SUPLEMEN PA MAMRE 30 JANUARI-05 FEBRUARI 2022, LUKAS 2:41-52

Tema   : Reh Tambahna Ngena Ate Dibata ras Manusia

Ogen   : Lukas 2 :41-52

 

1. Kata Penaruh

Selaku Mamre, salah sada keteden ateta ibas geluta eme uga gelah kita ras Moriata bagepe anak-anakta  nggeluh bagi singena ate Dibata ras ngena ate manusia. Malem kal ateta natap adi anakta tambah wari tambah meteh mehuli, ilakokenna ngena ate Dibata ras ngena ate manusia. Tuhu, banci saja lit anggapen maka adi lakoken singena ate Dibata langa tentu ngena ate manusia. Tapi adi anjar-anjar siukuri situhuna sejalan nge ngena ate Dibata ras ngena ate manusia. Adi lit pe si menggap lahang, sumber masalahna bas manusiana e sendiri. Adi tuhu-tuhulah ndalanken sin gena ate Dibata, ras si menilai pe tuhu-tuhu ka kalak sitek man Dibata tentu ngasup ia ngidah maka sejalan nge sin gena ate Dibata ras singena ate manusia.

 2. Tafsiran/Isi

Hal enda banci siidah ibas ogenta. Ogenta nuriken cara geluh kiniteken kalak Jahudi. Kerina anak kalak Jahudi menaken ibas umur 12 tahun i arusken ngikuti upacara keagamaan. Ibas usia 12 tahun anak-anak iresmiken mulai memasuki lingkungen kalak dewasa bas hal erkiniteken. Jesus pe ngikuti upacara peresmian enda i Jerusalem ope Paskan gelah Jesus pe nggo banci ngikuti acara Paskah.

Ibas tradisi kalak Jahudi, ianggap lit telu guru utama nandangi anak, eme: Nande, Bapa ras Taurat.

  1. Nande eme simupus ras ertanggungjawab mpebelinsa seh umur ngadi minem.
  2. Bapa eme siertanggungjawab  nerusi mendidik anak she umur 12 tahun
  3. Taurat eme jadi guru anak kenca ia umur 12 tahun entah pe kenca ia memasuki lingkungen dewasa bas keagamaan.

Kenca masuk ku lingkungen dewasa anak e wajib nggeluh bagi siajarken Taurat, emaka anak e pe igelari anak ajaran Taurat. Alu memahami arah sudut pandang kalak Jahudi, ternyata labo hal si salah adi bas ogenta enda Jesus selaku anak Jusup ras Maria lebih taat man Taurat dibanding man nande bapana. Jesus memahami ras mpraktekken aturen keagamaan kalak Jahudi, emaka ipilihna tading i rumah pertoton guna tole erlajar ntah pe lebih tepatna ersoal jabab ras guru-guru agama (ayat 49). Ipakai kata ersoal jabab e ncidahken maka Jesus nggo mulai mpepinter ajaren ibas rumah pertoton si mungkin lit la payo.

Ibas ayat 51 icidahken Jesus maka taat nge Ia man orangtuana, alu ibegikenNa kata orangtuana. Kai siilakoken Jesus enda sekaligus ncidahken ketaatenna man pedah sepuluh, leben nge taat man Dibata maka taat man nande -bapa. Tapi taat nge baik man Dibata bagepe man orangtua.

3. Pengkenaina

Alu bage siidah uga gambaren kegeluhen jabu Jusup:

  1. Lit masa-masa ras hal-hal ija peran nande lebih utama, lit ka hal-hal ras masa-masa ija peran bapa ka lebih utama. Tentuna tetap nge idalanken alu ras-ras.
  2. Selaku orangtua berusaha memahami kai siimaksudken anak, labo mis ngukum ana kadi la kenca sue ras sura-surata.

                                                                        Pdt Pribadi S Meliala-Rg Tambun