Renungen  :

Markus 14:32-42 (Ertoto Ope Renungen)

Tema :

       “Singabati Ibas Ertoto”

Labo kepe mesunah ertoto. Melala si ngabati ibas kita ertoto. Si ngabati kita ibas ertoto banci darat nari banci ka ibas dirinta nari. I darat nari banci arah suasana si la mendukung ibas ateta ertoto. Umpamana sora gejek si pinger erbahanca la kita banci tutus ertoto. Tapi si mbelinna kal singabati kita ertoto eme ibas dirinta nari jine.

Ibas Jesus bakal ngalaken kiniseran ras kematen i babaNa ajar-ajarNa ku Peken Getsmane. Ingan enda semal ipake Jesus guna ertoto. Paksa sie ceda kal dingen getem kal pusuh Jesus. Ieteh Jesus uga beratna perbeben si bakal si nanamiNa. Sienda erkiteken kerina dosa manusia idabuhken man baNa. Ibas ajar-ajar si sepuluh sada, (Judas enggo lawes ndayaken Jesus ateNa), ibabaNa ku Peken Getsmani. Ibas si sepuluh sada e, telu kalak ajar-ajarNa ibabaNa terbagesen ibas Peken enda eme Petrus, Jakub ras Johanes. IsuruhNa pe teluna erjaga ras ertoto gelah ula ndabuh ku bas percuban. Jesus lawes si sada terbagasen ibas Peken enda guna ertoto. Janah ajar-ajarNa pe isuruhNa guna erjaga-jaga ras ertoto. Telu kali isuruh Jesus ajar-ajarNa guna erjaga-jaga ras ertoto teridah maka telu kalina ajar-ajarNa tetap tertunduh. La ia ngasup erjaga-jaga ras ertoto justru ibas Guruna sangana ibas perbeben si mesangat.

Kejadin enda ngatakenca maka ertoto labo mesunah. Ertoto lit rusur si ngabati kita. Bagi ajar-ajar lit singabati ia ibas ertoto bage pe kita. Banci latihsa siakap erdahin lanai ngasup ertoto. Banci ka la siaturken waktuta guna ertoto. Sanga si inget, janah siakap perlu ngenca kita ertoto. Banci perban sibukna la siakap lit kesempatenta guna ertoto. Sabat siakap ertoto e perban lalana sura-sura si man ayaken si itawarken doni enda. Padahal adi ertoto kita man Dibata i bere Tuhan gegeh man banta, seh maka lebih asa kita ngasup ngukurisa banci terdahiken kita. Erdandanken sie maka uga latihna siakap erdahin, uga sibukna pe kita si litken ras siaturken waktuta guna ertoto. Si inget lit sada ungkapen nina:” Anda meraih lebih banyak satu jam bersama Tuhan, daripada seumur hidup tanpa Dia.”

TEMA UMUM :

“BEGIKEN MIN PERTOTONKU” (Masmur 102:2)

      Renungen    :   

Perbahanen Rasul-Rasul 10:1-8 (Ertoto Ope Renungen)

       Tema            :   

“Jabu Si Ertoto”

Bujur sikataken man Dibata erkiteken perkuah ras lias ateNa enggo iatankenNa kita bengket kubas Pekan Doa GBKP 2018 enda. Kenca Tuhan Jesus nangkih ku Surga ras nimai janji Tuhan Jesus nusurna Kesah Si Badia enda me si jadi palas bas kita ngelakoken Pekan Doa ibas GBKP. Kita pe menaken wari/berngi enda erban pertoton tep-tep wari seh Wari Raya Pentakosta eme nusurna Kesah Si Badia. Pertoton enda me ulu gegehta guna ndalanken kerina padan Dibata. Labo kita banci ndalanken kerina pedah Dibata bas geluh enda adi la kin kita nggeluh ibas pertoton. Pertoton e me gegehta ibas erbahan singena ate Dibata bas kegeluhenta.

Tema umum Pekan Doa GBKP 2018 eme : “Begiken Min Pertotonku” (Msm 102:2). Arah tema umum enda ibabai kita gelah tetap tek maka kai si itotoken kita man Dibata ibegikenNa nge. Ula pernah kita ragu kerna kuasa gegeh toto bas kegeluhen kinitekenta maka ibas IA ngenca lit tetap serpang pulah si iberekenNa man anak-anakNa. Tema si jadi renungenta ibas wari/berngi enda eme “Jabu Si Ertoto”. Arah teks Pustaka Si Badia (Perb 10:1-8) banci kita erlajar arah jabu Kornelius maka jabu eme persadan (“Komunitas doa”) bage pe banci kita ngusih kai si enggo ilakoken Kornelius bas jabuna.

Kornelius eme sekalak komandan bas pasukan tentara Romawi si igelari “Pasukan Itali”. Ia kalak si tutus ibas agama bage pe ia ras isi jabuna nembah man Dibata. Arah biak si icidahken Kornelius rikutken bahan renungenta enda maka teridah uga Kornelius nehken tanggungjababna nandangi jabu ija ia sebage kepala keluarga guna tetap mabai jabuna erkemalangen man Dibata bagepe kepate nandangi kalak si deban. Emaka arah pengenehenen (ayat 3) si idahna maka pertotonna enggo ibegiken Dibata bage pe enggo idahna kai si enggo ilakoken Kornelius nandangi kalak musil janah nggo iingetna Kornelius (ayat 4).

Arah bahan renungenta ibas wari/berngi enda ras-ras kita kerina bas jabunta guna tetap ngusih kai si enggo ilakoken Kornelius bas jabuna. Itengah-tengah kemajun jamanta, Kata Dibata siorati kita enda mereken persinget man banta guna tetap njadiken jabunta sekalak-sekalak tetap erkemalangen man Dibata, tetap la erleja-leja guna nehken pertotonta man baNa bagepe tetap kepate nandangi perbeben sinihadapi temanta.

PEKAN PENATALAYANEN GBKP WARI V

KAMIS 25 JANUARI 2018

Invocatio   : Sabab merangap nandangi duit eme sumbul kerina kejahaten.Enggo lit piga-piga kalak simerangap nandangi duit lanai tetap ibas kiniteken janah gulut ukurna ibahan erbage-bage kecedan ate”(1 Timotius 6:10)

Ogen               : Amos 5 : 12 – 13

Khotbah           : Lukas 8 : 1 – 3

Tema               : “Duit:Dampar Teologi ras Politik”

1. Pengertin Duit/Uang menurut KBBI : alat tukar atau standard pengukur nilai(kesatuan hitungan) yang sah, dikeluarkan oleh pemerintah suatu negara berupa kertas, emas, perak atau logam lain yang dicetak dengan bentuk gambar tertentu.

”Uang bukanlah segala-galanya, akan tetapi Ingat, Segala-galanya menggunakan Uang” .

2. Piga-piga wari silewat ibas media sosial lit vidio sienggo jadi “viral” eme sekalak calon gubernur mbagi-mbagiken duit i salah sada gereja. Teridah ibas vidio e “Mr X” mabagi-mbagiken duit tukaren Rp.50.000.-Kejadian enda mbar jadi soroten, mbue komentar lit sinalahken Pandita, lit ka sinalahken Majelis bahkan lit ka sinalahken Moderamen GBKP. Gereja harus bersuara ibas kejadin enda.

Pendukung “Mr X” enggo mengklarivikasi masalah enda bahwa kejadian enda labo lit hubungenna ras kampanye janah mbagiken duit man anak-anak ibas perayaan-perayan merupaken tradisi sirusur ilakoken.

I akap kami mbagiken duit labo salah tapi ibas mbagiken duit lit “umputenna”, sabab “Mr X” ibas persiapen menjadi Calon Gubernur enda me sijadi “Money Politik” janah kejadian enda “iviralaken ibas media sosial enda pe igelari “Politik”.

3. Dampak/keberadaan duit memang luar biasa, la hanya ibas ndaramisa tapi pe ibas makekenca banci manusia erdosa. Duit; “Adi lalit muit-uit, tapi adi lalit jadi mekuit” .Lit ungkapen nina Duit eme “Kapias Liang Barat, Merim la erbau, empat bagin perkenana”’ AYO reh siangna, MATA reh terangna, CUPING reh erpemegina ras ODAK reh nahangna.

4. Arah bagin-bagin kata Dibata(Invocatio,Ogen ras Khotbah) berngi sipelimaken enda isingetken man banta kerna kuga ndarami/ndatken ras makeken duit ibas kegeluhen siteptepwari;

• Ibas ndaramisa man jagan gelah kita ola merangap sierbahanca lanai kita ibas kiniteken janah gulut ukurta(Invocatio)
• Ibas kita ndaramisa man jagan gelah ula kita “nindas kalak bujur” bagepe ola kita “ngaloken sisip”.(Ogen)
• Ibas kita mekekenca , sipakekelah guna simehuli, guna mendukung dahin keselamaten.(Kotbah).

5. Ibas bagin Khotbah enda isingetken piga-piga diberu sienggo ipepalem Yesus ibas erbage-bage pinakit nari ras kuasa-kuasa setan nari mereken erta-ertana guna napati dahin pelayanen Yesus ras ajar-jarNa.

Pemere enda labo lit unsur “politik” sabab labo lit arapen sideban umpamana gelah Yesus ngangkatken derajat/harga diri diberu-diberu, entah pe gelah Yesus “tutup mulut” nandangi latar belakang diberu-diberu enda.

Pemere enda eme Persembahen guna dahin berita simeriah.

6. Diberu-diberu enda nampati Yesus ras ajar-ajarNa alu erta-ertana(Bhs.Ind.:”Perempuan-perempuan ini melayani rombongan dengan kekayaan mereka”). Kata “erta-ertana”/”kekayaan” labo ibas erta kalak enda kalak bayak tapi lebih tepat iterjemahken:”milik mereka” atau “harta mereka”.

Ibas kita mere, ibas kita nehken Persembahen silit ibas kita nge sipindo Tuhan, asa gegeh kengasupen silit ibas kita janah kai sibereken erpalasken kiniteken mbelin kal gunana ibas dahin keselamaten bagepe mbelin kal gunana man banta, maka sitading ibas kita e erkiteken pasu-pasu Tuhan cukup ras jadi keriahen man banta.

Pdt.Iswan Ginting Manik.