PEKAN PENATALAYANEN GBKP 2018 WARI-I, KHOTBAH ROMA 2:1-11

Invocatio :

“Arah Ia ersinalsal terang kemuliaan Dibata, janah Ia tuhu-tuhu
gambar Dibata. Ia me sinatang kerina si nasa lit alu kata-Na si erkuasa. Kenca ibersihken-Na manusia ibas dosa-dosa nari, kundul Ia i Surga arah kemuhen Dibata si Mada Kuasa si meganjangna”. (heber 1:3).

Ogen :

Mazmur 8:1-10

THEMA :

KEMULIAAN DIBATA IBAS MANUSIA

KATA PENARUH
• Secara umum manusia rusuren kel tanpa isadarina jadi guru nandangi kalak sideban, jadi pelatih nandangi kalak sideban. Emaka lanai ateta mamang melala jelma memberikan komentar bahken ngataken maka kalak sideban motu padahal ia sendiri labo beluh kerna kai siiajarkenna e. Umpamana, kalak si nonton pertandingen piala dunia, melala kel penonton tanpa sadarina ipandangina pemain sepak bola erkiteken la banna masuk gawang bola siitendangna e. La isadarina bahwa siiajarina e eme Ronaldo entah pe David Beckham pemain sepakbola terkenal si enggo ahli ibas bidang sepak bola.
• Bahken bas televisi pe megati kel sisaksiken terlepas dari benar atau salah maka melala kel pengamat-pengamat siihadirken adi kune kenca lit sada peristiwa si terjadi, janah la ka sitik pengamat e menyudutken tokoh si terlibat ibas peristiwa e, umpamana peristiwa kecelakaan pesawat, gempa bumi, banjir, sunami, bom meledak, kapal tenggelam, rsd.
• Enda me kinata kegeluhen siterjadi ibas kegeluhen manusia, lebih gampang memberikan penilaian yang negatif terhadap diri orang lain daripada hal positif padahal si mereken penilaian e sendiri pe lenga tentu ngasup ngelakokenca. Tapi lit kang perpayona kai siikataken pandangan etika Kristen, nina, “Pandangan kita terhadap sesuatu menentukan sikap kita terhadap sesuatu itu”. Ertina adi enggo siakap mehuli sekalak jelma e banci jadi mejin pe persurina e mejile kang siakap, tapi adi bas matata sekalak jelma e la mehuli mejile pe persurina pasti mejin siakap lalap. Emaka bas bahan pekan penatalayanenta berngi sipemena enda iajuk kita uga kita ngangkai “KEMULIAAN DIBATA IBAS MANUSIA”.

II. PEBAGESI PENGANGKAAN KERNA TEKS
• Ibas pasal sebelumna Rasul Paulus enggo nggambarken maka keadaan doni kalak si labo Yahudi seri melketna bagi si rusur isingetken kalak Yahudi. Tapi bas perikop enda icidahken maka kegeluhen kalak Yahudi pe seh kel melketna bahken dosa-dosa siilakoken kalak Yahudi melketen asangken kalak si labo Yahudi. Paulus menaken penjelasenna ibas perikop enda alu ngataken maka Dibata pasti reh guna ngadili kalak si erbahan dosa alu la mbeda-bedaken kalak Yahudi entah kalak si labo Yahudi.
• Paulus mandang kalak Yahudi erkiteken nggit kel kalak Yahudi e menghakimi kalak sideban sementara ia sendiri pe ngelakoken dosa. Bangsa Yahudi secara umum eme bangsa si bangga man dirina sendiri ras mperlakuken bangsa-bangsa sideban alu merendahken ras erpengakap maka bangsa sideban seh melketna padahal bangsa Yahudi sendiri seri melketna ras seri jahatna ras kalak sideban. Aminna gia secara umum bangsa Yahudi la nembah man gana-gana bagi bangsa sideban tapi icurnakenna agamana alu ngerampasi rumah pertoton ingan nembah berhala (ay. 22). Bangsa sideban lalit bas ia undang-undang Taurat simereken pemeteh man bana ngelakoken simehuli ras si lang tentu wajar ia ndabuh kubas dosa, tapi bangsa Israel sendiri si lit bas ia undang-undang Dibata singajari ia ngelakoken si mehuli engkai maka erbahan dosa. Tapi ibas mata Dibata la ibedaken kalak si ngelakoken dosa tapi kerina iadili Dibata.
• Perbahanen-perbahanen dosa siilakoken kalak Yahudi eme: ikatakenna maka ia bangsa pilihen Dibata tapi perbahanenna labo bagi bangsa pilihen Dibata, ietehna kai singena ate Dibata guna idalanken tapi la bage idalankenna, ietehna arah undang-undang e milih si mehuli tapi la bage ibahanna, ikatakenna maka ia sinegu-negu kalak sipentang tapi labo bage pendalankenna, ikatakenna maka ia me terang nandangi kalak si lit ibas gelap tapi labo bage ibahanna, ikatakenna maka ia me singajari kalak si motu, ia me guru kalak singuda denga tapi labo bage pengajarina, iajarina maka ibas undang-undang e enggo lit kerina pemeteh ras ketuhu-tuhun tapi arah perbahanenna labo bagi siisuratken ibas undang-undang, kalak sideban iajarina mehuli tapi ia labo bage pendalankenna, imomokenna ola nangko tapi ia nangko, ikatakenna ola erlua-lua tapi ia erlua-lua, ikatakenna maka ciga atena berhala tapi icurnakenna agamana alu ngerampasi rumah pertoton ingan nembah man berhala. (bnd. Ay. 17-22).
• Emaka nina Rasul Paulus jelma sibage la banci lang iukum Tuhan. Kalak Yahudi erpengakap maka keadilen Dibata banci “isogok” alu ngerana megang-megang menentang perbahanen dosa siilakoken bangsa sideban sikin situhuna bangsa Yahudi sendiri pe ngelakoken dosa si bage.
• Tapi bangsa Yahudi e ipemersikna ukurna janah la nggit jera. Si enda me erbahansa reh nembehna ate Dibata nandangi bangsa Yahudi (ay. 5). Hukumen siisehken Dibata man kalak si bage eme ibalas Dibata me pagi man tep-tep kalak sue ras kai si enggo ibahanna (ay. 6). Man kalak si ndarami kemuliaan ras kehamaten, labo guna kegeluhen si genduari enda saja tapi pe guna kegeluhen si reh eme alu la erleja-leja erbahan si mehuli ibereken Dibata me kegeluhen si tuhu-tuhu si la ermasap-masap (ay.7), ibereken Dibata kemuliaan, kehamaten ras kemalemen ate (ay. 10). Man kalak si la nggit jera ras la nggit ngelakoken singena ate Dibata bas geluhna idabuhken Dibata me pernembeh atena (ay.8), ngenanami kiniseran, kesusahen (ay. 9).
• Hukumen ras pasu-pasu siisehken Dibata e la erdombahen man ise pe. Aminna gia bangsa Yahudi lit bas ia hak istimewa sebage bangsa pilihen Dibata tapi ukumen erkiteken la ndalanken singena ate Dibata bas geluhna, man bangsa pilihen-Na epe isehken-Na hukumen-Na e.
• Emaka ibas pengogenta Mazmur 8:1-10 ikatakenna uga pemazmur negasken maka Dibata labo hanya Dibata kalak Israel saja tapi pencipta ras simada doni enda ras isina kerina. Emaka kemuliaan Dibata e situhuna reh teridahna arah karya-karya Dibata si mulia eme manusia (ayat 5). Erkiteken Manusia iciptaken Dibata sebage gambar Dibata (ayat 6a, band. Kej. 1:26). Manusia ngenca ciptaan Dibata sibanci erkomunikasi ras Dibatajanah manusia e ibereken Dibata kuasa guna merentah kerina tinepa-Na. Itangkuhken Dibata manusia e alu kemuliaan ras kehamaten. Emaka la banci lang manusia e harusna nggeluh bagi singena ate Tuhan bas kerina dampar kegeluhenna dingen encidahken kemuliaan Dibata e ibas geluhna.

III. PENGKENAINA
• Temata eme KEMULIAAN DIBATA IBAS MANUSIA. Ibas KBBI ertiKemuliaan eme hal (keadaan) mulia; keluhuran; keagungan; kehormatan. Ibas Alkitab Padan Sindekah (PL) 'Kemuliaan' pada umumna iterjemahken alu kata Ibrani “kavod”. Pemaken kata e erkaitan ras manusia simengacu kubas kekayaan, kemegahan, entah pe reputasi (aminna gia ibas pengertin terakhir kavod rusur kel iterjemahken 'kehormatan'). Ibas kitab Pentateukh ituriken kemuliaan Tuhan erdalan ras bangsanandarat i Mesir nari janah teridah alu bentuk awan si mimpin bangsa e arah padang gurun (Kel 16:7, 10, Kel 24:15-18, Kel 34:5-8).
• Ibas Padan si Mbaru (PB) kata “doxa” nggambarken pernyataan sifat ras kehadiran Dibataibas pendahin Yesus Kristus.Kemuliaan Dibata iidah permakan-permakanpaksa ketubuhen Yesus Kristus (Luk 2:9, 14). Janah ibas pustaka si badia ikataken maka manusia si enggo itepa Dibata menurut gambar Dibata enggo kehilangen kemuliaan Dibata (Rm 3:23). Janah kemulian si enggo bene ibas manusia erkiteken dosa-dosana enggo teridah mulihi arah Yesus Kristus. Janah kemuliaan Dibata si teridah arah Yesus Kristus e me si harus terus teridah ras isehken kalak si erkiniteken man kalak sideban arah pengerana ras perbahanenna.
• Emaka arah bahan pekan penatalayanen berngi sipemena enda marilah sitata kinitekenta, cara pandangta, pengangkanta kerna Kata Dibata, penandaita kerna Dibata kenca sie sielaken man kerina jelma maka kemuliaan Dibata e teridah subuk arah pengerana ras perbahanenta. Terlebih ibas tahun 2018 enda GBKP berusaha Menumbuhkan dan Meningkatkan Kesadaran Warga GBKP Dalam Bidang Politik, Hubungan Dengan Masyarakat dan Pemerintah. Ertina la hanya bas jabu sebagai orang tua, ibas kantor sebagai pimpinan atau karyawan biasa, sebagai pemilik ibas usaha, sebagai pemimpin ibas pemerintahen enda entah sebagai masyarakat biasa tuhu-tuhu ngasup kita encidahken kemulian Dibata e.
• Emaka jadilah kita surat Kristus siitulis labo alu tinta tapi alu Kesah Si Badia gelah ibas kai gia, ijapa gia, ras ise gia, sebagai kai gia kita tuhu-tuhu kemuliaan Tuhan e teridah arah perbahanen ras pengeranata. Guna jadi usihen man banta ndalankenca eme Yesus Kristuslah jadi usihenta. Yesus tuhu-tuhu teladan Agung man banta erkiteken arah Ia ersinalsal terang kemuliaan Dibata, janah Ia tuhu-tuhu gambar Dibata. Ia me si natang kerina si nasa lit alu kata-Na si erkuasa. Kenca ibersihken-Na manusia ibas dosa-dosa nari, kundul Ia i Surga arah kemuhen Dibata si Mada Kuasa si meganjangna (Invocatio).

Pdt. Jaya Abadi Tarigan
GBKP Rg. Bandung Pusat