SUPLEMEN PA MAMRE 06-12 AGUSTUS 2023, EFESUS 2:19-22

Ogen:

Efesus 2:19-22

Tema:

KELUARGA DIBATA

 

I. KATA PERLEBE

• Perpulungen sikelengi Tuhan, megati kel kita nukah erjanji dingen ernazar tapi mesera siakap nepatisa. Melala kel kalak erjanji man Tuhan, adi seh sura-surana tutus atena gereja, adi malem pinakitna reh tutusna atena nehken persembahen, adi lepas ia bas perbeben si mberat e reh kelengna atena isi jabuna. Tapi melala kel kenca seh sura-surana iakapna ban gegehna emaka tetap nge ia labo tutus ersembah man Tuhan, malem kenca pinakitna iakapna nge ban gegehna emaka tetap nge labo ia nggit muat bagin muji Tuhan, kenca lepas ia bas perbeben si mberat tetap denga nge sia-siakenna isi jabuna. Emaka lit rusur istilah ngatakenca alu kuan-kuan kacang lupa akan kulitnya.
• Secara umum memang kerina jelma ibas awal-awal kai pe seh kel ulina ras rajin, sikap, mehuli, rsd, subuk sebagai pelayan, pegawai bas kantoren entah pe selaku kemahen Tuhan. Tapi kenca enggo berjalan piga-piga tahun dekahna mulai teridah perubahen subuk soal kerajinenna, ketutusenna, kepatuhenna, kehamatenna, rsd.
• Emaka arah bahan PA Mamreta enda iajuk kita erlajar uga arusna sikapta man Tuhan selaku Mamre adi kita enggo isampati ras iselamatken Tuhan ibas kita ngalaken perbeben siihadapi kita.

II. MPEBAGESI TEKS

• Perikop enda nuriken uga Rasul Paulus nuriken kerna situasi kegeluhen perpulungen Efesus nai tuhu-tuhu menyedihken. Emaka nina Rasul Paulus, kam si labo kalak Yahudi inget uga nai kam (ay. 11). Arah ayat enda Rasul Paulus ersura-sura ngataken maka kalak e arus nginget uga nai keadaanna kerina ras uga genduari, gelah alu bage kalak Kristen si labo Yahudi banci nggeluh alu meteruk rukur ras gelah turah keleng ate ras ngasup ngataken bujur man Dibata.
• Keadaan jemaat Efesus sope lenga ngaloken Kristus eme:

1. Perpulungen Efesus mbarenda tanpa Kristus. Ertina adi perpulungen Efesus nggeluh tanpa Kristus maka kerina pasu-pasu ras pendahin Dibata arah Kristus la banci ialamina.
2. Kalak Efesus la nandai Kristus. Ertina kalak Efesus mbarenda tanpa kewarganegaraan. Perpulungen e ikataken labo warga Negara Israel. Alu kata sideban ungkapen enda encidahken maka perpulungen Efesus mbarenda labo nggeluh iteruh pemerintahen Dibata, ras kerina hukum-hukum Dibata si ngaturken perpulungenNa labo ietehna. Mbarenda perpulungen Efesus la termasuk anggota Kerajaan Dibata.
3. Perpulungen Efesus mbarenda tanpa perjanjian. Ertina Dibata la ngiket perjanjin ras ia bagi Dibata ngiket perjanjin ras bangsa Israel seh maka janji-janji Dibata nandangi umat perjanjin la berlaku man bana.
4. Perpulungen Efesus mbarenda la erpengarapen. Ertina lalit pengarapenna maka sada paksa Dibata njadiken ia jadi bangsaNa
5. Perpulungen Efesus mbarenda tanpa Dibata erkiteken bangsa e nembah man gana-gana. Perpulungen e la lit bas ia hubungen pribadi ras Dibata si nggeluh.

>Tapi nina Rasul Paulus genduari kalak si labo Yahudi e ndatken kemalemen ate, eme:

1. Nai ia ndauh ras kalak Israel si terpilih tapi erkiteken persadanna ras Kristus ia enggo ibaba rembak ras bangsa pilihen Dibata erkiteken kematen Kristus (ay.13).
2. Kristus enggo ndameken ia, alu njadiken si dua e enggo jadi sada pihak (ay. 14).
3. Alu dareh Kristus e enggo iruntuhken tembok si nirangken bangsa-bangsa e seh maka lanai ia ermusuhen. (ay.14).
4. Imasapken Dibata undang-undang agama Yahudi alu pedah-pedahNa ras aturen-aturenNa gelah bangsa si dua e ersada ras Kristus (ay. 15).
5. Erkiteken kematen Kristus e kalak si labo Yahudi lanai jadi kalak asing entah pe pertandang (ay.19).
6. Kalak si labo Yahudi enggo jadi sada warga ras anak-anak Dibata dingen enggo jadi anggota keluarga Dibata (ay. 19).

> Jadi arah bahan PA ta enda Paulus nuriken maka keleng ate Dibata e la hanya nandangi bangsa Yahudi bagi siipahami adat kalak Yahudi paksa sie. Paulus menempatken kalak non Yahudi sebage bangsa Dibata si berhak ndatken karya Kristus (ayat 13). Paulus nuriken sienda erkiteken paksa sie teremen petobat-petobat baru i perpulungen Efesus si berasal ibas etnis non Yahudi, janah kalak non Yahudi e tuhu-tuhu meteh ras menyadari maka menurut adat kalak Yahudi, keselamaten siisehken Dibata ibas Padan si Ndekah eme nandangi kalak Yahudi ngenca. Kondisi si enda me si erbahansa timbul kesombongen ibas kalak Yahudi si katawari paksa pe berusaha gelah kalak si labo Yahudi la pernah melupaken konsep keselamaten sibage.

> Paulus ngingetken masa lalu perpulungen Efesus enda tujunna gelah alu nginget masa laluna perpulungen Efesus nggejapken perubahen si enggo ilakoken Dibata janah turah kesadarenna erbahansa terbuka mata rohani kalak Efesus uga ajaibna keleng ate Tuhan e.

> Emaka nina Rasul Paulus, kalak si enggo jadi keluarga Dibata la banci lang harus lit ibas ia sifat-sifat anak-anak Dibata siisingetken ibas Efesus 4 eme:

1. Meteruk ukurna (ay. 2).
2. Lemah lembut (ay. 3)
3. Ula pergelut (ay.3).
4. Tetap nggit ersada (ay.3)
5. Ulanai erbual (ay. 25).
6. Adi merawa ula she erdosa janah ula simpan rawandu she ben wari (ay.26).
7. Ula bere kesempaten man si iblis (ay. 27).
8. Kalak si nangko gelgel nari ulanai ia nangko tapi erdahinlah ia alu mehuli (ay. 28).
9. Ula melasken sitik pe cakap si la erturi-turin (ay. 29).
10. Belaskenlah kata-kata si erguna si banci nampati kalak sideban rikutken perluna gelah kata-katandu e maba kiniulin man si megisa (ay. 30).
11. Ula ban ceda ate Kesah si Badia (ay. 30).
12. Tadingken cian ate, perampus ras pernembeh (ay. 31).
13. Ulanai kam siisak-isaken ntah pe sicikurak-cikuraken (ay. 31).
14. Ulanai kam si erelem-elem (ay. 31).
15. Melias dingen mesayanglah sapih-sapih kam (ay. 32).
16. Si alem-alemenlah bagi Dibata enggi ngalemi kami bas Kristus (ay.32).

> Arah bahan PA Mamre enda Paulus ersura-sura gelah perpulungen Efesus e nggejapken maka Dibata me si ngangkatken ia kerina jadi anak-anak Dibata seh maka ia enggo ndatken kewargaaan ibas Tuhan ras erbahansa turah pengarapenna si selama enda lanai erpengarapen. Alu bage perpulungen Efesus tetap patuh ras nembah erjimpuh man Dibata alu setia gelah malem atena nggeluh.

 III. PENGKENAINA

• Tema ta eme KELUARGA DIBATA. Ibas KBBI Keluarga ertina ibu dan bapak beserta anak-anaknya, seisi rumah, orang seisi rumah yg menjadi tanggungan, sanak saudara, kaum kerabat, satuan kekerabatan yg sangat mendasar dl masyarakat. Tema enda mereken pengertin man banta kerna seisi rumah e kerina nggeluh bagi karakter entah pe sifat Dibata.
• Tentu selaku Mamre arah bahan PA ta enda iajuk Mamre sadar maka ia eme keluarga Dibata. Alu bage Mamre harus sadar maka sifat-sifat kalak si enggo jadi keluarga Dibata arus lit ibas ia bagi kai si enggo ituriken I datas ndai. Emaka kehadiran mamre man ndehara, man anak-anak bagepe man jelma si enterem harusna mereken kedamen ras ketenengen dingen jadi usihen ibas kai pe.
• Janah Mamre sebagai keluarga Dibata harus hadir ras ngelakoken dingen menyebarkan karakter-karakter keluarga Dibata arah nggit ikut muat bagin ibas kegiaten-kegiaten gerejanta she maka isi jabu bagepe jelma si enterem tuhu-tuhu merasaken kehadiren Mamre sebagai keluarga DIbata arah pengerana ras perbahanenna ijapape ia tading.
• Emaka selalu Mamre GBKP marilah kita erusaha gelah karakter keluarga Dibata e lit min ibas kita, alu bage ndehara ras anak-anak bagepe isi jabu bagepe perpulungen kerina tuhu-tuhu ernanam she maka Mamre tetap banci jadi kesaksian ijapa pe ia ringan. Amin

Pdt. Jaya Abadi Tarigan-Runggun Bekasi