SUPLEMEN PA MAMRE TANGGAL 07-13 APRIL 2019, I SAMUEL 16:1-7

(PILPRES ras PILEG); Kelebihen Mamre I Bas Politik)
Ogen : 1 Samuel 16 : 1 – 7
Tema : Milih Pemimpin Alu Kiniteken Ras Pusuh Si Mehuli
Tujuan : Gelah Mamre
1. Meteh maka Dibata ersura-sura mpekena bangsaNa alu milih kalak si erkiniteken ras bujur.
2. Meteh maka Dibata ndilo Mamre guna ikut berperan ibas milih pemimpin si mpekena bangsanta.

 

I. Kata Penaruh
Piga-piga wari nari lanai dung 1 Minggu seh me kita ku wari si itentuken Hari H kerna PEMILU (Pemilihan Umum) bangsata. PEMILU sekali enda lain asa si enggona. PEMILU sekali enda me si pemena ibas sejarah pesta demokrasi bangsa ras negara si ilakoken secara serentak lako milih presiden ras wakilna bagepe milih pemimpin si kundul ibas lembaga legislative mulai ibas DPD, DPR RI, DPRD Provinsi, DPRD Kabupanten/ kota. Lit 5 sekaligus si man pilihenta ibas tanggal 17 April 2019 enda, ise si mewakili rakyat ibas kerina tingkatenna. PEMILU sekali enda banci ikataken pe sebage wari si menentuken kerna kegeluhen bangsa ras negara subuk jangka pendek 5 tahun si reh. Nasip ras masa depan demokrasi bangsata itentuken arah PEMILU enda. Emaka seh kal kita perluna ras pentingna lako milih pemimpinta alu kiniteken ras pusuh si mehuli. Guna mpebagesi pengangkanta kerna Kata Dibata ras temata, marilah erlajar kita.

II. Isi/ Tafsiren
Saul eme raja si pemena ibas bangsa Israel. Si eteh ras-ras maka sope lit raja, bangsa Israel ipimpin sekalak hakim. Hakim si terakhir sope ipindo bangsa Israel sekalak raja lako ngaturken kegeluhenna eme Samuel. Samuel ndalanken 3 tugas sekaligus. Ia sebage hakim, ia ka sebage nabi, janah ia pe sebage imam. La ndekah kenca Saul jadi raja minter ia la patuh ras la mehamat man Dibata. Saul ngelakoken korupsi alu muat barang rampasen man gunana padahal enggo ipedahken Dibata gelah la banci maba ras muat barang rampasen e (1 Samuel 15:9). Saul pe ngelanggar kebadian rumah pertoton ras dahin imam alu nehken persembahen tutungen si arusna ilakoken sekalak imam (1 Samuel 13:9-11). Mbue denga kesalahen ras dosa si ilakoken Saul si erbahanca ia itulak ras ipengadi Dibata jadi raja.

Ceda ate Samuel erkiteken dosa ras kesalahen Saul. Mamang ras menek ate Samuel uga maka Saul la patuh man Tuhan si erbahanca ia itulak Dibata. Pemimpin si la patuh, pemimpin si erbahan kesalahen si patal kepeken mpereh kegogon ras kecedan ate man pemipimpin si deban ras man kerina rakyat si ipimpinna.
Saul arus iganti. Lanai ia banci mimpin negeri. Emaka isuruh Dibata Samauel lawes i kutana nari eme Rama lawes ku Betlehem lako milih ras nangkuhken sekalak anak Isai guna jadi raja nggantiken Saul. Tuhan erjanji nemani, ngajari ras nampati Samuel ise si man pilihen seh maka la ia ngadapi persoalen ras la ia cilaka iban Saul. Samuel patuh man Tuhan. Idalankenna kerina kai si isuruh Tuhan man bana. Bagenda me arusna ras patutna persuruhen Tuhan ras kalak si tek nangdangi persuruhen Tuhan man bana.
Tupung enggo seh paksana milih raja/ pemimpin si man pilihen e, Samuel sempat ibabai perukurenna jine. Iidah Samuel anak Isai si pemena eme Eliap. Eliap sekalak si nggedang, mbestang ras meparas asa pengidah mata. Ibas ukurna, Samuel erpengakap maka Eliap me jelmana. Kepeken perukuren ras pertimbangen Samuel la bali ras perkuren Tuhan. Samuel ras umumna manusia ertimbang ras erbahan keputusen erkiteken arah kai si idahna, kai si teridah. Tapi Tuhan ndidah si arah bas eme pusuh ras ukurna si mehuli, pusuh si bujur (ayat 7). Bageme dage kita pe ibas milih pemimpinta, marilah si pake perukuren ras pertimbangen Tuhan. Alu bage seh sura-sura Dibata arah pemilihen si iban kita.

III. Aplikasi/ Pengkenaina
1. Bagi Samuel isuruh Dibata lawes ku Betlehem lako milih sekalak anak Isai jadi raja, bageme pe kita isuruh Tuhan lawes ku TPS inganta milih lako milih/ nyoblos pemimpinta subuk PILPRES bagepe PILEG si ilakoken alu serentak enda. Seh me paksana tepatna wari Rabu, tanggal 17 April 2019 si pilih para pemimpinta guna maba ‘kapal’ pemerentahenta guna 5 tahun si reh periode 2019-2024. Milih pemimpin bangsa ras negarata ibas kerina tingkatenna eme pendilo ras persuruhen Dibata man banta.

2. Tema: “Milih Pemimpin Alu Kiniteken ras Pusuh Si Mehuli”. Kepeken labo kita idilo ras isuruh gelah enggo milih saja. Milih labo banci meros. Arus si eteh ras si tandai alu mbages ise si man pilihenta e. Mari si pilih pemimpinta alu kiniteken ras pusuh si mehuli. Sukat-sukat milih alu kiniteken ras pusuh si mehuli eme ibas kita milih arus rukur ras ertimbang berdasarken perukuren ras pertimbangen Dibata. La terjeng arah darat ntah pe terjeng si teridah saja ngenca si erbahanca kita milih sesekalak, tapi terlebih si nehen ku bas eme ku pusuhna, perukurenna, kebiasanna, perbahanen ras pendahinna sewar-wari. Enda me si igelari track record alias rekam jejak.

3. Sope kita milih, mehuli kal adi si totoken lebe. Sungkun Tuhan si apai si man pilihen, si apai si ndeherna ras sura-suraNa. Ibas kita milih la perukurenta saja ngenca si pedomani, la pusuhta saja ngeca si persukuti. Tapi terlebih perukuren ras pusuh Tuhanta Jesus. “Perukurenndu bali min ras perukuren Kristus Jesus” (Pilipi 2:5). Perukuren ras pusuh Tuhan Jesus nggo pasti mehuli. Arah kita milih erpalasken perukuren Kristus tentu lanai salah ibas kita milih. Tentu si pilih pemimpin si payo, si mehuli ras si ngena ate Tuhan.

4. Pemimpin si la erkemalangen ras mehamat man Dibata pasti labo patuh man Tuhan ras perentahNa. Si enda me si idah ras jadi pelajarenta arah cerita kerna Saul. Pemimpin si la patuh man Tuhan ugapa pe ndabuh ku bas dosa KKN (Korupsi, Kolusi ras Nepotisme). Pemimpin si ngelakoken KKN ugapa pe erbahahanca rakyat sirulo nggeluh mesera ras ermesui ate. Gelah ola nangkih ras erkuasa pemimpin si la erkemalangen man Tuhan, tugasta eme milih pemimpin alu kiniteken ras alu pusuh si mehuli.

5. Arah PEMILU Dibata mpekena-kena bangsata ku si mehuli ras kemalemen ate. Tuhan labo secara langsung mpekena-kena kegeluhen bangsata. Tapi ipekena-kenaNa kita arah make pemimpin si mbiar ras malang man baNa. Tugasta me milih pemimpin si mbiar ras malang man Tuhan. Tugasta milih pemimpin si jadi wakilta guna mperjuangken hak-hakta ras kesejahteranta. Pemimpin si bujur la ngukurken dirina saja, kelompokna ras golongenna saja. Ia ngukuri kerinana. Sebalikna pemimpin si la bujur, la mehuli pas bagi pantun si adi nina,
“Gundera sala gundera, buluh belin kubenturi
Kutera kalak kutera, beltekku mbelin kubesuri”.
Pemimpin si mehuli ngukuri gajut ras beltek si enterem. Pemimpin si la bujur bagi nabi Eli ngukuri beltekna sisada ras beltek konco-koncona (nepotisme) saja. Nina Tuhan Jesus, “Adi kalak pentang negu kalak pentang tentuna duana ia ndabuh ku parik” (Matius 15:14). Mari dage si pilih pemimpinta erpalasken kinitekenta man Tuhanta. Amin

Pdt. Juris Tarigan, M.Th

GBKP Runggun Depok-Lenteng Agung