SUPLEMEN PEKAN DOA GBKP TAHUN 2025, HARI KE 2

Invocatio :

“Man banta sekalak-sekalak nggo ibereken kengasupen si khusus sue ras baginta si patut ibereken Kristus erpalasken lias ateNa.” (Epesus 4 : 7)

Tema : 

“Ersada Guna Kemenangen.” (Keluaren 17 : 8 -16)

1. Kata Perlebe

Perlebe mari ras kita rende nyanyian rohani “Ku Menang”.

Ku menang ku menang; Bersama Yesus Tuhan

Kumenang ku menang, di dalam peperangan

Ku menang ku menang atas segala setan

Haleluya haleluya ku menang.

Kerina kita ersura-sura, ngarap ras ertoto gelah menang. Menang bas kegeluhen, menang ras atan bas Kinirajan Tuhan. Kai si perlu si angka ras si inget gelah kita menang? Jenari kai arus si ban dingen si man pekenan gelah kita la talu tapi menang? Guna si e mari si renungken Kata Dibata arah Pekan Doata wari pe 2 ken.  

2. Renungen/ khotbah

Bangsa Israel sangana i Rapidim bas perdalanen Mesir nari nuju ku Kanaan. Kecibal kalak Israel paksa si e seh kal kotena. Bas paksa ia kote eme reh bangsa Amalek (kesusuren Esau) merangi bangsa Israel i Rapidim. Bangsa Amalek reh merang bangsa Israel alu la lit sababna. La lit bangsa Israel erban provokasi si erbahanca ia reh erperang. Bangsa Amalek reh merang bangsa Israel Enda me perang si pemena si iadapina. Ngadapi kecibal sib agenda Musa selaku pemimpin Israel la ernalem man gegehna ras gegeh bangsana tapi man Dibata. Musa ngandalken penemani ras kuasa Dibata bas erperang. Musa ndilo Josua ras nuruh ia milih piga-piga kalak lako erperang i lapangen. Ia jine ras Harun bagepe Hur (pemimpin ibas suku Juda nari) lawes ku datas uruk lako ertoto ras ersyafaat man Dibata si ilambangken alu ngangkat tan. Josua patuh man persuruhen Musa. Josua la nggit nimbak ras nogan. Josua la keberaten ras la ndarami alasen engkai maka ia arus lit i tengah medan perang, si ala-alan ras musuh, sementara Harun ras Hur lawes nemani Musa, ndauh ibas pedang ras lembing musuh. Ilakoken Josua kerina sue bagi pedah Musa man bana. Idahiken Josua baginna sue pedah Musa man bana. Enda me pemenana Josua jadi pemimpin militer langsung berhadapen ras musuh. Tupung iangkat Musa tanna ku datas menang bangsa Israel. Tapi adi ipesusurna tanna bangsa Amalek si mulai menang. Enda ngataken ras nuduhken maka kemenangen bangsa Israel labo bergantung man gegehna jine tapi bergantung ku bas penemani ras kuasa Dibata si imanifestasiken arah toto ras kepemimpinen Musa si ernalem man Dibata. Peperangen enda la kentisik ngenca tapi erpagi-pagi seh kareben. Dungna latih iakap Musa. Ngidah si enda, Harun ras Hur la kem ras sinik saja. Duana ia ndukung Musa. ibuatna batu gelah jadi ingan kundul Musa. Jenari sekalak ia arah kemuhen Musa ras sekalak nari arah kawesna lako ngangkat tan Musa. Emaka tan Musa banci tetap terangkat seh ben. Emaka kerina kal kalak Amalek italuken bangsa Israel si ikomandoi Josua. Enda nuduhken perluna dukungen ras kerja sama ibas kepemimpinen ras ibas perjuangen rohani. Megati kal kemenangen membutuhken dukungen kalak si deban.    

Tuhan nuruh Musa lako nuratken peristiwa kemenangen enda lako jadi peringet-ingetten man Josua ras kerina bangsa Israel. Emaka iban Musa sada batar-batar ingan persembahen janah igelarina “TUHAN kap Panji-panjiKU” (Yahweh Nissi). Enda sada pengakun ras pe proklamasi maka TUHAN kap ulu kemenangen, perlindugen ras identitas bangsa Israel. Panji-panji eme simbol persadan ras standar perjuangen. TUHAN ngataken maka Ia terus erperang ngelawan bangsa Amalek seh rasa lalap sabab bangsa Amalek reh erperang lako ngkernepken bangsa Dibata dingen rancangen keselamaten Dibata.    

 3. Pengkenaina/ aplikasi

• Nina kuan-kuan lawas, “Bersatu kita teguh, bercerai kita runtuh.” Ungkapen enda gia nggo seh dekahta tapi tetap relevan seh asa gundari ras pepagi. Kuan-kuan si gundari si la ngobah erti ras maknana nina, “Ersada maka megegeh; Ersada maka teridah.” Mbelin kal gegeh ras kuasana adi kita nggeluh ersada ras bekerja sama. Seh kal buena gunana adi nggeluh ersada. Kebalikenna, mbelin kal rugina adi nggeluh sisada ras erbana-bana. Sejarah bangsata nggo mbuktikenca. 350 tahun kita ijajah Belanda alu politikna ‘Devide et Impera’ (pecah belah jenari jajah). Bage nggo isedari para pejuang ras pahlawanta jenari ersada ia kerina emaka kita ngasup mpelawes penjajah.
• Tema: “ERSADA GUNA KEMENANGEN”. Musa, Harun, Hur ras Josua pelain-lain talentana. Talenta Musa ertoto ras mimpin. Harun ras Hur nemani ras numpak teman tupung latih. Josua pemimpin militer, erperang ibas front terdepan ( Tema wari peduaken Pra Pekan Doa). Ibas la seri talentana la ia mecimberu sada ras si debanna. La lit sidalih-dalihen dingen sitogan-toganen. Josua la keberaten aminna ia me si arus berjibaku mpertahenken dareh ras kesah. Ersada ia kerina ndahiken baginna si pelain-lain. Ulih kinersadanna eme kemenangen. Bageme pe kita selaku perpulungen. Tuhan mereken talenta si erbage man banta. La lit si seri bagi nina ibas invocatio. Mari kita nggeluh ersada ibas kinierbagen talenta segelah menang kita. Ola cemburu adi talenta si ibereken Dibata man temanta erbahanca ia tempa sikapen ras mantapen asangken talentata. Kerina talenta si ibereken Dibata perlu, erguna ras saling ngelengkapi lako ndatken kemenangen.
• Si tuhuna ersada la ngenca ibas kinierbagen talenta tapi ersada ibas kerina si payo dingen ngena ate Dibata. Ersada (koinonia) e pedah/ perentah Tuhan Yesus kap. Tuhan Jesus jine ertoto gelah kita nggeluh ersada (bdk. Joh. 17:21). Bagi Tuhan Jesus ertoto gelah ajar-ajarNa/ kalak si tek ersada emaka marilah kita pe ertoto guna kinisersadanta (Tema wari pemena Pekan Doa 2025). Kenca si totoken si lakoken kinisersadanta. Uga gelah ersada ibas kinierbagen talentata bagelah si ban.
• Persadanta ras Kristus erbahanca kita ersada ibas kinierbagenta, ersada ibas peperangen rohani si alaken kita. Persadan si nteguh ras Dibata terjadi arah jabu si ersembah man Dibata ( Tema wari pemena Pra Pekan Doa). Adi persadanta ras Kristus longgar persadanta ras teman murah mosar. Emaka jagalah gelah persadanta ras Kristus ola adem ayem, apa adanya ras ala kadarnya saja. Gelah meteguh persadanta emaka meteguhlah persadanta ras Tuhanta Yesus Kristus. Katawari persadanta ras teman kurang sikap ras mehuli e tandana persadanta ras Kristus man pekenan ras man pesikapen.
• La lit kita si nura gelah talu. Kerina kita ngarapken menang, kemenangen, kemenangen si tetap, kemenangen gilang gemilang. Gelah kita menang mari kita ersada ras bekerja sama ‘erperang.’ Nggeluh sisada, nerapken bana ras erbana-bana seh mesunahna talu ras italuken. Kita la idilo lako nggeluh sisada, erjuang sisada ras erperang sisada. Ersada ras perpulungen, dukungen teman si sada kiniteken mpegegehi kita ngalaken kerina tantangen. Nggeluh ersada, bekerja sama, saling mendukung erpalasken si ngena ate Tuhan eme kunci ras rahasia kemenangen.

Pdt. Juris Tarigan, GBKP RG Bogor