SUPLEMEN PEKAN KEBAKTIAN KELUARGA GBKP TAHUN 2023 WARI 7, KHOTBAH LUKAS2:8-20

Invocatio :

“Emaka bengket ia ku bas idahna anak ndai ras Maria, NandeNa. Jenari erjimpuh ia nembah Anak e. Ibuatna erta-erta si ibabana e, jenari ipersembahkenna man Anak si mbaru tubuh e. Erta-erta si ipersembahkenna e, eme : emas, kumenen ras mur” (Matius 2 : 11)

Ogen :

Jesaya 9 : 1b – 7

Tema :

Jabu Si Maba Berita Si Meriah

 

I. Kata Penaruh

Injil Lukas mereken penekanen bahwa Dibata ibas karya penyelamatenNa erdahin ibas Sejarah kegeluhen doni enda, ija perbahanen-perbahanen Dibata e ihadirken ibas Sejarah kegeluhen manusia si mengacu ku bas keterangen waktu, ingan, bagepe pelaku ibas peristiwa karya Dibata e. Lukas memaknai Natal sebagai peristiwa sejarah penyelamaten ija Dibata reh ibas rupa manusia biasa eme Jesus Kristus, si mpeteruk baNa, situbuh i Betlehem, i karang asuh-asuhen ibas pelangkah. IA reh guna mulahi manusia ibas kuasa dosa sim aba kematen. Karya ras perbahanen Dibata simbelin e i wujudnyataken arah ketubuhen Jesus Kristus si dem alu kesederhanaan.

II. Isi

Nats khotbahta nuriken sehna Berita Si Meriah kerna ketubuhen Jesus Kristus Juruselamat doni nandangi permakan-permakan i mbalmbal. Nandangi permakan me perlebe isehken malekat Tuhan kerna ketubuhen Jesus, labo man imam-iman ntah pe pejabat kerajan. Padahal permakan ibas jaman si e eme golongen kalak si meteruk ras melket (hina dan rendah), kalak si la iperhitungken dingen terpinggirken. Sanga permakan e ngiani asuh-asuhenna, rempet tedis sekalak malekat Tuhan, janah terang si rehna ibas Tuhan nari nerangi sekelewetna. Situasi enda erbahanca mbiar permakan-permakan e, emaka ipetetap malekat Tuhan ukur permakan e alu ngataken ; “Ula mbiar” sebab berita si ibaba malekat e eme Berita si Meriah kerna ketubuhen sekalak Raja si mbelin dingen mbisa i kuta Daud, Raja siengkuasai kerina sinasana, Raja si jadi keselamaten ras penampat man bangsaNa, Raja si dem keleng ate dingen mbaba keriahen man kerina manusia. Raja e tubuh i Betlehem, ibaluti alu uis dingen medem ibas pelangkah. Enda kerina nuduhken maka raja si tubuh e reh alu dem kekelengen; keberpihaken nandangi kalak si meteruk, si la iperhitungken, la ndatken ingan, medanggel kegeluhenna, kalak si tertindas; dingen IA reh ibas kiniteruken ukur. ketubuhenNa la saja maba keriahen tapi pe maba pengarapen si mbaru kerna kegeluhen s idem kedamen (Calvin ngataken maka kata dame/ damai sejahtera ijenda eme damai antara manusia ras Dibata simbabai banak u bas kedamen kegeluhen ras pusuh secara pribadi bagepe kegeluhen s idem alu kedamen sapih- sapih manusia). Kenca berita e isehken malekat e man permakan-permakan, teridah enterem maleketa surga tedis ras malekat ndai dingenna rende ersurak muji ras mpermuliaken Dibata. Permakan sienggo ngaloken berita si meriah kerna ketubuhen Jesus Kristus e minter lawes ku Betlehem guna ngenehen kejadin si lit ije sue ras siikataken malekat ndai. Pedas-pedas ia kerina berkat seh ibas ingan e idapetina Maria ras Jusup bagepe sekalak anak sangana medem ibas pelangkah bagi si ituriken malekat Tuhan. Kerina si terjadi e ituriken permakan e man Maria bagepe Jusup seh pe man kalak si deban sierbahanca kemamangen kerina kalak si megi berita e tapi Maria iukurina ras ibunikenna ibas pusuhna erti kata siipeseh permakan-permakan e. kenca si e mulih me permakan-permakan e janahna rende muji Tuhan sebab kerina siituriken malekat e payo bage jadina.

Ogenta nuriken nubuaten nabi Jesaya kerna kerehen sekalak Raja si reh pagin, si mabai bangsaNa pepagi ndarat ibas kegelapen nari ku bas sinalsal terang si erkinar, siibas awih kematen nari ku sinalsal terang si harhar. Raja e pepagi mereken keriahen si mbelin man bangsaNa, icidahkenNa perbahanenNa si adil-benar dingen dem keleng ate, ipulahina bangsana ibas kerina kiniseran erkiteken itindes bangsa si kejam, italukenna pepagi kerina musuh-musuhna. IA me pagi si jadi pemimpin bangsaNa, IA igelari penampat si meganjangna sai mereken keselamaten man bangsaNa, IA me Dibata si mada kuasa, Bapa si rasa lalap, Raja si mbaba kedamen, kuasaNa la erbaleng, IA merentah alu dem kebenaren ras kebujuren genduari nari seh ras lalap.

III. Pengkenaina

Tema pekan keluarganta ibas berngi si pe-7ken enda eme Jabu Si Maba Berita Si Meriah. Enda ngingetken dingen mpeteguhi mulihi kerna erti ras tanggungjawab kegeluhenta selaku jabu-jabu kalak Kristen maka ibas kehadirenta ras keberadan jabunta arus tetap ngasup naksiken kerna kuasa, kemulian rasa keleng ate Dibata ibas kegeluhen enda. Kita ras isi jabunta la banci hanya sekedar jadi singaloken berita si meriah tapi pe arus ngasup jadi simaba dingen mpebarken kerna berita simeriah e man sekelewetta. Segalah enda banci tersehi, piga-piga hal perlu jadi perenungenta ibas berngi enda eme :

✓   Ibas ersikap ngalo-ngalo ketubuhen ras kerehen Jesus Kristus Juruselamatta e, kita ras isi jabunta arus ersikap alu mehuli. Labo saja ersikap kerna penyambuten ras perayaan si meriah tapi pe ersikap secara pusuh perukuren ras kegeluhenta. Khususna ibas minggu-minggu Advent si bakalen sidalani, tuhu-tuhu kin min sipakeken kesempaten e guna mpekena-kena ras mpelimbarui kegeluhenta bagi singena ate Dibata (ula min kita terjeng ndalani Minggu Advent ntah pe merayaken Natal tanpa pemaknaan ibas kita). Sipersiapken dirinta ras jabunta jadi persembahen si mehuli ras terbaik man Dibata bagi siibahan guru Timur nari (Invocatio).

✓   Bagi permakan si awalna turah kebiaren tupung jumpa ras malekat Dibata salih jadi keriahen ras semangat si mbaru ibas ngaloken berita si meriah. Bageme min pe ibas kegeluhenta, banci saja ibas ndalani kegeluhen enda melala kearun ate ras kebiarenta tapi ibas kita menyambut ras merayaken ketubuhen Jesus Kristus e turah min semangat ras pengarapen si mbaru ibas kita. Lanai kita ikuasai kearun ate ras kebiaren. Jabu singaloken berita si meriah e ibas kegeluhenna, kedamen ras kemalemen ate jadi sikerajangenna.

✓   Berita si Meriah sienggo sialoken la banci terjeng ngadi ibas kita ras jabunta. Kita ras jabunta ka me jadi dalan Dibata mpeseh berita keselamaten e man doni enda. Arah kegeluhenta ibas jabu, ketutusenta kerina anggota jabu ibas erkiniteken, kiniersadan arihta ras kengasupenta encidahken kegeluhen sidem keleng ate, ibas kita nehken tanggungjawabta baik selaku bapa, nande, anak bagepe ibas pendahinta sekalak-sekalak e jadi dalanta guna mpeseh berita si meriah e.