh ibas nuntut balas. Kiniulin pe lanai ipeseh alu bujur/tulus. Emaka dikune kalak la erbalas mehuli man banta (disakiti, dicurangi, dirugikan, diolok dll) rugi denga siakap engkelengisa. Bagi kuan-kuan kalak Karo, ‘gelarna e ateku lang’ ‘lanai nggit sada matawari ras kalak si bage’ ‘bagi si tek tek ketang, lanai pagi banci ersada’. Tantangen ibas kita nggit ngalemi salah mberat kap tuhu. Lit denga ego, gengsi, mesui ka tuhu siakap pusuhta nginget-nginget perbahanen kalak jahat. Dikune ia leben mindo maaf pe banci lenga teraloken, apaika leben sialemi salahna. Mberat siakap, sabab banci jadi ibas pandangen kalak pe, maka tuhu kita ka si dungna ersalah. Tapi kerina e biak-biak si male. Sabab genduari keleng ate Dibata nggo tangkas man banta arah Yesus Kristus. Ia ngajari kita alu KataNa ras perbahanenNa man doni enda si dem kekelengen.

Anak-anak Dibata, la terjeng mengagumi Yesus, tapi jadilah kalak si ndalanken KataNa e. Gelah sigejapken pasu-pasuNa si mbaba dame ibas geluhta, bagepe jadi pasu-pasu si mereken kedamen man kalak si enterem. Me ei kin tugasta? Engkelengi kalak, termasuk man bana si erbahan jahat nandangi kita. Sabab erbalas kesalahen, labo kap baginta. Dibata pagi ertimbang nandangi perbahanen manusia, ibas keleng ate ras kebujurenNa. Tugasta eme ndahiken kai si jadi baginta, ndalanken KataNa segedang geluh. IdiloNa kita labo gelah seri bagi pengajuk doni, tapi jadi anak-anakNa. Emaka gegeh ras kengasupen pe iberekenNa kap.

Cidahkenlah kekelengen/bermurah hatilah ibas ngalemi salah kalak, sehken kekelengen bana bagepe totokenlah ia si enggo erbahan si jahat. Sabab kita pe ialemi Tuhan dosa ras kesalahenta. Tuhu labo lit gegeh manusia ngubahken pusuh manusia. Kuasa Kesah si Badia ngenca si banci mpeturahsa. Emaka pindo gegeh man Dibata, meteruk ukurlah kita, gelah pusuhta ipengasup ndalanken KataNa, ngalemi ras notoken kalak si peturah kiniseran man banta. E jadi dalan perdamen man kerinana.

Totonta pe aruslah pertoton si dem kekelengen. Gelah banci ipelimbarui Tuhan pusuh kalak si jahat si rusur mpeturah kiniseran man kalak si deban. Maka ia pe sedar ibas kelepakenna dingen nggejapken dame ibas geluhna. Sabab banci saja kejahaten si ilakokenna e, erkiteken pusuhna lenga ngasup ngaloken keleng ate Dibata, tah pe lit si lenga terdungi ibas pusuhna si erbahanca ia mesukah erbahan si jahat ibas perukuren, pengerana ras perbahanenna. Peturahlah ukur mekuah man kalak si bage arah kininggitenta engkelengisa. Sabab nggo si gejap keleng ate Dibata si la saja man dirinta tapi pe man kalak si jahat perbahanenna. Gelah ia pe nandai Tuhan ibas geluhna. Ulihna adi nggit kita ertoto guna kalak si mpeturah kiniseran banta, eme dame jadi sikerajangta. Dame i doni bagepe i surga. Sabab pertoton kalak bujur pasti ibegikenNa, iperdiateken Tuhan ka pe kegeluhenna. Amin.

Ingatlah kejahatan yang dibalas kejahatan, kebencian yang dibalas kebencian,

dendam yang dibalas dendam, akan menjadi lingkaran dosa yang tidak pernah terputus.

Hanya cinta kasih tulus untuk mau saling mengampuni dan mendoakan seperti Firman Tuhan,

menjadi kekuatan yang mampu memutuskannya.

 

Pdt Deci Kinita br Sembiring-GBKP Rg Studio Alam – Depok