Invocatio : Masmur 34:4

Ogen : Markus 16:14-18

Kotbah : Masmur 96:1-3,10-13

Tema : Erberita Si Meriah Arah Tinepa

 

1.Kata Perlebe

Erberita si meriah e me pendilo sisekaligus risiken tanggung jabab kalak sierkiniteken man Yesus Kristus. Erberita simeriah labo ngenca i lakoken man manusia saja, melainken pe man kerina tinepa Dibata secara umum. Adi siperdiateken rikutken pengajaren Kristiani maka Dibata mpetandaken diri-Na kubas dua bentuk, e me: pernyataan secara umum (arah alam semesta ras tinepa silit) bagepe pernyataan khusus arah arah Pustaka siBadia si ipetandaken arah Yesus Kristus.[1]Adi siperdiateken kubas perentah Dibata man manusia, maka manusia ibereken perentah lako njagai ras ngkuasai doni enda. Tentu perentah enda merupaken kekuasaan sisifatna koperatif, e me bekerjasama alu proses-proses alami sila encedai ekosistem ras relasi sada ras sidebanna segelah pemeliharaan sienggo icidahken manusia banci berkesinambungen. Justeru siterjadi manusia memaknai kata njagai ras ngusahai i salah artiken merusak ras menggerus tinepa alu tujun keserakahan ras kesombongen, sierbanca lingkungen jadi musuh man manusia. Hal enda i benaken kenca manusia e meteh dirina i ciptaken manjang-anjang siertina terbuka. Enda kerina erkiteken dosa. Keterbukaan enda kange simabai manusia nggeluh alu rate-ate sierbanca tercipta sikap individualis singukurken diri ras kepentingenna saja aminnape encedai relasi silit, baik relasi ras manusia bagepe tinepa sidebanna.[2]

GBKP e me salah sada gereja i tengah-tengah doni enda singejapken pentingna njagai tinepa (relasi simehuli antara Dibata, manusia ras tinepa sideban). Hal enda teridah arah pokok-pokok pengakuan iman GBKP (konfesi GBKP) BAB III kerna Ciptaan sitertuang kubas empat butir e me: 1).Ciptaan Allah, yaitu alam semesta: langit dan bumi dan segala isinya, baik yang kelihatan maupun yang tidak kelihatan. Segenap ciptaan itu sungguh amat baik dan kewibawaan Allah hadir dari permulaan hingga akhir dalam memerintah, memelihara dan menuntun segenap ciptaanNya dalam kasih setia dan keadilan. 2).Ciptaan Allah merupakan satu kesatuan yang utuh, yang dipercayakan kepada manusia yang adalah mitra Allah untuk menguasai: mengusahai, memelihara dan mengelola dalam menjaga ciptaan. 3).Proses penciptaan oleh Allah tidak berhenti: Allah terus menerus membaharui ciptaan, baik melalui peristiwa-peristiwa alam (bencana-bencana). 4).Ciptaan tidak boleh menggantikan posisi Allah: tidak boleh diperillah, disembah dan mendominasi manusia.[3]

Keprihatinan GBKP sendiri menurut hemat kami turah erkiteken fakta genduari maka tinepa enggo semakin krisis raspe ceda. Hal enda banci saja iakibatken sikap kerangapen I bas manusia sendiri. Erkiteken semakin punahna ras cedana alam lingkungen bagepe mahluk hidup siitepa Dibata e. I bas pemenan Pekan penatalayanen GBKP 2022 enda niakap penting lit percakapen silebih mbages. Hal enda iakap memang cukup krusial raspe sasaren program ras pelayanen GBKP tahun 2022 enda, GBKP justru muat tema acuan program ras pelayanenna ku bas, “ Kreatif Merawat lingkungan.” Studi lingkungen hidup e me salah sada perkembangen koparatif ras memerluken aksi kepedulian bersama. Hal enda me teridah arah litna piga-piga istilah si jumpai kita ibas lingkungen sijadi sasaren program ras pelayanen 2022 misalna, ekologi, habitat, konservasi, polusi ras sidebanna.[4] I bas Pekan penatalayanen GBKP 2022 enda I babai me kita tole ngukuri ras sekaligus merespon uga sikapta selaku warga GBKP I bas menyikapi persoalen-persoalen lingkungen erpalasken perenungen simbages I bas pe Masmur pasal 96:1-3,10-13.

2.Isi

Latarbelakang nats ras penjabaren Masmur 96:1-3,10-13

Masmur enda e me bagin I bas ende-enden siipeseh kubas tan Asaf ras senina-seninana lako iendeken (bnd. 1 Taw.16:7). Masmur enda i suratken Daud lako arak-araken peti perpadanen ku kota Daud. I bas ngendeken ende-enden Masmur enda, pusuhta Ibabai kubas sada situasi kekuasan ras kemulian Dibata.

Pemasmur ijenda ngajuk perpulungen lako ngendeken ende-enden simbaru (ayat 1). Ende-enden simbaru i kawitken ras peperangen siimenangken Dibata. Keselamaten sienggo ilakoken Dibata meliputi keselamatan sienggo ilakoken ibas masa silepas (ayat2,3) janah genduari, pemasmur ndilo perpulungen-Na lako meritaken kemulian Tuhan kukrina bangsa i doni enda. Perpulungen-Na jadi saksi kemulian-Na, ras e teridah arah kebijaken ras keputusen politis bangsa-bangsa sinuduhken maka lanai hukum doni enda jadi standar hukum sijadi acuan menghakimi, melainken kebenaren-Na sijadi acuan (ayat10). Perubahen acuan enda me, simabai pemulihen sisifatna menyeluruh termasuk alam semesta (ayat11,12).Tolak ukur sijadi acuan sinimaksudken eme kerna perjanjin keleng ate simabai keselamaten man krina tinepa. Perjanjian e rehna I bas inisiatif Dibata nari arah Jesus Kristus.[5].

Kemulian Dibata iandingken bagi matawari sibergerak secara perlahan membersihken langit sigelap. Hal enda nuriken bagi matawari maba pencerahen ras perubahen suasana, bageme halna kemulian Tuhan. Paksa terang enda reh nuduhken maka kejahaten i doni teridah ras mbungkar (ayat 13). Bageme halna penghakimen Tuhan siadil siturut ras kemulian-Na. Penghakiman Tuhan siadil, teridah arah penghakimen man kalak siersalah ras latek. Kemulian Tuhan siituriken pe masmur e me bencana man kalak singelakoken kejahaten, rasa rah sebalikna man kalak sibenar penghakimen e mabai keadilen. Em sababna maka kita iajuk lako:

• Meritaken keselamaten arah tinepa-Na ras man kerina tinepa Dibata.
• Meritaken kemulian Dibata arah kuasa ras kinimbisanNa selaku penguasa kerina tinepaNa.
• Meritaken kerna Tuhan me raja singadili kerina alu kinibujuren.

Sendalanen ras ogen, maka kerina kita ertanggungjabab lako ersaksi dingen erberita simeriah. “laweslahlah siari kerina doni enda, jenari beritakenlah berita simeriah man kerina manusia”. Kata laweslah.., risiken perentah Jesus Kristus lako meritaken berita simeriah, ras e merupaken sada tanggungjabab man kerina kalak sitek.[6] Bagepe I bas invocation singajuk kita meritaken kemuliaNa. Baik khotbah, ogen ras invocation mabai kita kubas sada benang merah, maka kita ertanggungjabab ersaksi, erberita simeriah kukrina jelma bagepe ku krina tinepa Dibata alu njagai,mpekena-kena dingen makeken krina silit guna kemulianNa.

3.Pengkenaina.

I bas pemenaan pekan penatalayanen GBKP 2022 enda, itaruhken me kita kubas sada tema: Erberita Si meriah arah tinepa”ras tema enda sendalanen ras tema tahunen pelayanen GBKP 2022 eme: “Kreatif merawat lingkungan.”Tentu tema Pekan penatalayanen GBKP 2022 wari I enda mereken pengelayasi kerna pentingna njagai ras mpekena-kena doni enda. Doni enda e me rumahta, inganta ras-ras ,ras inganta mpermuliaken gelarNa. Selaku warga GBKP kita me aron Dibata siipakeNa guna erberita nandangi kerina tinepa, maka keselamaten nggo reh man banta. Pustaka SiBadia menggambarken maka kiniersadaan manusia ras tinepa sidebanna sangatlah erat. Adi sigargari mulihken kubas sejarah penciptaan manusia, Tuhan njadiken manusia arah debu taneh (Kej.2:7).

Manusia ijadiken arah taneh (Kej.2:7;3:19,23), ia arus nggeluh arah taneh (kej.3:23)) ras mulihken ka kutaneh (kej.3:19;Mas.90:3). Enda membuktiken maka manusia ras tinepa (lingkungen) nggeluh saling bergantung, em sababna maka adi manusia ncedai alam maka secara otomatis iape encedai dirina sendiri. Menurut Robert P Borrong, akhir-akhir enda perhatian masyarakat lako njagai lingkungen nggo semakin meningkat erkiteken doni enda paksa sakit ras ceda.[7] Sendalanen ras kai siikataken Robert P Borrong adi sinenka kubas Kejadin 2:15, justru tugas manusia ibas erberita simeriah arus ilakoken secara otaomatis. Litpe kata ngusahai (mengelola) arah Bahasa Ibrani, abudah, siseri ertina ras ibadah ntah mengabdi. Alu bage banci siertiken maka manusia selaku gambar Dibata arus mpergunaken alam enda alu mehuli selaku ibadah ras pengabdianna man Dibata. Jadi kesadaren erberita arah tinepa, memang bagin tanggungjababta selaku manusia.

Faktor kai saja sierbanca manusia lanai erberita simeriah arah tinepaNa.

• Erteremna manusia mpeturah kemusilen

Masalah lingkungan hidup la banci isirangken ras masalah kependudukan (sosial). Pertumbuhen si lanai terkendali, penyebaren silamerata, kemiskinen, pengangguren, kerina pasti membebani lingkungan hidup. Penduduk siterlalu padat erbanca tiap manusia menggunakan persediaan silit i doni bagi lau, taneh, bahan bakar, logam, bahan pangan ras duit pada akhirna erbanca kerina sumber daya alam kedungenna krisis.[8]

• Pencemaran Lingkungen

Polusi ntahpe pencemaran lingkungen e me sada proses ija zat energi, ntahpe komponen sideban turah iakibatken kegiaten manusia sierbanca kualitas lingkungan turun sampai ku tingkat tertentu sierbanca lanai berfugnsi nari sesuai ras fungsina.[9]

- Perkembangan Teknologi ras Industri

Hampir kerina negara, ngelakoken pembangunan industri. Hal enda merupaken bagin sipenting lako meningkatken proses produksi barang ras jasa. Alu litna pemanfaaten teknologi ras ilmu pengetahuan arah industri, maka manusia banci memanfaatken sumber daya alam secara maksimal tapi i pihak sideban situasi enda mabai konsekuensi perubahen man lingkungen alam, ija tanpa isadari manusia megati ngelakoken penggunaan lahan secara berlebihen alu erbahan pencemaren iberbagai tempat. Kekuatan-kekuatan siimiliki teknologi cenderung ekspansif ras eksploitatif. I bas sada sisi teknologi banci memicu manusia mempercepat pencapaian-pencapaian sinisurakenna i bas pemenuhen kebutuhan nggeluh, tapi i bas waktu si bersamaan teknologi banci mempercepat terjadina kerusakan ras pengurasan sumber daya lingkungan (natura resources). Keadaan enda mempercepat proses terjadina krisis lingkungan/degradasi kualitas lingkungen.[10]

Kegagalen manusia lako ndalanken tanggungjababna, njagai ras ngusahai krina tinepa bersumber kubas sikap kerangapen manusia e sendiri. Hal enda terjadi erkiteken manusia secara khusus “ ada keinginan” I bas dirina jadi seri ras Dibata. Erkiteken sura-surana ia ngelanggar pedah dibata (Kej.3:5-6). Tindaken endame sierbanca maba dampak siencedai relasi manusia ras Dibata ras sesamana bagepe ras tinepa sideban. Akar perbahanen manusia siserakah ras mengeploitasi tinepa sideban, erkiteken manusia i bayangi kebiaren kerna wari sipepagi. Hal enda me simendorong manusia semakin serakah ras meterialistik. Secara teologis banci sisimpulken maka akar kecedaan lingkungen enda terletak kubas sikap kerangapen (rakus) manusia. Sikap kebiaren manusia enda jadi erkiteken lapatuh man Dibata. Amin bage Dibata tetap erkeleng ate man TinepaNa termasuk manusia. Dibata menahan diriNa lako mereken ruang man tinepaNa gelah banci njumpai diriNa mulihken ras bertumbuh selaku gambaren Dibata. Amin bagepe , dibata labo sinik ija manusia I bas kebebasenna ngelakoken hal-hal siencedai relasi Dibata ras manusia bagepe tinepa sideban. Penyelamaten manusia ras tinepaNa teridah arah Kristus siberdimensi ekologis ras kosmis. Sikap ija Dibata mengosongken diriNa merupaken bentuk konkrit berita simeriah man manusia ras tinepaNa.[11]

Alu bage siidah uga kekelengen Dibata man tinepaNa (kosmos) siteridah Jesus Kristus e me anakNa sitonggal sireh kudoni enda (Joh.3:16). Tuhan Jesus Kristus i gelari kata Dibata (logos), siberinkarnasi jadi manusia. Hal enda nuduhke maka Tuhan Jesus nggo mpekena hubungen anatara Dibata ras manusia bagepe tinepa sideban. Kai siibayangken padan sindekah kerbna pendamaian man krina isi doni ras krina tinepa nggo terdungi ibas diri Jesus Kristus, em sebabna maka relasi simbaru Antara manusia ras tinepa sideban sedekah enda relasi dominio (ngkuasai) genduari jadi relasi comunio (persadaan). Mari erberita si meriah arah tinepa, segelah teridah maka perlu pemahamen ras penyadaren: Krisis ekologi merupaken ancamen doni enda. Gereja idilo menyuaraken suara nabiahna I bas mengatasi krisis enda, baik arah pengajaren, khotbah bagepe tindaken konkrit. Sibanci teridah arah keikutsertaan gereja, iharapken kita terutama warga Gereja sadar kerna pentingna hubungen alam ras dirina sendiri. Krisis ekologi la banci teratasi secara otomatis, sabab membutuhken kesadaran ras tanggungjabab seluruh pihak. Kita arus membudayaken hemat energi sue ras kebutuhen saja, alu bage energi ntah sumber daya alam akan terpelihara. Manusia arus mengikis sikap egoisme ras sikap konsumeristis, erkiteken doni enda hanya cukup menyediakan kebutuhan semua orang namun tidak cukup menyediakan untuk ketamakan manusia. Salah sada aksinta uga kita encidahken pentingna membudayaken bersih, membuang sampah I bas inganna ras menghemat energy I bas pemakaian listrik rsd. selamat pekan penatalayanen GBKP wari I.

                                                                        Pdt.Walder M Ginting,M.Th - GBKP Karawang (085297253157)

 

[1] Verkuyl.J, Aku Percaya, Jakarta,BPK-GM,2001,8-13.

[2] Eka Darmaputera, Iman dan tantangan Zaman, Jakarta,BPK-GM,2012,49.

[3] Moderamen GBKP, Pokok-pokok Pengakuan Iman GBKP, Moderamen,Kabanjahe,2015,10

[4] Jhon Stoot,Isu-isu Global menantang kepemimpinan Kristiani,YKBK/OMF,Jakarta,146

[5] Harun Hadiwijono, Iman Kristen,Jakarta,BPK-GM,262.

[6] LAI, Alkitab Penuntun, Gandum Mas, 2015

[7] Robert P Borrong, Etika Lingkungan Hidup dari Perspektif Kristen dalam Jurnal Pelita Zaman, Vol.13 no.1 (Bandung: yayasan Pengembangan pelayanan Kristen Pelita,1998),8.

[8] Andreas A. Yewangoe, Tidak Ada Ghetto Gereja di Dalam Dunia, Jakarta: BPK Gunung Mulia, 2011, 106

[9] Otto Soemarwoto, Permasalahan Lingkungan Hidup, (Jakarta:Binacipta, 1997), 260

[10] J.E. Loveloc, Bumi yang Hidup, Jakarta: Yayasan Obor Indonesia, 1995, 7

[11] Ebenhaizer I.Nuban Timo, Allah menahan Diri, tetapi Pantang berdiam Diri, Jakarta,BPK-GM,2015,154-155.

PEKAN PENATALAYANAN WARI KE-7                                                                               SABTU, 25 JANUARI 2020

INVOCATIO : Dage lit telu si tetap arus idalanken e me: erkiniteken man Tuhan, erpengarapen man Dibata, erkeleng ate man kalak sideban, janah si pentingna ibas sitelu e, e me engkelengi kalak sideban ( 1 Kor 13 : 13)

OGEN           : Mazmur 18 : 30-36

KHOTBAH     : Epesus 4 : 13 – 16

TEMA          : SEH KU TINGKAT KEDEWASAAN KRISTUS

Kata Perlebe

Visi GBKP “Jadi aron Dibata maba pasu-pasu (menjadi kawan sekerja Allah membawa rahmat), Jadi pasu-pasu salah sada syaratna eme buah kedewasaan. Adi ibas ilmu tumbuh-tumbuhen, sinuan-sinuan si enggo dewasa nge banci erbunga ras erbuah. Buah e me si banci langsung inanami kalak.

Ibas Pekan Penatalayanenta wari terakhir enda ibabai kita kubas perjuangen “Seh ku Tingkat Kedewasaan Krietus”, sekaligus enda me tema besar Pekan Penatalayanenta Ibas tahun 2020 enda. Ipake kami istileh “perjuangen” sebab ije lit proses si harus idalani gelah dewasa, pengalamen si pagit ras is entebu, si bagi ukur entah si la bagi ukur, harus idalani alu sada kiniteken kerina maba kiniulin (Rm 8:28, Yer. 29:11, Peng. 3:11 ), alu bage kerina perpulungen la kelsehen, putus asa, pesimis entah jadi pecundang ras rangap, si lit eme meriah katawari pe (I Tes.5:16), ngataken bujur ibas i kugapana pe (1 Tes,5:18).

Dewasa ijenda labo ngerana soal umur, tapi soal perukuren, perngerana ras perbahanen. Sebab melala kalak si enggo metua tapi perukuren, pngerana ras perbahanena seri ras danak-danak, sebalikna lit ka nge anak-anak tapi perukurenna, pengerana ras pengerana enggo dewasa. Kata “dewasa” ijenda banci si kunci alu kata “positif (mehuli), ertina kalak dewasa eme “rukur mehuli Positif), perbahanena mehuli (positif) ras rananna pe mehuli (positif).

Si jadi persoalen eme mehuli e menurut ise ? sebab kiniulin doni enda pe nisbi, subyektif, mehuli akapndu langa tentu mehuli kuakap, ras sebalikna mehuli kuakap langa tentu mehuli akapndu, erkiteken sie maka terjebak kita kubas sada situasi saling “menghakimi” siah kurang dewasa, sie kurang dewasa, erpengakap maka kita si dewasana, tapi adi sungkun ka kalak si deban kita ka si ladewasana kel...

Sada ngenca standart kedewasaan eme “Kristus”, em si isaksiken Paulus man perpulungen Epesus, Janah e ka me pe ipeseh man banta, gelah kita seh k tingkat kedewasaan Kristus.

Niksiki Ayat Alitab

Epesus 4, enda ngerana soal “kiniersadan kula”, tentu hal sienda ilatar belakangi litna “kinierbagen” ibas perpulungen. “Kinierbagen” e megati isalahgunaken, labo jadi nali pengiket persadan tapi justru jadi tembok si nirang-nirangi perpulungen. Kelebihen ibas sada ras sidebanna lanai jadi pasu-pasu tapi enggo jadi palu-palu.

Erkiteken sie maka Paulus nuriken man perpulungen e, gelah “dewasa” min makeken ras menyikapi kelebihen si lit ibas kita bage pe kelebihen si lit ibas kalak sideban. Salaah sada caraa menyikapi sie kerina eme; meteruk ukur, lemah lembut, saber, ola pergelut, kerina epalasna eme “kekelengen”, nggeluh ibas perdamen. Harmonis ras sinergi sue ras kulanta si melala ring-ring enda.

Perbedaan si bereken Tuhan labo gelah “kita saling engkarat ras ndendeh” tapi gelah saling mengisi ras melengkapi. Kuan-kuanen 27:17 “Desken waja mpetelam waja, bage pe manusia erlajar sapih-sapih ia” erkiteken sie maka ibereken Dibata pemere-pemere si pelain-lain, lit jadi rasul, si mpermakani perpulungen ras guru-guru. Tujunna eme gelah sikap majekken kula Kristus.

Bahan renungenta ay.13-16, mabai kita rukur positif (dewasa) ibas menyikapi perbedan, sebab tujunna e me gelah kita ersada, uga maka banci kita ersada ?

Ay. 13. Sada Kiniteken Ras Penandai Kerna anak Dibata

Enggo si lewati wari natal, maka enggo sieteh ise kin Yesus e, tubuh ibas karang asuhen, IA jadi jelma labo saja gelah banci kita ndeher, jadi teman ras kita tapi terdauhen eme “gelah sieteh uga kin harusna kita nggeluh, enggo ibahanna sada “contoh/si man ikuten”, Adi bas sekolah mbarenda megati kel ikuanken kalak si motuna kel eme “encontoh pe salah denga”.

Adi enggo ersada kiniteken ras penandaita kerna Kristus tentu kerina kita ersura-sura bagi Kristus sebagai standart kegeluhen kalak Kristen (bd. Pilipi 2:6-8) ertina kegeluhen-Na iiket ibas sada kata “jadi pasu-pasu aminna pe ngenanami kiniseran”. Adi nita kita pengikut Kristus la banci lang maka pola kegeluhenta harus bagi pola kegeluhen Kristus, adi lang tuntu labo banci ikataken kita enggo “dewasa”, aminna pe kita enggo jadi Pendeta entah Emeritus.

Dewasa è tetap mehuli (positif) ibas kerina keadaan, la nggit ndabuh kubas dosa erkiteken kalak erdosa. Tetap rukur mehuli ras ngelakoken si mehuli (bd. Yusuf man senina-seninana Kej. 50:19-21).

Ay. 14, Terombang-ambing dingen ijole-joleken angin pengajaren penipu

Salah sada ciri kalak dewasa, punya prinsip. Kai si itekina ras kai si akapna payo jadi sada si permanen ibas ia, alu bage lanai mesunah ipengaruhi. La bagi anak-anak si banci “iiming-imingi alu janji-janji istilah si gundari nina PHP, bereken janji si menggiurken mis kin akapna tuhu, tempa enggo ialokenna, erkiteken si emaka mis kel berubah prinsipna. Kalak si dewasa ibas kiniteken harus menguji kerina pengajaren alu pendahin kersah si badia (Bd. 1 Yoh.4:1 “ujilah kerina kesah, sebab enggo melala nabi-nabi perguak). Kalak si dewasa lanai man nakan dak-dak tapi nakan keras, GBKP enggo 130 tahun, hati-hati alu istilah “jenuh, monoton” seh maka ersura-sura kita lalap ndarami si mbaru, alu lanai ngukuri e payo entah la payo (bd 2 Tim,4:3 ndarami guru-guru guna ngajari ia kerna kai akapna entabeh megikenca). Kebaktin ras megiken Kata Dibata labo seri ras nonton bioskop “menarik entah la menarik, sor entah la sor, sebab e nakan pertiendin. Megiken kata Dibata ras kebaktin seri ras “man adi enggo jamna “entabeh ras la entabeh panlah”, sebab adi kune lang banci kita lemas ras sakit. Lanai lit istilah ibas kebaktin “ise pengkhotbahna”,ise pe si khotbah adi enggo itangkuhken imani e pilihen Tuhan. Kebenaren mutlak eme “kata Dibata, labo kata pendeta, hati-hati gelah ula kita papak/sesat.

Ay,15 Nuriken Si Tuhu-Tuhu Dem Ibas Keleng Ate

Salah sada dahin selaku kalak Kristen eme “ngajari kalak kerna kerina si iperintahken Yesus (bd.Mat. 28:20). 130 tahun gerejanta enggo seharusna kita mandiri ibas Teologi ras SDM, emaka enggo paksana kita siajar-ajaren erpalasken keleng ate. Ibas keleng ate lalit ngukuri keperlun pribadi, ibas keleng ate si mberat jadi menahang, ibas keleng ate lalit guak (sandiwara) tapi nuriken kerina situhu-tuhu, lalit dusta diantara kita, terbuka erbahan relasi pe lancar sada ras sidebanna.

Tahun pelayanenta “Meningkatkan Kemampuan Warga GBKP Dalam Pengelolaan Informasi dan Keterampilan Dalam Pengelolaan Tekhnologi Informasi”. Tentu sepakat kita maka tkhnologi eme alat si “mpesunah”, mpesunah kita mpeseha berita si payo bage pe si la payo. Tapi adi kalak si dewasa (mampu/cerdas) labo menyalahgunaken tehkologi ku hal-hal si la mehuli. Sebagai kalak si dewasa, ula kita nggit man “sampah” tekhnologi tapi kita harus memetik buah teknologi ras mbagiken buah tehknologi man kerina manusia.

Sie kerina maka banci jadi adi kita tetap ersada ras Kristus sumber kedewasaan e, IA me “takal sebagai sumber insfirasi, IA me takal sebagai pemimpin si ngaturken kerina kalak Kristen, alu bage ise pa la banci pulah ibas iketen persadan ras IA. Ibaras Kulanta enda, maka ibas takal (otak) si memerintah kerina pergeraken organ tubuhta, adi kune lit bagin kulanta enda si terlepas ( la terhubung ras otak, mis nge lanai rorat)

Aplikasi

1. Pekan Penatalayanen ilakoken bas gerejanta , mengawali kerina kegiaten pelayanen, PA, PJJ, gelah kerina kita ngawan perpulungen erngasupna “menatalayanken geluh, pemeteh, dahin, waktu, kebayaken ras kerina kinilitenta jadi kemulian man Tuhan.
2. Penatalayanen si lakoken sietiap tahun guna mpersada derap langkahta serayan ras perpulungen sue ras tahun gerejanta.
3. Kedewasan empengasup kita makeken kerina kegeluhen ras kinilitenta e jadi pasu-pasu man doni enda.
4. Kedewasan e tentu lit ibas sada proses, tapi ise si megenggeng seh ku kedungenna maka ngasup make panah si megeghna kal pe, seh maka banci ndatken keterkelinen dingen kehamaten (bd. Msm, 18:35-36)
5. Kedewasan Kristus si empengasup kita tetap lit ibas kiniteken, pengarapen dingen kekelengen si tetap (1 Kor. 13:13)

Pdt Saul Ginting

GBKP Rg Bekasi

PEKAN PENATALAYANEN GBKP

Tgl. 24 Januari 2020 (Wari pe-6 ken)

Invocatio  : “Man kalak si erpemeteh, terang kap e kerina; man kalak pentar, seh kap tangkasna” (Kuan-Kuanen 8:9)

Ogen        : Keluaren 35:30-35 (ibabai simada jabu)

Khotbah   : Roma 10:14-17

Tema      : “Meritaken Berita Si Meriah”

1. KATA PERLEBE

Kerna “erberita” labo jadi sada istilah simbaru ntah asing man banta kalak Kristen, sebab nehken berita si meriah jadi sada keharusen ras persuruhen Tuhan man banta kalak si enggo tek dingen iselamatkenNa. Matius 28:19-20, jadi sada penjemba si rusur ikataken “amanat agung” guna ndahiken dahin dingen peseh berita si meriah e man kalak latih, kote, kelsehen dingen mberat baban geluhna. Dahin meritaken berita si meriah la banci ngadi idahiken kalak si tek seh asa gedang geluhna. Janah e tugasta kerina, labo terjeng serayan Tuhan si enggo itangkuhkenNa (Pandita, Pertua, ras Diaken) tapi ikut pe kerina ngawan perpulungen si enggo nggejapken maka geluhna enggo iselamatken Tuhan arah Jesus Kristus. Meritaken kata Dibata labo hanya ibas gereja tapi pe arah kerina dampar kegeluhenta si tep-tep wari, arah kerina pendahinta, profesinta, keteladanen/jadi usihen ibas kerina orat geluhta. Nehken berita labo terjeng arah bahasa verbal tapi pe arah non-verbal ntah arah kerina gaya geluhta (perdalan, pengerana, percirem ras tawanta) kerina jadi berita si meriah man kalak sideban bagepe doni enda.

1. ISI

Keterkelinen ibas Kristus eme “Injil” (berita simeriah), tapi engkai makana enterem denga kalak si lenga ngaloken berita simeriah e adi kerina manusia ngarapken dingen metedeh nandangi barita simeriah e? Paulus mereken dua jababen kerna si enda: langa kerina kalak pernah ntah enggo megiken berita simeriah e erkiteken la lit kalak si mpesehsa (ay.14) ras la kerina kalak nggit ngaloken berita simeriah/injil (ay.16). Emaka hal si perlu kal i je eme lit kalak si nggit guna meritaken berita simeriah e.

Ibas paksa nai, sekalak perberita sijadi utusen raja, pejabat ntah penguasa nari, peseh berita sinibabana khususna berita si meriah; kerna kemenangen ibas perang nari, penangkuhen raja simbaru. Berita enda ipeseh ibas ingan-ingan sienterem: i tiga-tiga, i serpang-serpang ntah ibas gerbang kota. Berita enda banci maba keriahen ras ketenengen man rakyat simbegikenca, maka lit sada pengarapen ibas berita sinipeseh suruh-suruhen e. Bagem Paulus nuriken maka meherga kal kalak simaba berita simeriah kerna Kinirajan Surga (Injil).

Ibas bagin ayat 5-13 enggo nuriken kerna uga keselamaten e ialoken arah kiniteken man Tuhan Yesus Kristus selaku penggenepen hukum taurat. Siniperluken manusia em kap erkiniteken man baNa, janah keselamaten e berlaku man kerina manusia si tek man baNa. Persoalenna labo ibas kualitas keselamaten ntah kadar keselamaten e, tapi persoalenna em kap la lit kalak si maba berita si meriah e. Kalak banci ‘erlebuh’ man Tuhan adi enggo leben ia nandai dingen ‘tek’ man Tuhan; kalak banci erkiniteken adi enggo ‘ibegina’ kerna Dibata, janah banci ibegina kerna Ia adi lit kalak si ‘meritakenca’ berita si meriah e; meritaken berita si meriah banci terjadi adina lit si nuruhsa. Dibata ersura-sura gelah kita nggit isuruhNa guna jadi perberita si meriah e, tapi la piga si nggit berkat jadi perberita simeriah e.

Kininggitenta dingen pemilihen Dibata man banta jadi perberita harus sialoken sebagai hak istimewa ras perkuah ate simbelin si enggo ibereken Dibata man banta. Dibata banci saja nelamatken kerina manusia si enggo ipilihNaalu la melibatken manusia guna peseh berita simeriah (injil), bagi Ia enggo nelamatken Paulus (Perb. 9) ija Dibata langsung “nangkap” Paulus guna iselamatken. Tapi arah lias ateNa Tuhan tetap make kita manusia guna ndalanken proyek simbelin eme keselamaten arah nehken berita si meriah si enggo ipeseh arah Yesus Kritus man kerina manusia. Janah ibas proyek keselamaten e Dibata milih kam ras aku guna muat bagin peseh berita si meriah e.

Amin pe perberita e enggo lit janah enggo erberita, tapi tetap denga nge lit kalak si labo tek dingen la ngaloken berita si meriah e (ay.16), tapi amin bage gia tetaplah erberita sebab secara prinsip maka banci kalak reh ndahi Tuhan dingen erkiniteken man baNa eme arah megi berita si meriah e. Eme berita kerna Yesus Kristus (ay.17). Kiniteken reh arah megiken berita si meriah arah Yesus Kristus. Alu kata sideban, Tuhan me singerana man banta sekalak-sekalak terus ku pusuh perukurenta arah penampat Kesah Si Badia (1 Kor. 2:12-14; 1 Yoh. 5:6). Adi la arah penampat Kesah Si Badia, bicara si peseh gia berita e maka labo lit tading ibas pusuhna dingen labo terantusina pe alu mehuli, “masuk kuping kiri, keluar kuping kanan”. Adi terjeng rangkaian kata ntah mutiara kata sinipeseh arah kinibeluhen perberita, maka sia-sia me berita e ipeseh. Tapi arah penampat Kesah Si Badia, aminna pe si pesehsa berita e labo beluh ntah ertorosen tapi isempurnaken Kesah Tuhan e.

Ibas Ogenta Keluaren 35:30-35, eme nuriken ija bangsa Israel si enggo ndarat ibas taneh Mesir nari jenari erdalan menuju taneh si enggo ipadanken Tuhan. Jenari Dibata mereken sepuluh pedahNa guna jadi gelemen ras pedoman nggeluh i adepen Tuhan bagepe hubungen ras teman manusia. Maka ilitken me sada kemah si badia guna ingan perjumpan Tuhan ras manusia erkelangken Musa. Guna si e iperluken tukang-tukang si beluh ras ahli gelah ipajekken Kemah Si Badia ndai, tapi la cukup terjeng beluh ras ahli, sipentingna kal emekap i tahirken dingen ipebadiaken Tuhan ia ibas ndahiken dahin e janah Tuhan singajari ras mperlengkapisa. Emaka ipilih me si Besalel anak Uri, bagepe Oholiap anak Ahisamah guna majekken ras nikapken kerina keperlun ras peralaten ibas Kemah Si Badia e. Guna si e Dibata enggo mperlengkapisa sekalak-sekalak alu KesahNa, janah iberekenNa kepentaren, kengasupen ras pengertin man bana guna ndahiken dahin e.

Bagepe kerina kita sindahiken dahin Dibata selaku perberita simeriah pasti iperlengkapi dingen iajariNa ibas kita nehken dahin simbelin e, guna peseh berita keselamaten ibas Jesus Kristus. Janah sada jaminen man banta ibas Mat.28:20b “Janah ingetlah! Aku tetap kap ras kam seh ku kedungen jaman”.

• APLIKASI

John Stott sekalak pengkhotbah, penginjil ras penulis i Inggris nari pernah ngataken, “Kristus mengirim pembawa berita, orang mendengar, pendengar percaya, yang percaya berseru, yang berseru diselamatkan”.

Ibas Perb.1:8 Jesus ngataken man ajar-ajarNa, janah kata e pe seh man banta kerina selaku kalak si enggo tek man baNa pe enggo ikataken ajar-ajarNa, nina “.....janah kam me pagi naksiken kerna Aku man kalak si deban”. Kata “Kam” sinisehken Jesus enda eme nuduh kempak aku, kam bagepe kerina kalak Kristen si enggo tek man baNa. Perintah Tuhan Yesus man ajar-ajarNa guna meritaken berita si meriah ibas Mat.28:19-20 jadi sada penjemba dingen semangat man banta guna ndahiken dahin meritaken berita simeriah e. Emaka mari dage sibuat baginta ibas meritaken berita si meriah alu erbage-bage talenta si pelain-lain si enggo ibereken Dibata man banta, sipakelah e guna ndahiken dahin meritaken berita si meriah i japape kita ringan dingen tading. Sabab guna si e me kita i diloNa dingen ipilihNa. 2 Timotius 4:2 “Pembarkenlah Berita e, subuk tengteng ras la tengteng paksana terusken gelah beritaken”.

Pdt. Irwanta Brahmana

Rg GBKP Surabaya