Nats         : Kuan-Kuanen 7 : 1 - 5

Tema      : Kepentaren Jadi Teman

Kitab Kuan-Kuanen enda isina eme pedah-pedah, pertenget, persinget bage pe pengajaren kerna kuga ndalani kegeluhen si payo ras benar itengah-tengah erbage-bage godaan, cara geluh ntah pe erbage-bage situasi si terjadi ibas kegeluhen enda. Kegeluhen enda banci idalani alu payo ras benar di kune lit kepentaren ibas kita, janah kepantaren situhu-tuhu e si datken ibas Dibata nari.

Pengogenta enda erkawiten ras Pasal 6 bagepe pasal 7 : 6 – 27, eme pedah sekalak bapa nandangi anakna singuda segelah la terpengaruh ku bas pergaulen si la mehuli si mabai kecedan geluh. Secara khusus memang isingetken segelah ola erlua-lua bagepe ola tergoda nandangi rayon diberu perlua-lua si mabai ku bas kebenen. Gendekna banci sikataken maka penulis mpersingetti segelah tetap njagai kebadian kegeluhen selaku kalak sitek man Dibata. Enda sada hal si sangat penting iakap kami ibas jamanta genduari enda pe, ija melala kel genduari pergaulen si encedaken kubas kegeluhen. Kebadian lanai niakap sada hal si meherga si perlu ijaga ras iperjuangken genduari enda. Si man kemelanken e ka ianggap genduari sada prestasi ntah pe prestise, khususna ibas anak-anak muda gundari. Pergaulen ras cara nggeluh si la mehuli jadi kebanggan “si ipamerken tanpa ras malu”, sementara si tetap nggeluh ibas kebenaren ras kebadian ianggap “ketadingen jaman” ras la gaul (la ngikuti perkembangen jaman). Emaka labo ateta mamang maka menjamur kel genduari pinakit-pinakit sosial siencedaken ibas kegeluhenta, melala anak perana singuda-nguda sienggo arus “i oratken ras ipejabu” erkiteken enggo lalar perdalanna, rumah tangga pe hancur erkiteken labo ipalasi ku bas ate keleng ras kiniteken man Dibata, kejahaten pe reh buena, dingen la sitik orang tua erbebe kerna anak-anak sienggo salah pergaulen ras perdalan.

Arah bahan PJJnta sekalenda iajuk ras ipersingetti kita mulihi kerina (khususna orang tua) kuga kita ertanggungjawab nuanken kiniteken ras kata Dibata man anak-anakta segelah ia mbelin jadi kalak si malang man Tuhan. Kalak si malang man Tuhan tentu lit kepentaren ibas ia guna nulak cara nggeluh ras pergaulen si la mehuli, lit pertimbangenna si mbages erpalasken sura-sura Dibata ibas ia menyikapi hal-hal sijadi ibas kegeluhenna bagepe muat keputusen, bagepe lit daya tahan (karakter) si mehuli ras paguh ibas ngalaken erbage perbeben ras pengajuk sijahat erkiteken kinitekenna man Dibata seh maka la ia terpengaruh kubas hal-hal si la ngena ate Dibata. Arus menda kita pe terus erlajar kerna kegeluhen enda, dingen nggit tetap ersukuten man Dibata ibas kita ndalanken tanggungjawabta nandangi anak-anakta e. Alu bage anak-anakta e jadi anak-anak sitetap nggeluh ibas kepentaren, tetap ia jadi rudang-rudang si merim itengah jabunta, gereja bagepe masyarakat.

Temanta : Kepentaren Jadi Teman; teman ibas kita ndalani kerina situasi kegeluhen enda bagepe teman ibas kita ngajarken ras ndidik anak-anakta (ay. 4-5). Janah kepentaren e banci lit bas kita dingen jadi temanta dikune :

• 1 : kita tetap nginget perentah-perentah Dibata man banta. Perentah Dibata e jadi patron man banta ibas ndalani kegeluhen enda, emaka ketutusen ras kesetiannta ngoge Kata Dibata banci mpelimbarui kiniteken ras kegeluhenta. Bagepe selaku orang tua ertanggungjawab kita ibas nehken pengajaren kerna perentah Dibata man anak-anakta. Kuga banci siajarken man anakta adi kita pe kurang pemeteh ras pengertinta kerna Kata Dibata e, labo kita merincuh ngoge Pustaka pe.
• 2 : Kita tetap ngelakoken perentah/ pedah Dibata e. Kata Dibata e la banci terjeng iinget-inget ntah pe ieteh saja tapi arus idalanken sebab ndalanken Kata Dibata e jadi latihen pertendin man banta. Alu ndalanken ntah pe mem-praktekken kata Dibata em tandana kinitekenta nggeluh,janah ije ka me kita nehken usihen man anak-anakta segelah anakta epe jadi pelaku Firman ibas kegeluhenna.

Kalak sindalanken perentah Dibata mabai bana metenget (bersikap berhati-hati/ mawas diri) ibas ndalani kegeluhenna (1 Pet. 5 : 8).

• 3 : nginget lalap (Ind. “tabatkanlah semua itu pada jarimu) ertina kata Dibata e lalap jadi persinget guna ngingetken kita kerna tanggungjawabta. Kata Dibata e jadi simeherga ibas kegeluhenta si mabai kita kubas kemulian Dibata.

Suratkenlah ibas pusuhndu (Ind. : “tulislah itu pada loh hatimu”) ertina maka kata Dibata e tetap ngiani dingen nggeluh ibas pusuhta alu bage pusuh peraten ras perukurenta ikuasai sura-sura Dibata (Heber 8 : 10). Adi pusuhta ikuasai sura-sura Tuhan enggo tentu maka kerina kegeluhenta (pengerana ras perbahanennta) bagi sura-suraNa sebab pusuh eme pusat kegeluhen (Mat. 15 : 18 – 19).

 Pdt. Elba Pranata Barus-Runggun Bandung Timur

Nats  : Heber 5 : 11 - 14

Tema : Kesempaten Jadi Guru

Surat Heber enda itujuken man perpulungen kalak Kristen si sangana ngenanami kiniseran si mesangat paksa e alu tujun guna mpegegehi kinitekenna man Dibata. Perpulungen enda eme perpulungen si enggo ndekah jadi kalak Kristen, tapi kinitekenna man Dibata lenga rurat mbages (tidak bertumbuh) dingen biakna bagi danak-danak denga. Biasana kalak si la mbages kinitekenna dingen biakna bagi danak-danak si mesunah kel iombang-ambingken pengajaren si papak, la tetap ukur dingen megati mesunah ngobah ukurna erkiteken perbeben ntah si la bagi ukurna si terjadi. Ibas situasi enda me penulis surat Heber enda mpegegehi kiniteken perpulungen segelah ula talu ibas situasi perbeben ntah pe kiniseran sisangana ialamina.

Khususna ibas natsta enda isehken maka arusna perpulungen enda enggo min jadi perpulungen si dewasa ibas kinitekenna man Dibata bagepe pengangkan ras pengertinna kerna kebenaren kata Dibata; enggo min banci jadi guru man kalak sideban tapi kinatana maka perpulungen e biakna desken danak-danak denga. Melala denga ate penulis isehkenna man pepulungen tapi mesera iakapna mpesehsa man perpulungen e erkiteken :

1. Pemahamen kerna kiniteken (iman Kristen) simbages ras utuh e la banci idatken alu cepat/ instan tapi arus arah proses (hubungen si mehuli ras Dibata, kininggiten guna erlajar kerna Kata Dibata bagepe arah pengalamen geluh sitep-tep wari)
2. Perpulungen e melet ibas ngangkai, lambat ibas rukur dingen mesunah lupa kerna pengajaren e.

Tapi amin bagepe penulis surat Heber enda tetap saber ras megenggeng ibas nehken pengajaren bagepe pengertin man peperpulungen. Ertanggungjawab kel iakapna ia kerna kiniteken ras kegeluhen perpulungen Tuhan e. Isehkenna pengajaren sipayo ras benar segelah perpulungen e jadi perpulungen si dewasa ibas kiniteken man Dibata.

Bage ka me kinata kegeluhenta perpulungen Tuhan ibas paksa genduari. Enterem sienggo ndekah jadi kalak Kristen si “nina” tek man Dibata tapi pertumbuhen rohani/ kinitekenna la teridah. Mesunah monce ukurna dikune reh perbeben ntah si la bagi ukur, mesunah denga terpengaruh kubas pengajaren sipapak bagepe cara geluh si la sentudu ras peraten Dibata, pergelut, la mediate nandangi dahin-dahin kiniteken/ gereja, ndekah melayani tapi butuh denga pengakun bas manusia nari, la ertanggungjawab (hakna ngenca ingetna); e kerina me biak si medanak denga. Ije teridah maka lenga dewasa ibas kiniteken. Ula lebe arapken erbuah, uratna ras perturahna saja lenga ibas kiniteken si benar ras payo eme ibas Kristus bagepe kataNa (band. Kolose 2 : 6 – 7). Oratna kin min enggo banci jadi pengajar nandangi kalak si deban. Hal enda banci saja erkiteken kurangna ketutusennta ibas nehken pengajaren (secara gereja bagepe jabu/ keluarga) bagepe kinilanggitenta guna ngaloken pengajaren situhu-tuhu ras benar kerna Dibata. Riahen siakap rusur megiken pengajaren “sientabeh ibas cuping” asangken pengajaren si aminpe “meser” dingen la entabeh guna ibegiken tapi mabai kegeluhen man banta.

La banci sipungkiri maka Ingan si paling penting ibas membentuk kiniteken si dewasa enda eme jabu. Orang tua (si dewasa ibas kiniteken) enggo pasti lit tanggungjawabna ibas jadi guru (guru = digugu dan di tiru) nandangi anak-anak itengah jabu. Ibabaina anak-anak e erkemalangen man Dibata dingen tutus ibas kegiaten gereja, iajarken ras imamahkenna Kata Dibata e ibas kegeluhen anak, icidahkenna biak-biak ras usihen si mehuli nandangi anak-anak itengah jabu (Ul. 6 : 4 -9). Saber dingen megenggeng kita ibas nehken pengajaren man anak jabunta, janah ibabo sie kerina tetap kita mindo pengajari Kesah Si Badia. Hal enda arus jadi perhatianta ras-ras selaku orang tua ras gereja, terlebih ibas ngidah tantangen buena pengajaren-pengajaren sipapak bagepe cara-cara nggeluh si ertentangen orat nggeluh selaku kalak Kristen bagepe selaku kalak Karo. Alu bage anak-anakta e jadi anak-anak si dewasa ibas kiniteken dingen ibas paksana pepagi ia ka jadi guru/ pengajar nandangi kesusurenna.

Kuga kin perpulungen sienggo dewasa?

• Litna pengertin ras pengangkan si benar kerna Dibata ras kataNa seh maka mbages ras payo penandaina kerna Dibata siisembahna e (Ep. 4 : 13). Alu bage amin pe melala tantangen ras perbeben, kegeluhenta la mesunah iombang-ambingken pengajaren si papak (Ep. 4 : 14 - 15). Emaka kiniteken si dewasa labo terjeng tek man Dibata tapi pe pang “mempercayaken” kegeluhenna ibas tan Dibata.
• Nggeluh bas ia kerna kata Dibata. Labo terjeng pengangkan ras pemetehna kerna kata Dibata saja si mbages tapi pe ngasup ia ndalanken kata Dibata e ibas kegeluhenna. (Jakup 2 : 17 “Bagepe kerna kiniteken. Adi kiniteken labo sue rikut ras perbahanen, kiniteken sibage mate kap”). Kalak si bage enggo ngasup guna ngajar subuk arah pengerana bagepe perbahanen (usihen).
• Ngasup man nakan keras (ay. 12b). Ertina ngasup ia ngaloken kebenaren situhu-tuhu dingen ngasup ia ngalaken situasi siugapana pe sebab e kerina erbahanca ia megegeh ras paguh (1 Tim. 4 : 6 – 10).
• Ietehna apai si benar ras si salah (ay. 13) ntah pe ietehna apai si bujur apai si jahat (ay. 14). La ia mesunah terpengaruh ntah pe terkontaminasi kubas pengajaren bagepe cara nggeluh si papak.
• Ietehna kai tanggungjawab ras kewajibenna selaku kalak sierkiniteken subuk itengah jabu bagepe ibas perdatan itengah-tengah gereja.
• Lanai ia nggeluh guna dirina saja tapi enggo ngasup rukur bagepe berbagi man kalak sideban. Ngasup ngaloken kalak si deban, la ngasup nggeluh si sada (dewasa ibas kiniteken berarti reh ngasupna nggeluh ibas persadan labo reh ngasupna sirang ras kalak si deban).

Pdt. Elba Pranata Barus

GBKP Rg. Bandung Timur

PEJORE UKUR KU SI BENAR

1 Korinti 15 : 33 – 34

(Hari Anti Narkoba)

1. Piga-piga perpulungen Korinti la tek “kekeken ibas si mate nari”

1 kor. 15 ngerana kerna kekeken Kristus ibas si mate nari arah ayat 12 Banci si idah Paulus nuriken persoalen si turah I perpulungen Korinti eme piga-piga jemaat la tek nandangi berita kerna kekeken kristus ibas si mate nari, (Dage adi iberitaken kami maka Kristus enggo ipekeke Dibata i bas si mate nari, uga banci maka piga-piga i bas kam ngatakenca maka labo lit kekeken i bas si mate nari?). Emaka ibas ayat 13 – 32 iterangken Paulus argumentasi si njemba gelah perpulungen e yakin ras mengaminken kerna kekeken Kristus.

2. Engkai maka lit piga piga perpulungen si la tek kempak kekeken Kristus?

Ayat 33 nuriken maka penyangkalen/la tek nandangi kekeken Kristus e erkiteken “Pergaulen si la mehuli” adi sinen Bahasa aslina eme o`mili,a (homilia) Meaning: company, association, si ibas terjemahen Bahasa inggris: Bad company ras communications, ertina, ersada/menggabungken diri/bergaul ras kelompok/komunitas tertentu.

Kelompok/komunitas e ibas ay. 32 isengetken Paulus alu kata rubia-rubia si merawa, eme kata sindiren nandangi kelompok masyarakat si bayak. ( masrakat kaya koronti si menganut faham Hedonis, alu gaya hidup hura-hura dan berpesta pora alu semboyan ("Man minem sajalah kita, sabap pagi mate me kita/ "marilah kita makan dan minum, sebab besok kita mati".").

Piga-piga perpulungen Korinti menggabungken diri/bergaul ras kalak enda mungkin erkiteken “prestise, perlindungen ras manfaat-manfaat si deban, dungna perpulunngen e terjebak ras lanai ngasup ndarat ibas pengaruh gaya hidup ras konsep-konsep si ipahami ibas komunitas e.

Emaka Paulus ningetken “Ola kal kam papak” ibas erti hati-hati ibas pergaulen, Perpulungen arus megermet, ngenen, nandai/memperhatikan sungguh-sungguh, ija, ras ise ia bergaul, ula sempat kerina si mehuli si enggo lit ibas ia (pengajaren/kiniteken) ceda, benne, papak akibat pengaruh ibas pergaulenna sebab Realita sehari-hari menunjukkan bahwa seseorang ditentukan oleh dengan siapa dia bergaul, kata si ipakai Paulus "Pergaulen si la mehuli, ncedaken biak si mehuli."

Adi ibas kuan-kuan karo nina, adi ndeher ras kambing, bau kambing,

adi ndeher ras manuk bau manuk.

Pesan enda penting man kalak korinti ibas zamanna, apai ka ibas zamanta si gundari alu perkembangen tegnologi si erbahanca media reh buena ras reh canggihna, arah segala sisi banci mbereken pengaruh, ajaken, si ikemas alu kemasen si menarik, ras teridah mehuli ras benar tapi banci saja e menyesatken.

Tapi la ka bo e erbahanca kita jadi kalak si menutup diri, ras jadi hakim si ngataken e mehuli si deban lang, atau ibas istillah si deban kafir ras haram, Kata Dibata nuruh kita gelah jadi teman man kerina kalak, Paulus ngataken ibas 1 kor 9:20 Nandangi kalak Jahudi bagi kalak Jahudi aku guna ndatken kalak Jahudi. Bagi ia patuh man Undang-undang Musa, aku pe patuh man Undang-undang e, gelah banci ia dat aku, aminna pe aku labo i teruh Undang-undang e.

Perlu hati-hati, Paulus ngataken “gelah banci ia dat aku” ola kari justru kita si idat kalak.

Contoh, anak-anak ta ibas pergaulenna ras agama si deban, mungkin sura-surana guna narik temanna ku agamana, tapi justru kedungenna ia si nadingken kinitekenna.

Tugasta sebage Terang mengharusken kita erteman ras ise pe, adi kita menutup diri e ertina kita terang si itamaken I teruh Tumba, tapi hati-hati sebab ibas hakikatna segelap-gulita apapun satu kegelapan tidak akan pernah tahan dengan setitik cahaya terang, ola kari terangta e justru si redup ras jadi gelap. Emaka waspada ibas setiap pergaulen ras jemak enteguh 1 tes 5:21 Kai pe ujilah lebe; cikep si mehuli,

3. Nasihat Paulus man Perpulungen Korinti.

- Pejorelah ukurndu/Sadarlah kembali sebaik-baiknya

Sada sisi enda nuriken kecibal kesalahen si terjadi ibas kalak korinti enggo cukup parah, (kesalahen theologis/la tek nandangi kekeken kristus ras kesalahen praktis/pergaulen sila mehulli, kerusakan moralitas). kata eknēphō (“sadar”) biasa ipake berhubungen ras kemabukan/mabuk. Kalak korinti enggo tuhu-tuhu papak, lanai ngasup engkuasai diri bagi kalak si mabuk erkiteken inemen keras/alcohol. Emaka nina Paulus ay. 34 Pejorelah ukurndu ku si benar, janah olanai bahan dosa. Piga-piga i bas kam lit denga si la nandai Dibata. Si enda kukataken gelah mela iakapndu.

Kesalahen kalak korinti turah erkiteken kesalahen pemahamen ibas erkiniteken alu kata si deban, penolaken nandangi kiniteken kempak kekeken ibas si mate nari, empengaruhi gaya hidupna ku bas perbahanen si la mehuli.pas bagi kata “apa yang ada dipikiran sangat menentukan apa yang akan kita lakukan”

Erlajar arah perpulungen Korinti, ndilo kita gelah lebih gencar nuriken, ngajarken kerna lit na kekeken man kalak si erkiniteken, alu arapen kita lebih ertanggung jawab nandangi kegeluhennta.

Kalak si la ertanggung jawab nandangi kegelehunna I andingken Paulus bagi kalak si si la nandai Dibata, kata la nandai = ketidaktahuan” (agnosia Jun.) si ertina, bagi kalak motu si jago akapna bana, ia si salah tapi ia lalap akapna si benarna,. Atau ibas Bahasa sideban “Mereka bukan hanya tidak memiliki apa yang seharusnya dimiliki. Mereka justru memiliki apa yang seharusnya tidak boleh dimiliki”.

Sada kondisi/keadaan si sangat memalukan, si erbuahken kehancuren/destroy ibas istillah inggris.

4. Pangkenaina

Kondisi perpulungen korinti enggo parah, erkite-kiteken salah pergaulen, kondisi Indonesia gundari mungkin lebih parah ibas kasus narkoba. Piga-piga informasi enda mungkin jadi pendilo man banta guna lebih hati-hati, guna lebih gencar/tegas nuriken maka geluhta enda pagi ipertanggungjawabken erkiteken lit kekeken kenca kematen.

• Kepala Badan Narkotika Nasional Provinsi (BNNP) Jawa Timur Brigjen M Aris Purnomo menyatakan, Jatim berada di urutan kedua kasus narkobaterbanyak di Indonesia setelah Sumatera Utara pada triwulan 1 tahun 2021.
• BNN Sebut 1 dari 10 Penduduk Sumut Pengguna Narkoba " “Sekitar 1,5 juta dari 14 juta jiwa lebih penduduk Sumatera Utara menjadi pengguna narkoba, baik pasif maupun aktif, yang didominasi pengguna sabu-sabu dan ganja,” Toga H Panjaitan,  inews.id Selasa (26/10/2021).
• Deputi Pemberantasan BNN RI Irjen Pol Arman Depari menyatakan, saat ini Sumut menjadi daerah tertinggi dalam hal pecandu narkoba. Sumut melampaui DKI Jakarta yang sebelumnya menjadi daerah tertinggi dalam hal pengguna narkoba di Indonesia. Dari 14 juta lebih jumlah penduduk Sumut saat ini, 1 juta diantaranya merupakan pengguna narkoba. Ini berarti 7 persen penduduk Sumut merupakan pengguna narkoba.
• Saat ini, angka pengguna narkoba di Jabar sekitar 68.042 jiwa. Angka prevalensi penyalahgunaan narkoba di Provinsi Jawa Barat adalah 0,40 persen atau sekitar 68.042 jiwa.

Aristoteles, ngataken manusia eme zoon politicon, si ertina manusia adalah makhluk sosial yang tak lepas dari kebersamaan dengan manusia lain. Emaka hati-hati dengan pergaulanmu! Kenali kemampuanmu dan kenali lingkungan tempatmu bergaul, Tak kenal maka tak kebal.

Ope denga terlanjur ceda perban pengaruh buruk lingkungen pertemanan, sadarlah, pejorelah ukur, tadingkenlah/sirangilah kebiasaan si la mehuli. erkiteken nadingken kebiasaan buruk si enggo terlanjur melekat akibat pergaulen si salah seh kal sulitna.

Malem me ate kalak si la megiken pedah kalak jahat, si la ngusih perbahanen kalak perdosa si la erteman ras kalak megombang man Dibata. (Mas.1:1)

Kutare batang galiman, Tanggak talang si asar ndukur

Metemget, megermet tare teman, gelah ula papak ibas perukur.

Pdt. Maslan Sitepu-Runggun Bandung Barat