SUPLEMEN PJJ TANGGAL 16-22 APRIL 2023, 1 KRONIKA 23:24-32

Nats : 1 Kronika 23 : 24 - 32

Tema : Aron Sierdahin Ibas Rumah Pertoton (GBP GBKP : Tim Ibadah)

Ibas umurna sienggo metua, Daud ngangkat anakna Salomo jadi raja Israel guna nggantiken ia. Ipepulungna pe kerina pemimpin-pemimpin Israel. Iaturkenna kerina pemimpin-pemimpin e guna nampati Salomo ibas ngaturken kerajaan bagepe ngaturken kegeluhen erkiniteken bangsa Israel sue ras sura-sura Dibata. Si menarik ibas kepemimpinen Daud enda eme : Daud la saja sekalak raja si mereken diri ras kegeluhenna guna kiniulin bangsana (ngaturken kerajanna alu sikap ras mehuli guna kiniulin rakyatna) tapi pe sekalak raja si ibas kepemimpinenna ersukuten man Dibata. La saja kegeluhen secara kebangsaan/ kerajaan iaturkenna alu sikap tapi ibabaina pe bangsa Israel tetap jadi bangsa si nggeluh malang man Tuhan. Hal enda teridah arah kuga belinna kemediaten Daud nandangi rumah Pertoton si ndube enggo sontar segelah i bangun mulihi [amin pe ibas kinatana labo ia si mbangunca tapi arus iakui maka Daud me pelopor ras perancang pembangunen Rumah Pertoton siilakoken anakna Salomo], bagepe kuga Daud ngaturken kerna kebaktin/ kegiaten keagamaan bangsa Israel ras singelai ibas kerina dahin-dahin ibas Rumah Pertoton Tuhan alu sikap ras mehuli.

Secara khusus ibas pasal 23 enda, awalna Daud mpeserap Suku Lewi jadi singelai ras singaturken kerina siiperluken bangsa Israel ibas kebaktin/ pernembahen man Dibata. I sensus me kerina dilaki suku Lewi si umurna 30 tahun kudas (Bil. 4 : 1 – 3) teremna 38.000 kalak, janah si enda ibagi jadi :

000 kalak ngaturken dahin ras perkakas Rumah Pertoton
000 kalak guna nikapken surat-surat penting ras nimbang perkara (Tenaga Administrasi kerna keputusen, cataten Kerajaan bagepe jadi Hakim)
000 kalak jadi pengawal (penjaga gerbang) guna njagai keamanen secara praksis bagepe spiritual (memastiken maka kalak si layak bengket guna ersembah man Dibata ngenca banci bengket ku bas ingan-ingan si badia/ ikhususken)
000 kalak muji Dibata alu sorana bagepe alu alat-alat music (Muji Dibata dingen mabai kalak guna nehken ende-enden ras ersembah alu payo)

Ibas 1 Kro. 23 : 6 Daud mbagi Kaum Lewi enda jadi piga-piga kelompok sue ras kesusurenna (Bil. 3, 4) :

Kaum Gerson (ay. 7 – 11) dahinna eme njagai ras ngerawat kulit si jadi penutup/ lapis Tabernakel
Kaum Kehat (ay. 12 – 13) dahinna njagai kebadian ras ngurus kerina peralaten Kemah Si Badia, Tabut Perpadanen, nutung simerim-merim/ meja persembahen, masu-masu jelma sinterem ibas gelar Tuhan)
Kaum Merari (ay. 21 – 23) dahinna eme ngaturken ras merancang struktur Kemah Si Badia, Pilarna, Papanna, rsd.

Ibas bahan PJJnta sekalenda, Daud ngubah ras ngaturken mulihi dahin Kaum Lewi, maka singelai ras

sierdahin ibas Rumah Pertoton eme kesusuren kalak Lewi siumurne 20 tahun kudas (ay. 24b, 27). Enda ilakoken Daud rikutken keperlun pelayanen maka kenca pantek pepagi Rumah Pertoton e, iperluken reh teremna singelai ibas Rumah Pertoton e sebab Rumah Pertoto e pepagi enggo tetap inganna i Jerusalem (lanai pindah-pindah dingen perkakasna pe enggo tetap ras tertentu inganna) [ay. 25 - 26]. Sikap kerina dahin kalak Lewi iaturken Daud : nampati kesusuren Harun ibas persembahen Rumah Pertoton, mpekena kesain ras bilik Rumah Pertoton, njagai kebadian kerina barang-barang Rumah Pertoton, nikapken persembahen pangan man Dibata bagepe persembahen si deban (ay. 29), ertoto ras muji Dibata erpagi-pagi ras karaben (ay. 30), mpersembahken persembahen tutungen tupung wari raya (ay. 31). Kerina itetapken guna banci ndahiken-dahinna ibas kerina paksa-paksa. Kai siibahan Daud enda maba kiniraturen nandangi bangsa Israel subuk ibas kegeluhen bangsa ras kerajaan bagepe ibas kegeluhen erkiniteken man Dibata. ibas jaman kepemimpinen Daud me Israel mencapai kejayaan si luar biasa.

Itengah-tengah pelayanen gerejanta pe erbage-bage dahin pelayanen enggo iaturken segelah arah pelayanen gerejanta e sikap dingen mehuli, ernanam man perpulungen bagepe nandangi kalak si deban. Gereja hadir guna mpepaler keleng ate Dibata arah pelayanenna bagepe tetap hadir maba Berita Si Meriah nandangi kegeluhen ras doni enda (baik ibas Koinonia, Marturia ras Diakonia). Secara khusus ibas Koinonia, erbage-bage kegiaten pelayanen persadan ilakoken itengah-tengah gerejanta. Erbage-bage kegiaten ibadah/ kebaktin e jadi dalanta jumpa ras Dibata bagepe jumpa ras temanta manusia. Emaka perlu kel iaturken alu mehuli ibas pelaksanaanna, alu bage ibas kebaktin/ ibadahta kita banci “menikmati perjumpanta ras Dibata”, kita banci “terbangun” secara kinitekenn (kata Dibata) bagepe secara persadan (kehidupan persekutuan sebagai keluarga berlandaskan kasih Allah). Emaka piga-piga hal si arus ras terus sibangun eme :

Adi marenda lit Kalak Lewi, genduari kita me kerina jadi singelai Tuhan itengah-tengah gereja GBKP enda. Amin pe lit iaturken piga-piga kalak si “membidangisa” sue ras telenta bagepe potensi si lit ibas kita tapi arus tetap siinget maka kerina ngenda kita “pelayan Dibata” (hamba Tuhan) si arus mengabdiken dirinta guna ngelai IA.
Erkiteken kita kerina eme suruh-suruhen Dibata, emaka kita wajib guna ndahiken baginta sekalak sekalak alu tutus ras ertanggungjawab sebagai bentuk pengabdianta man Dibata. Lit min ije kolaborasi ras sinergisitas si mehuli, si saling melengkapi sada ras sidebanna. Arus maka siinget, ibas kita erkebaktian/ beribadah e, siperlu sipermuliaken eme Dibata labo dirinta ntah talentata.
Selaku “pemimpin” singaturken kerinana (liturgis, sinaruh/ imam, Tim musik, kolektan, pengkhotbah, ermomo, multimedia, singalo-ngalo, sierkira) arus tuhu-tuhu mempersiapken dirinta alu mehuli ibas ngelai Tuhan, bagepe perpulungen arus min tuhu-tuhu pe ersikap ibas mengketi kebaktin/ ibadah e (ula meros, mekarus, ntah pe hanya terjeng formalitas ritual saja sebab e erbahanca amin pe mejingkat ngikuti kebaktin la kita bertumbuh ibas kiniteken) [Joh. 4 : 23 – 24 “……….. Allah itu Roh dan barangsiapa menyembah Dia, harus menyembahNya dalam roh dan kebenaran”]; [Matius 13 : 1 – 23, Markus 4 : 1 – 21, Lukas 8 : 4 – 15].
Perlu isingetken kami mulihi : JANGAN MEMBANGUN KEHIDUPAN TANPA MEMBANGUN HUBUNGAN YANG INTIM DENGAN TUHAN. Melala genduari jelma sibuk membangun kehidupenna secara kegeluhen (Pendidikan/ ekonomi/ pendahin/ Jabaten/ karir) tapi lupa mbangun hubungenna ras Dibata. Emaka di kune kai siniarapken la ialokenna, kai siirencakan la terlaksana em dalanna kote, kelsehen ras kecewa; bahken dikune tersehi pe e ka me dalanna bene bas kegeluhen enda (meganjang ukur ras lupa diri si mabai ku bas kehancuren).

Pdt. Elba Pranata Barus-Runggun Bandung Timur