Pekan Doa Wari IV Rabu 16 Mei 2018, Ogen Johanes 17:20-23

Invocatio :

“Erkitekensi e erjaga-jaga dingen tutuslah kam i bas ertoto.” (Epesus 6:18c)

Renungen :

Johanes 17 : 20 – 23

Tema  :

Ertoto kerna Gereja

1. Kata Perlebe

Kita megati ertoto ras mindo man Tuhan, ngarapken pertotonta iperdiateken ras isehken pemindonta. Sekalenda kita ipindo guna emperdiateken pertoton Jesus ras nehken peraten Jesus siisehken-Na iba peroton-Na. Sebab arah pertoton enda danci siangkai tujun ras rencana Tuhan Jesus kulebe ibas majekken perpulungenNa.

Ibabo batu palas pengakun kiniteken nandangi Jesus Kristus me ipajekken Jesus perpulungen-Na. Ibas kita emperaktekken kinitekenta man Jesus me kita ersada. Sedekah Jesus Kristus jadi palasta ersaksi, ersada ras sikelengen maka arusna teridah harmonisi metunggung ibas perpulungenta.

 2. Empebagesi Pengangkan

Pertoton Jesus enda labo saja man ajar-ajar-Na sienggo tek man baNa, tapi pe man kalak-kalak sitek ulih berita simeriah sipeseh ajar-ajar e. Pertoton enda guna kerina kalak sikerajangen Kristus. Man kalak sienggo bengket kubas persadan ras Kristus sikap ngalo-ngalo kalak sinandangi bengket; bage pa kalak sibengket dancika menyesuaiken diri ras kalak sienggo ibas persadan ras Kristus. Sabab Tuhan meteh bahwa perpulungenNa pepagi la saja kalak Jahudi sitek man baNa tapipe kalak-kalak non-Jahudi sipersada-Na jadi rarasen-Na. Emaka ibahan-Na persiapen guna erbahan harmonisasi ibas empersada kerina bangsa jadi sada kula ibas Kristus.

Tujun Jesus segelah kerinana ipersada ibas sada kula eme sada perpulungen arah kerina ingan ras ibas kerina paksa. Maka sinipepulung Jesus enda eme perpulungen situhu-tuhu mbelin. Jesus tuhu-tuhu meteh ise saja sinandangi tek man baNa, itandaiNa me ise saja sikerajangenNa. Maka tujun pertoton enda jelas eme kempak kalak-kalak sitek man Jesus erkiteken ipilih Jesus jadi sikerajangenNa. Ijadiken Jesus maka kerina kalak sitek man baNa jadi sada kula ibas Jesus Kristus

Siniarapken Jesus segelah perpulungen enda igerakken Kesah Sibadia. Sabab Kesah Sibadia me sienjadiken tep-tep kalak sitek jadi anak-anak Dibata. Kesah Sibadia erbahan kiniersadan sibadia guna tujun-tujun sibadia. Perpulungen labo persadan politik siertujun duniawi. Kecenderungen erjengil erkurang erkiteken mengutamaken kemulian Kristus asangken ndarami kemegahen doni.

Segelah perpulungen ersada ibas iketen keleng ate Kristus, segelah sada ukur ras sada penggejapen ibas Kristus. Payo bahwa labo seh kubas perkara sikitik-kitikna pe ersada kerina. Saja ibas pengertin simbelgah-mbelgahna, umpamana ibas penandai nandangi Dibata, sada kata maka Dibata e lebih penting asangken kaipe ibas doni enda. Bahwa dosa manusia eme pelanggaren sisehkal kelekna erkiteken encurnaken kebadian Dibata. Ras Kristus eme teman simehulina erkiteken enggit Ia nebusi kita arah dosa. Dingen radu tek maka lit kegeluhen silebih mehuli asangken kegeluhen sigenduari enda. Kalak-kalak sienggo ngaloken penebusi dosa arah Kristus ngaloken biak-biak Kristus. Emaka ibas kita enggo lit pusuh simbaru simbabai kita ersada guna empermuliaken Kristus. Ersada ibas rencana ras tujun, siakui maka kemulian Dibata eme tujun siterutama.

“O Bapa, ertoto Aku man baNdu gelah ersada min ia kerina. Ersadalah min ia ras Kita, bagi Kam ersada ras Aku janah Aku ersada ras Kam. Ersadalah min ia gelah tek doni enda maka Kam me sinuruh Aku”. Pusuh Jesus terbeban nandangi kiniersadan kalak si erkiniteken, segelah kerina “sada kata ibas penandai nandangi Kristus”, alu bage mbereken kesaksin sibenar ras utuh. Buah simehuli eme ulih kiniersadan kalak sierkiniteken. Enda me sijadi bukti sejati kerna kebenaren kekristenen. Kiniersadan eme sijadi berita simehuli man doni enda, dingen peturah pengakun simehuli kerna Jesus.

Kiniersadan erbahan gereja megegeh dingen gegeh gereja eme kiniseradan. Maju pe gereja kami nindu tapi erbelat-belat, erpihak-pihak, demper saingen ras lit perjengilen; labo kalak tek. Arus sicidahken bukti nyata bahwa Kristus lit itengah-tengahta ras Kristus simemerintah nandangi kita kerina.

 3. Pengkenaina

Kita kerinaertedeh ate nandangi kiniersadan sienteguh bagi sinituriken Masmur133:1 “Andiko ulina ras senangna, adi kalak siersenina ersada perarih!” Kerina enda arus iupayaken segelah gereja la icedai alu perjengilen tahpe alu tujun kemegahen doni saja.

Kerna kiniersadanta ibas GBKP enda, adi siperdiateken enggo melala erbagenda kita. Bagi tempa-tempa enggo lit GBKP ala Kharismatik, GBKP ala Pentakosta, GBKP ala Betani ras sidebanna; erbage-bage gaya peribadahen dalanken kita. Lit potensi perpecahen kedepan, sebab masing-masing menganggap bahwa carana sipayona. Pantang ipandang, danci kita itengkingna adi sikritisi carana.

Arus lit kesepakaten bersama, kuja ateta sibaba GBKP enda. Ula min sipejangjang pusuhta guna ngataken “kelebihenta asangken kalak sideban”. Padahal kerina e lengabo teruji, masih dalam taraf uji coba denga kerina. Melalange si “demi” memenuhi selera jemaat, mengikuti trend masa kini, jile-jile ras uga maka siakap senang saja. Lanai mbages iukuri,bagenda kin singena ate Jesus guna silakoken? Ijenda me letak penting pertotonta guna ras-ras kita ndarami peraten Jesus nandangi perpulungenNa.

Tentuna siakui denga maka Jesus me simada gereja-Na, Jesus eme Kepala Gereja, kita enda terjeng persuruhenNa, pelayan-pelayan sisetia kempak Jesus. Adi kita meteruk ukur ibas adep-adepen Jesus maka kiniulin gereja teridah ibas kiniersadan.Ula min kita bengketk ubas “kesombongan yang terselubung dalam gaya ibadah yang wah,” atau “melalasa improvisasi”, padahal aturen ras tatanan sibenar ras terarah enggo ibereken man banta ibas Pustaka Sibadia. Ersada kita ibas ndalanken ras enggenepi Kata Dibata, e saja enggo merandal.

Pdt. Sura Purba Saputra, M.Th

GBKP Harapan Indah