SUPLEMEN PEKAN PENATALAYANAN GBKP TAHUN 2023-WARI II

Invocatio    :    Ula pelepas dirindu jadi seri ras doni enda, tapi berelah maka perukurenndu ipelimbarui Dibata. Alu bage banci idatndu kai sura-sura Dibata, kai si mehuli, kai si ngena AteNa, janah kai si sempurna ( Rom. 12 : 2 )

Ogen           :    2 Raja-raja 23 : 1-15

Kotbah       :    Perbahanen Rasul-Rasul 5 : 29-32

Tema          :    Ngikutken Dibata

---

 

 

A. BENA KATA

Ibas wari sipeduaken Pekan Penatalanenta tahun 2023 enda nina: Ngikutken Dibata. arah kerina komponen nats khotbahta sendah iajari kita uga kin situhuna ibas ngikutken Dibata e. Kai-kai saja si arus sihadapi ibas kita ngikutken Dibata. Janah kai arus si bahan gelah kita tetap setia ngikutken Dibata, rash al sidebanna

B. PENJELASEN TEKS

1. Khotbah Perbahanen 5.29-32

- Kenca peristiwa Pentakosta Petrus, Johanes ras ajar-ajar si deban mulai nehken kata Dibata, ngerana kerna Berita Si Meriah eme kerna Jesus. Ibas nggo mulai ertambahna kalak si tek, janah ajar-ajar pe terus erberita kerna Jesus janah radu ras berita siipesehna melala pe tanda sengget si terjadi si erbahanca lanai terbendung reh teremna rusur jelma si tek man Jesus. Erkiteken si e nembeh ate imam-imam ras kepala pengawal Rumah Pertoton rikut pe kalak Saduki. Erkiteken si e Petrus ras Johanes idilona ku persidangenna gelah olanai ngerana kerna Jesus. Tapi Petrus ras Johanes alu tegas ngataken, “Kamlah kerina ertimbang si apai kin mehuli iakap Dibata: patuh kami man bandu ntah man Dibata.”

-Konteks nats khotbahta enda teridah maka Imam si Mbelin ras teman-temanna kalak Saduki mulai erbahan tindaken man rasul-rasul. Itangkapna rasul-rasul e, jenari itamakenna ku bas penjara. Tapi berngina malekat Tuhan mulahi rasul-rasul e, janah kenca terang pepagina rasul-rasul ndai nggo ka erberita, ngajar i Rumah Pertoton. Tupung Imam si Mbelin ras teman-temanna pertua-pertua kalak Jahudi lako atena erbahan sidang janah ngelegi rasul-rasul e, ternyata rasul ndai lanai lit bas penjara sementara kerina pintu penjara terkunci dengan baik. Tapi lit kalak maba berita maka rasul-rasul enda lit ibas Rumah Pertoton. Emaka isuruh ia ilegi tapi la alu kekerasen. Emaka isuruhna rasul-rasul e ku bas janah tedis i lebe-lebe sidang. Janah kai nina Petrus ras rasul-rasul si deban bas sidang enda eme jadi nats khotbahta.

-Petrus ras rasul-rasul si deban ncidahken kepatuhenna man Dibata. 5:29 Ngaloi Petrus ras rasul-rasul si deban nina, "Kami arus ngikutken Dibata, labo manusia. Ngkai maka Petrus ras rasul si deban pang naksiken Jesus man Imam si Mbelin ras man kerina si hadir ibas sidang e, sabab ia me saksi janah isampati Kesah Si Badia, maka Dibata si isembah nini kalak Israel enggo mpekeke Jesus i bas si mate nari, kenca Ia enggo ibunuh alu makuken Ia ku kayu persilang. Dibata enggo ngangkat Ia dingen mereken kuasa man baNa jadi Raja dingen Penebus, gelah kalak Israel jera dingen dosa-dosana ialemi Dibata. Jadi Jesus si iberitaken rasul eme si erkuasa jadi Raja dingen Penebus. Jadi Raja si arus ipatuhi rasul-rasul sabab IA si erkuasa, IA me Penebus si isuruh Dibata guna nebusi dosa manusia, janah enda kerina ibahan Dibata gelah kalak Israel ras kerina manusia jera ibas dosa-dosa nari.

2. Ogen: 2 Raja2 23.1-15

- Arah ogenta teridah uga raja Josia ngelakoken pembaharuan ibas kepatuhenna man Dibata. tupung Josia maba kerina pemimpin Israel ku Jerusalem bage pe kerina rayat si nterem ku Rumah Pertoton, ije ibahan Josia perpadanen ras Tuhan, maka erkemalangen ia man Tuhan, make undang-undang ras kerina tuntuten si lit ibas perpadanen e, sue ras si tersurat ibas kitab e. janah kalak Israel pe erbahan perpadanen maka patuh ia man Dibata.

- Tandap kepatuhen Josia emaka mulai me ibersihkenna Rumah Pertoton alu mpedarat kerina barang-barang si sedekah enda ipake guna ermbah man dewa Baal, Dewi Asera, ras bintang-bintang. Jeari icilukna I darat kuta Jerusalem deher Baluren Kidron. Bage pe kerina imam-imam si sedekah enda erdahin ipengadina. Asrama ingan tading kalak si pendahinna erlua-lua ibas Rumah Pertoton irontaskenna. Kerina batar-batar ingan persembahen si lit ibas kuta e imelketi Josia gelah ulanai kalak nembah man berhala-berhala. Kai si ibahan Josia enda megati ikataken Reformasi Josia. 

3. Invo: Roma 12.2

- Ola pelepas dirindu jadi seri ras doni enda, tapi berelah maka perukurenndu ipelimbarui Dibata. Arah apai perukurenta banci ipelimbarui, tentu arah kita nggit rusur ngoge ras mpelajari kata Dibata jenari Kesah Si Badia ngajari kita ngangkaisa. Arah kata Dibata me si eteh sura-sura Dibata, kai si mehuli, kai si ngena ateNa, janah kai si sempurna.      

C. PENGKENAINA

1. Ngikutken Dibata

Jesus sendiri tupung IA nggeluh denga ras ajar-ajarNa megati kal ikatakenNa, “Ise atena ikut ras Aku arus ipersilahangna bana, ipersanna kayu persilangna jenari iikutkenna Aku (Bd. Mat.16.24). Jadi ngikutken Jesus labo mesunah, tapi lit kiniseran ras tantangen si deban si arus sihadapi ibas ateta ngikutken IA.

Bagem siidah Petrus ras rasul-rasul si deban ngenanami perlawanen bahken kekerasen seh pe itamakenna ku penjara, tapi Petrus ras rasul-rasul si deban teridah uga ia setia kerina ngikutken Tuhan. La ia surut sekali pe melala perbeben. Tentu enda kerina erkiteken alokenna gegeh ras kuasa ibas Kesah Si Badia nari.

2. Josia sekalak raja tokoh Reformasi

Reformasi silakoken Josia berawal ibas idatken kalak Undang-Undang Tuhan, Taurat Tuhan, janah ia radu ras kerina rayatna erpadan guna matuhisa. I bas tekad ras komitmenna guna ngikutken Tuhan, emakailakokenna pembersihen mulai bas Rumah Pertoton bage kerina imam-imam si erdahin sedekah enda, jenari ingan-ingan si biasa ipake kalak Juda jadi ingan ersembah kerina imelketi Josia.

Jadi Reformasi Josia imulai ibas ia erngena ate man undng-undang Tuhan janah UU Tuhan enda ijadikenna jadi palas kerina pendahinna.

3. Ekklesia reformata semper reformanda (kalak si tek/gereja terus menerus iperbharui.

Bagi nina ndai teks invocatiota, selaku kalak Kristen la banci lang terus menerus kita iperbaharui janah enda imulai ibas akal budita nari. Emaka perlu kita terus mpelejari kata Dibata gelah alu bage sieteh ras siangkai kai singena ate Dibata.

D. PENUTUP

Jenari ibas ngikutken Dibata si teridah maka kata Dibata si ban jadi palas ibas kerina pendahin ras perbahanenta la banci lang tergejap nanam si mehuli man kalak. Sabab silakoken kita eme kap erkeleng ate, ngelakoken si bujur ras simehuli.

Bujur ras mejuah-juah:

Pdt. Sahabat Perangin angin MTh

GBKP Rg Pd Gede