PEKAN DOA GBKP TAHUN 2019 WARI I, ROMA 12:12
Invocatio :
“Ertotolah katawari pe” (1 Tes.5:17)
Renungan :
Roma 12 : 12
Tema :
“Ertoto la erngadi ngadi”
Roma 12:12 “Meriahlah atendu ibas kam erpengarapen, megenggenglah kam ibas kiniseranndu, janah ertotolah kam man Dibata la erngadi ngadi”.
Telu kalak anak Sekolah Dasar (SD) kelas V, (tergelar, Batu, Lajur ras Ramban) terburu-buru berkat ku sekolah, ibas perdalinen lit kebiaren kalak enda teluna sabab waktu masuk enggo ndeher sedangken jarak tempuh ndauh dengan. Ibas situasi sibage rupana Batu ngusulken ngadi kensik guna ertoto, mindo man Tuhan gelah ula terlambat. Tapi Lajur ngataken, adi ngadi ka kita lebe guna ertoto pasti waktunta terbuang kita reh dekahna waktu terlambat. Ramban mereken usul nina” mari sipercepat langkahta, song kiam kita janah ertoto mindo gegeh man Tuhan alu bage ngasup kita nerusi perdalanenta seh ku Sekolah”
Ertoto la erngadi-ngadi (Tema), labo berarti terus-menerus, lanai lit dahin sideban idahiken, sipenting ertoto saja, tapi bagi pengalamen anak SD 3 kalak enda ndai, “Ora Et labora”.
Lit telu kalimat si erkawiten sada ras sidebanta ibas Renungenta berngi enda :
Sipemena : “Meriahlah atendu ibas kam erpengarapen”
Erpengarapen si isingetken ijenda labo kerna Keluarga bahagia, anak-anak sukses, kesehaten, jabaten rsbna tapi erpengarapen nandangi kegeluhen simbaru, kekeken, kegeluhen ras Kristus.(Bdk.1 Pet.1:3 ;”........IberekenNa man banta kegeluhen simabru, alu mpekeke Jesus Kristus ibas simate nari. Si enda mereken pengarapen singeluh man banta), pengarapen sibageme erbahan la kita ragu, meriah si akap sabab janji Tuhan e pasti.
Sipeduaken: “Mengenggenglah kam ibas kiniseranndu”
Kiniseran si isingetken ijenda labo berarti, pinakit, kegagalen, anak-anak la bagi ukur rsbna, Tapi kiniseran erkiteken kam ngikutken Krisutus.(Bdk. Joh.16:33 ; “sienda kukataken man bandu gelah malem atendu erkiteken kam ersada ras Aku. Jumpa kiniseran me kan ibahan doni enda. Tapi ola kam mbiar! Nggo kap kutaluken doni enda.”). Erkiteken sie maka kalak sierkiniteken ipersingeti arus sabar/”bertekun” atau kata sideban “tahanlah” ola mobah kiniteken.
Sipeteluken : “Ertotolah kam man Dibata la erngadi-ngadi”
Sada hal sirus silakoken ibas ngalaken/nahanken kiniseran, eme ERTOTO, sabab e ulu gegehta, sipengasup kita ngeluhken geluhta selaku kalak sierkiniteken. (Thomas Aquino, ngataken:”Sebab Doa membangkitkan kerajinan dan menyalakan semangat didalam kita, mendorong kita untuk melayani Tuhan, menambahkan sukacita bagi kita, dan merupakan pertolongan ditengah penindasan”).
Marilah kuga gia beratna kiniseranta ibas ngikutken Tuhan, melala silabagi ukur, latih, keri, meling ka, la urak semangatta, tetap “maju tak gentar membela yang benar” sipindo gegeh man Tuhan ibas pertotonta. “Sitotoken kai sibakal sidahiken ras Dahiken kai sienggo sitotoken”.
Pdt. Iswan Ginting Manik
GBKP Pondok Gede
