SUPLEMEN PEKAN PENATALAYANAN GBKP TAHUN 2024-WARI III, KHOTBAH PERBAHANEN RASUL 2:43-47

Invocatio  :

E maka ola kam mela ersaksi kerna Tuhanta; bage pe ola kam mela kerna aku si ipenjaraken erkiteken Kristus. Tapi buat baginndu i bas kiniseran guna Berita Si Meriah bagi ibereken Dibata man bandu gegeh guna si e. (2 Tim 1.8)

Ogen :

Josua 24.14-15

Tema :

ERKEMALANGEN MAN DIBATA

 

A. BENA KATA

Tema kata Dibata ibas wari ntah berngi sipeteluken Pekan Penatalayanenta nina: Erkemalangen man Dibata janah enda ikawitken ras uga kita jadi terang bas gereja. Erkemalangen ertina ernalem man Dibata, tek man Dibata, mengandalkan Tuhan dalam segala urusan kita. Adi bas Bahasa Indonesia nina: Takut Akan Allah.

Arah teluna komponen khotbahta bas wari sipeteluken enda ijelasi man banta uga kin erkemalangen man Dibata janah kai tanda-tanda ntah buah kalak si erkemalangen man Dibata.

B. PENJELASEN TEKS

Nats Khotbah: Perbahanen Rasul 2.43-47

1. Ibas ayat 41-42 ope nats khotbahta enda maka kenca perisitiwa nusurna Kesah Si Badia, ajar-ajar ras kerina si pulung bas sada ingan i Jerusalem idemi Kesah Si Badia janah masing-masing ia ngerana sue ras cakap si ibereken Kesah e man bana. Nterem kalak naksiken peristiwa enda jenari ibas kesempaten e Petrus ngerana man jelma si nterem kerna Jesus eme si ipadanken Dibata si reh nebusi dosa manusia arah kematenNa i kayu persilang dingen ibas Jesus me lit keselamaten. Nterem kalak si megi kata Petrus e tek dingen mindo gelah iperidiken. I bas wari e lit kira-kira telu ribu kalak tambah ku bas perpulungen e. janah kai selanjutna ilakoken perpulungen si enggo tek man Jesus Kristus. Perpulungen e tutus megiken pengajaren i bas rasul-rasul nari. Nggeluh ia sikeleng-kelengen bagi si ersenina. Ras-ras ia ncepik-ncepik roti dingen ras-ras pe ia ertoto man Dibata.
2. 2:43 Melala tanda-tanda sengget ras kejadin-kejadin si mejin ibahan rasul-rasul. Perbahan si e kerina kalak e erkemalangen man Dibata. Tanda sengget si ibahan rasul meneguhken BSM si isehken rasul-rasul, janah ulihna la saja erbahanca kalak megi-megi tek dingen ngaloken BSM tapi tanda sengget enda pe erbahanca perpulungen e erkemalangen man Tuhan, mbiar man Tuhan sabab idahna uga kuasa Dibata erdahin arah pelayanen rasul-rasul.
3. Kai silakoken perpulungen e tandana ia erkemalangen man Tuhan eme pulung ras-ras. Kai silakokenna ibas ia pulung ras-ras eme megiken pengajaren rasul, ngorati kata Dibata sebagai palas kiniteken; jenari perpulungen e nggeluh berbagi, kai si lit ibas ia ipakena ras-ras; bage pe lit ka si ndayaken taneh ntah ertana jenari iberekenna man rasul-rasul gelah ibagiken man kalak sue ras keperlunna. Baik bas rumah bage pe bas rumah pertoton rusur ia kerina pulung. Janah perpulungen ibas persadanna lit ibas keriahen ukur, janah ipujina pe Dibata.
4. Kai dampak man kalak sinaksiken cara geluh perpulungen si lit ibas sikeleng-kelengen e, dampakna, ulihna eme, tep-tep wari itambahi Tuhan ku perpulungen e kalak si iselamatkenNa.

Nats Ogen: Josua 24.14-15

1. Ibas umur Josua enggo metua ipepulungna kerina kalak Israel i Sikem janah ngorati kerina kalak Israel ntah lit denga kin kai sijanjiken Dibata man nini-nini kalak Israel si langa igenepi Tuhan. janah kerina kalak Israel ngaloi maka Dibata enggo nehi kerina janjiNa man kalak Israel. 24:14 "Dage genduari," nina Josua ngumputi rananna, "pehagalah TUHAN janah sembahlah Ia alu tutus ate ras patuh. Pedauhlah dibata si nai isembah nini-ninindu i Mesopotami ras i Mesir, janah man TUHAN sajalah kam ersembah.
2. 24:15 Adi la iakapndu mehuli ersembah man TUHAN , pilihlah sendah ise atendu isembahndu, dibata si isembah nini-ninindu i Mesopotami, ntah dibata kalak Amori si inganindu tanehna genduari. Ipepilihken Josua man kalak Israel apakah ersembah man Tuhan ntah man dibata-dibata si deban, tapi adi aku ras isi jabungku, TUHAN saja ngenca isembah kami." Josua mereken usihen si paguh maka ia ras isi jabuna Tuhan ngenca isembahna.

Nats Invo: 2 Tim 1.8

1:8 E maka ola kam mela ersaksi kerna Tuhanta; bage pe ola kam mela kerna aku si ipenjaraken erkiteken Kristus. Tapi buat baginndu i bas kiniseran guna Berita Si Meriah bagi ibereken Dibata man bandu gegeh guna si e.

Intina ijenda maka kita idilo gelah ola mela ersaksi kerna Tuhan subuk arah ngerana bage pe ncidahken biak-biak simehuli. Janah bas dahin ersaksi e banci jadi lit kiniseran si man hadapen tapi Dibata jine mereken gegeh gelah ngasup kita ngalakenca.

C. PENGKENAINA

Kai banci sirenungken arah kata Dibata enda ikawitken ras tema-ta bage pe jadi terang bas gereja:

1. Erkemalangen man Dibata.

Arah nats khotbah ndai si idah uga jemaat mula-mula, tek ia man BSM si ipeseh Petrus janah iberekenna dirina iperidiken bas gelar Jesus tandana ia tek. Tuhu-tuhu kal iendeskenna kerna keselamatenna ku bas perbahanen Dibata ibas perkuah ateNa arah Jesus Kristus. Tambah si e erkiteken isaksikenna tanda-tanda sengget si ibahan rasul-rasul ibas pelayanenna erteguhna ukurna erkemalangen man Dibata.

Ibas ogen pe siidah uga kalak Israel ras Josua erkemalangen man Dibata erkiteken enggo isaksikenna kiniulin Dibata eme maka enggo itepati Dibata kerina sijanjikenNa man nini-nini kalak Israel.

2. Kai tanda-tandana erkemalangen man Tuhan.

Arah komponen khotbah ndai teridah tanda-tanda kalak si erkemalangen man Tuhan: Pertama Dibata ngenca isembahna bas geluhna bagi Josua; pulung ia ras-ras guna ngorati kata Dibata, megiken pengajaren si isehken ibas bas paksa pulung; nggeluh si keleng-kelengen; nggit berbagi sada ras sidebanna seh maka la lit kalak si kekurangen.

Bage pe kalak si erkemalangen man Tuhan nggit erberita kerna BSM sekali pe erkiteken dahin e ndatken kiniseran, tek maka Dibata sendiri mereken gegeh guna ngasup terus naksiken BSM man kalak si deban.

3. Jadi terang bas gereja.

Geluh kalak si erkemalangen man Tuhan la banci lang jadi terang ia ibas gereja. Ertina cara geluhna sendiri eme cara geluh simehuli bagi siituduhken jemaat mula-mula seh maka kehadirenta bas perpulungen maba keriahen ras kemaalemen ate man teman-teman si deban.

D. PENUTUP

Bagi nina temata ndai kita idilo gelah nggeluh erkemalangen man Dibata, sabab Dibata enggo ncidahken keleng ateNa si mbelin man banta. Ibas Jesus enggo iberekenNa keterkelinen man banta. Janah ibas geluhta tentu enggo melala kal perbahanen-perbahanen simehuli bas Dibata nari si aloken. La lit dalanna kita la erkemalangen man Tuhan. Emaka mari dage sicidahken biak-biak tandana kita erkemalangen man Tuhan, geluhta jadi terang man teman-temanta ras kalak si deban. Amin.

Bujur ras mejuah-juah:

Pdt. Sahabat Perangin angin MTh

GBKP Rg Pd Gede