PEKAN DOA GBKP TAHUN 2023 WARI VII, ROMA 12:4-8
Invocatio :
“Erkiteken si e ertotolah min perpulungen si tutus, tupung ia i baskiniseran. Gelah adi reh galumbang kesusahen, la seh man bana.” (Masmur 32.6)
Kotbah :
Roma 12:4-8
Tema :
SADA KULA IBAS PERSADAN RAS KRISTUS
A. BENA KATA
Kenca nggo siikuti Pra Pekan Doa wari I-III bage pe Pekan Doa wari I-VI seh me kita ku bas wari pe VII ken, wari si perpudina, penutup ibas kita ngelakoken Pekan Doa tahun 2023 enda. Bagi nina tema umum Pekan Doa Tahun 2023 enda: Ertoto Guna Rarasen Dibata (Masmur 122.1-9), ija adi sinen teks enda ngingetken kita piga-piga hal:
- Sada keriahen man pemasmur lawes ku rumah Tuhan. Ija salah sada dahin penting reh ku rumah Tuhan eme ngendesken pertoton man Dibata disamping megiken kata Dibata rasm uji nembah IA.
- Pemasmur ngajuk, ndilo gelah kerina kalak Israel bage pe suku-suku bangsa si reh ku Jerusalem ertotolah gelah Jerusalem dame ras senang (6,9). Janah kalak si erkeleng ate man Jerusalem ibereken kejuah-juahen.
Arah enda jelas pengajuk pemasmur gelah kerina kalak Israel ras bangsa-bangsa is deban si reh ku rumah Pertoton si reh ku Jerusalem notoken gelah kerina kalak Israel (rarasen Dibata) ipasu-pasu Tuhan alu kedamen ras kesenangen (kesejahteraan). Janah kalak si notokenca ndatken pasu-pasu kejuah-juahen.
B. PENJELASEN TEKS
1. Khotbah: Roma 12.4-8
- Ø SADA KULA KAP KITA
I bas kulanta si sada enda melala ringringna, janah kerina ringring e lit gunana. Bage pe, amin nterem gia kita, tapi sada kula kap kita i bas persadanta ras Kristus, janah kita ipersada kerina bagi ringring i bas sada kula.
Paulus menganalogiken perpulungen si nggo ersada ras Kristus e desken sada kula, ija ibas kula ndai melala ringringna. Bagem tep-tep anggota perpulungen eme rinring ibas kula ni Kristus. Janah tep-tep ringring nggo lit inganna si payo ras masing-masing lit gunana rikutken tujunna. E maka ringring si berbeda ndai labo guna iperbandingken sabab masing-masing kin berbeda ras masing-masing ringring ndai memiliki peran dan fungsi yang berbeda. Janah tep-tep ringring erguna man ringring si deban. Saling membutuhken ras saling melengkapi. Emaka tep-tep ringring laabo lit kesirangen ras ringring sideban.
- Ø PERGUNAKENLAH KENGASUPEN SI PELAIN-LAIN E.
E maka sipergunakenlah kengasupenta si pelai-lain e si enggo ibereken Dibata man banta rikutken lias ateNa.
- Adi man banta ibereken Dibata kengasupen ernubuat, silakokenlah e sue ras ajaren kiniteken.
- 12:7 Adi man banta ibereken Dibata kengasupen guna nampati kalak, sisampatilah ia.
- Adi man banta ibereken Dibata kengasupen ngajar, ngajarlah kita.
- 12:8 Adi man banta ibereken Dibata kengasupen petetap ukur kalak, silakokenlah e.
- Kalak si ngasup mere man kalak si deban arus iberekenna e alu ukur menahang;
- kalak si lit kengasupenna jadi peminpin, arus ia tutus erdahin;
- kalak si ngasup encidahken perkuah ate man kalak si deban, arus ibahanna e alu ukur meriah.
Ibas teks enda lit 7 pemere kengasupen (karunia) si turiken Paulus si ibereken Dibata man perpulungen. Tentu labo si pitu enda saja, melala dengan kengasupen sideban si ibereken Dibata man perpulungen gelah ipake guna membangun perpulungen. Janah tep-tep perpulungen labo lit si kesilahen emaka kerina perpulungen arus sadar kerna pemere enda, janah pemere enda ibereken gelah ipakeken guna ngelai, guna majekken kula ni Kristus.
2. Invo: Masmur 32.6
- Ø PERPULUNGEN SI TUTUS ERTOTO (ORANG SALEH BERDOA)
Erkiteken si e ertotolah min perpulungen si tutus, tupung ia i bas kiniseran. Gelah adi reh galumbang kesusahen, la seh man bana. Ibas ayat enda njelasken la saja kerna pertoton si payo tapi uga kalak situtus (orang saleh, orang benar) mpenangkih pertoton man Dibata. Bagi nina bas Jakub 5.16b: “Pertoton kalak si bujur ergegeh kal). E maka tupung paksa reh kiniseran, galumbang kesusahen gelah kalak situtus ertoto kalak si bujur ertoto gelah ibegiken Tuhan janah kiniseran ras galumbang kesusahen la seh man bana.
C. PENGKENAINA
- Ø SADA KULA IBAS PERSADAN RAS KRISTUS
Bagi nggo ndai isingetken ibas kata Dibata maka i bas Kristus kerina kita perpulungen sada kula kap. Tep-tep perpulungen ndatken ingan si payo sue ras nggo ibereken kengasupen si khusus, kengasupen sipelain-lain. Emaka tep-tep perpulungen idilo gelah makeken, mempergunaken kengasupenna guna ngelai ibas perpulungen e. Dibata labo mereken kerina kengasupen man sekalak jelma gelah ia si sada ndahiken kerina dahin bas tengah-tengah perpulungen, tapi tep-tep kalak ibereken kengasupen gelah kerina muat bagin ibas ndahiken dahin Tuhan. melala kal dahin si man dahinken emaka kerina arus erdahin rikuteken kengasupenna. Sue ras sasaren program pelayanen tahun 2023: Jemaat Menjadi Pelaku Aktif Pelayanen.
- Ø TOTO NGKAWITKEN KERINA PERPULUNGEN
Aminna gia secara fisik la kita banci jumpa ras kerina teman-teman perpulungen sideban tapi banci kita ersada arah pertotonta. Banci jadi tanta la seh njaka temanta, nahenta lanai ngasup erdalan ndahi ku rumah temanta ras sidebanna tapi arah ertoto banci kita ersada, arah ertoto ipejumpaken kita. E maka si bangunlah kebiasan ertoto nandangi kerina teman-teman perpulungen, sitotoken alu tutus, janah kita pe rusaha ka gelah nggeluh tutus, bujur gelah pertotonta megegeh, ibegiken Dibata janah ibereken simehuli arah pertotonta. Khususna adi lit ieteh temanta sanga bas kiniseran ntah galumbang kesusahen ula kita lupa notokenca gelah kiniseran ntah kesusahen ndai iangkatken Dibata, ipulahi Dibata senina turangta ibas kesusahenna.
Bage kita selaku kula ni Kristus ula lupa saling mendoaken khususna kerina si ngelai bas tengah-tengah gerejanta mulai bas Runggun, Klasis seh ku Moderamen GBKP gelah kerina isampati Dibata ibas ndahiken dahin pelayanen.
D. PENUTUP
Kenca dung kita ngelakoken Pekan Doa maka situtup me alu Lakon Persadan Si Badia. Lakon Persadan Si Badia enda pe ngingetken maka i bas Kristus kerina kita ersada. Sabab kerina kita ngaloken penebusen dosanta arah kula ras darah ni Kristus siisimbolken alu roti ras anggur. Emaka mari sijaga persadanta arah nggit kita makeken kengasupenta guna ngelai teman-temanta. Amin.
Bujur ras mejuah-juah:
Pdt. Sahabat Perangin angin MTh-GBKP Rg Pd Gede
