Nurung Dibata Labo Nurungta
Perkembangan Klasis Pulau Jawa semakin hari semakin luas perkembangan pelayanenna seh maka lit perubahen jadi Klasis Jakarta,emaka Tahun 2000 Klasis Jakarta berkembang jadi dua Klasis e me Klasis Jakarta Palembang ras Klasis Jakarta Bandung, janah genduari sue ras Keputusen Sidang Sinode tahun 2010 si lewat i Suka Makmur Klasis Jakarta Palembang mekar jadi dua e me Klasis Jakarta Banten ras Klasis Sumbagsel si berkantor i Palembang Sumatera Selatan. Klasis Jakarta Bandung genduari enggo 21 Runggun si tersebar Jakarta nari seh ku Kalimantan Selatan ( Banjar Masin ).
Juli tahum 2001 Klasis Jakarta Bandung ras Klasis Jakarta Palembang mengutus Tim PI berkat ku Klasis Kuala Langkat lebih kurang waktu e 38 kalak duana gabung Klasis Jakarta Bandung ras Klasis Jakarta Palembang sebab tahun sebelumna pe i gabung denga ibas tahun 2000 waktu e ku Klasis Dairi. Kami dua kalak e me Pt. Hndri Sembiring ras Seroja Tarigan ( Runggun Bekasi )i tempatken ku Perpulungen GBKP Cangkulen seh pelayanenna ku Perpulungen GBKP Kaperas,Samir,Mbacang Sapo Lada. Sarikat Bangun ( Runggun Bekasi) ras Dk. Daud Sembiring ( Runggun Cisalak ) i tempatken ku Sogong Kuala Murak.Kami tading i rumah Pt.Suasana Kembaren i Cangkulen si tuhu-tuhu mehuli pengalo-ngalona ras perbahanenna sekeluarga man kami janah Nora pe sekalak Guru Agama Kristen.
Pengalamen nehken berita si meriah ku kuta Cangkulen enda tuhu-tuhu melala pengalamen sebab adi ridi saja man bentasen jembatan gantung si gedangna 100 Meter,bagesna 100 Meter belangna jembatan enda 1 Meter ngenca e maka tangtangna kami erdalan nggirgir nge tiwen kami emaka ertoto lebe maka kami pang erdalan dungna jembatan enda ndai ban kami gelarna jembatan pertoton sebab kenca ertoto maka pang mentas.
Pengalamen si deban lit teman kami merga sitepu tiap kami jumpa ibas kede erpagi-pagi galari kami rusur tehna, sebab rusur kami minem i kede ningkami man perkede ban lau bampu ena ningkami maksudna kopi susu, bagem tiap pagi kami jumpa emaka ibas sada wari nina man kami peridi dage aku nina janahna polos ngerana man kami,tapi ningkami erlajar kam lebe . Tiap pagi ras berngi tetap i bahan kami renungen singkat ibas keluarga i ja kami tading, pagi ban kami saat teduh berngi ban kami renungan malam.Emaka ibas wari peduaken kami i ajak Pt.Suasana Kembaren ku Lau Namo Cengkeh gelarna lau enda lau belin lebih kurang 3 km dauhna i rumah nari janah muat kami ridi,nina Bp.Agus enda man kami mari lebe nakku nina man bangku sebab aku erbapa tuturku adi Seroja Tarigan si Paribanen ia sebab Ndeharana radu beru karo sekali duana. Emaka ningku kai pa bagenda nak enda nderbih ku togeng tuarta ( Ingan Muat Nurung bagi Bubu ) bentukna, mari ras kita ngelarsa nina kenca nin kami tuar ndai 4 ekor ngenca bas.Emaka nungkun aku man bapa enda gua maka bage ningku bageng rusur nina enggo jarang dat melala nina dahko nge ndai nak enggo ka sitik ngenca dat kitik ka nina man bangku. E bagenda nge pa nungkun aku man bandu i bas kam nogeng nderbih eroto kin kam pa ningku man bana,e lang nak erkai ka kin maka nogeng tuar ka ertoto nina man bangku,eh nurungndu kin ah pa maka buat-buatndu saja i... i... e lang nak ah nurung Dibata nge nina, adi bage adi labo nurungta engkai maka kam la eroto,adi bage enggo salah kap aku e nak nina. Bagenda pa ah kap lit mbirindu 3 guni i rumah adi kubuat sada guni gua ukurndu ningku man bana e megelut lah aku nak nina.Tapi Dibata labo megelut janah labo ia merawa tapi sitik banna dat padahal kita 8 kalak kita rumah si man pa ma la kita tersada pe dat. E gia pa ma labo akapndu dalih adi ertoto kita lang nina emaka ertoto kami dung ertoto nelam aku ku bas lau ingan tuar i togeng janahku ertoto ningku kari berngi Tuhan suruh sitik nurungndu bengket ku tuar si togeng kami enda gelah pagi erpagi-pagi enggo lit bengkau kami man ningku. Pagina buka kami tuar si togeng nderbih lit dat 27 ekor janah galang sitik,ih mantap kap toto ndai me nak nina,emaka kedun aku ka ertoto nina man kami. Pepagina giliren Seroja Tarigan mbaba pertoton ibas nogeng tuar emaka dat 52 ekor tapi la galangsa ih kitik naring pe dat silih nina man bangku, kitik gia adi melala ma labo dalih si penting pertotonta ndai ma enggo i begiken Dibata. E maka seh giliren Pt.Bp.Agus Kembaren si mada kuta mbaba pertoton emaka pagina elar kami dat 11 ekor galang,adi nen si 4 ekor lebena ndauh galangen si 11 ekor kenca ertoto ndai berarti hampir telu kali lipat enggo buena janah kualitasna pe enggo ergalangna,jungut-jungut ia nina totondu nge begiken Tuhan nina,gegehen nge totondu nak nina lalap emaka baba ikan ndai kurumah tamana ibas panci 10 ekor pan kucing janah tading 1 ekor naring ngenca,enggo latih akapna rukur kucing si nangko ndai pe enggo darami tapi lat dat emaka nina em adi la kita ngataken bujur nina si enggo bas taduken e buat kalak maksudna kucing ndai.E maaka pagi lanai bage yah nina man kami. Seh ka giliren Drs.Sarikat Bangun ertoto ibas nogeng tuar ndai nina ibas totona segala murung si lit ibas lau enda masuk kari berngi ku tuar enda nina ,sebab sengaja ia i undang kami reh ku cangkulen guna peraktek doa sebab e pe merupaken sada kesaksin man perpulungen. Pagina dat nurung ndai 21 ekor cukup galang, bagem rusur i bahan kami sebab je ingan kami ridi tiap wari,janah ridi kulau nogeng tuar muat bengkau,kemiri enggo lit tading darami tartarna,kencong pe melala,acem gelugur pe melala,adi i gule santuk namna emaka terkenal nge nurung namo cengkeh ningen e.Bagenda me sitik pengalamen ibas nehken berita si meriah tiap-tiap daerah lain usur ban Dibata si man ingetenta.(H-16)